“Despues di hopi aña por mira cu desaroyo a yega den Santa Cruz”

Gerrick Croes, di Santa Lucia, no por a keda sin presencia e ceremonia di groundbreaking di e mini cancha deportivo na veld di SV Arsenal. E ta un proyecto hopi bunita y cu e bario lo beneficia sigur di dje, Croes a bisa e atardi aki. E ex politico aki ta apoyando partido AVP den e campaña pa eleccion parlamentario 2017.

“Esaki ta algo hopi great mes pa e muchanan di bario y naturalmente pa e scolnan den bisindario tambe,” Gerrick Croes a bisa despues di a participa na e ceremonia na veld di SV Arsenal. E motibo di su alegria ta cu Sta Cruz ta un bario cu a wordo lubida pero ultimo temponan por mira cu poco-poco e ta hayando su debido atencion. El a menciona cu recientemente a cuminsa cu construccion di un edificio moderno di MFA pa e bario di Santa Cruz, a embeyece rond di Misa Immaculada Concepcion, ta bay haya e mini-turf aki awo. “Pero tambe areanan cu tabatin 40 aña sin haya luz, a haya iluminacion LED y tambe verkeersplateau. Esaki ta demostra cu tin desaroyo den Santa Cruz, cu ta algo hopi positivo pa e habitantenan chikito y esnan mas grandi.”

E proyecto di mini canchanan deportivo (cu yerba artificial) ta uno cu COA a tuma over di Gobierno aña pasa. COA International via di su organisacion local a haci un contribucion cu cual Gobierno ta logra construi 6 cancha. Tur e clubnan cu a bini na remarca a wordo informa cu nan mester percura pa e fundeshi mientras cu despues ta sigui pa pone yerba, heki, wayanan y kolomnan pa luz. E ultimo parti aki di iluminacion ta trahando riba dje. SV Arsenal ta e prome cu a yega na e parti di basha fundeshi cu ayudo di famia mes di e directiva di e organisacion deportivo.