Awe Aruba ta recorda cu 50 aña pasa Shon A Eman a bay laga e mundo aki

Cornelis Shon A Eman a nace dia 17 di Mei 1916 na Aruba. Despues di a caba MULO school, Shon A a sigui su estudio y a scoge pa e ramo di ley. Na aña 1938 despues di a gradua como abogado Shon A haci su entrada den e comunidad Arubano como abogado. El a wordo inscribi como miembro di e Cuerpo Hudicial na Corte di Husticia. Te cu e fecha di su fayecimento Shon A a keda inscribi den e Cuerpo aki, loke nifica cu el a fungi como abogado pa 30 aña largo. Ademas di su profesion como abogado Shon A a consecha hopi merito riba tereno politico. Na 1941 el a keda eligi como representante di pueblo den Landraad como miembro di Conseho Policial (Raad van Politie) di e tempo ey. Despues cu reglamento insular a drenta na vigor Shon A a keda eligi como miembro di Conseho Insular (eilandsraadslid), cual posicion el a ocupa pa 16 aña largo.

Den su periodo como Eilandsraadlid el a fungi pa un periodo cortico como Diputado Interino. Desde cu Eilandsraad ta existi, Shon A tabata lider di fraccion di AVP, den Raad y a ocupa den Raad semper un posicion notabel y distinguido.Na aña 1946, Shon A Eman a ricibi e mandato di Pueblo y a wordo delega pa Raad van Politie pa haci entrega na su Mahestad Reina Wilhelmina e peticion di Aruba pa e isla tin su propio gobierno, cual peticion a hiba e seyo notarial e tempo ey. Durante un audiencia special, Su Mahestad Reina Wilhelmina a ricibi Shon A Eman y aki di un forma cordial, pero firme Shon A por a describi e sentimento cu tabata reina den pueblo di Aruba.
Como resultado di su bishita na Hulanda, a bin Aruba un comision encabeza pa Profesor van Poeltje y mas despues a forma e conferencia di Mesa Rondo pa haci e trabaonan preparatorio di e structura nobo pa Antiyas Hulandes. Shon A tabata forma parti di Mesa Rondo na Den Haag tanto na aña 1948 como na aña 1952 – 1954. Durante e conferencia di Mesa Rondo na Den Haag, Shon A Eman a presenta un mocion – cu a wordo acepta – pa incorpora den e structura nobo di Antiyas, e AUTONOMIA INSULAR y asina Aruba a bin haya su reglamento insular (ERNA). Sin ningun duda, Shon A tabatin un gran parti den e tantisimo trabaonan di e comision di Mesa Rondo pa studia e revision di e posicion constitucional di Antiyas Hulandes.
Pa un tempo masha cortico, Shon A tabata miembro di e Colegio di Gobernacion General, cual despues di e structura nobo a bira e actual Conseho di Minister.

Na aña 1958, Shon A Eman a wordo eligi como miembro di Staten di Antiyas. Den e Colegio halto aki, e tabata actua tambe como lider di e fraccion di AVP. E numeroso trabaonan na interes di Antiyas y en particular pa e pueblo di Aruba, cu Shon A a haci den Staten di Antiyas a keda graba den e notulen di Staten. Shon A Eman semper a expresa su gran aprecio pa nos Cas Real. E tabata secretario di e Oranje Comite, cual durante e añanan di Guerra a haci asina tanto pa tene e concepto Hulandes hopi halto den wowo di e mundo liber. Tambe Shon A Eman a fungi pa masha hopi aña den e comision pa celebracion di Ana di La Reina. Mientras tanto otro facetanan di bida den nos comunidad tambe tabatin su pleno atencion. E tabata un amante di deporte y durante hopi aña e tabata Presidente di Aruba Voetbal Bond.

Finalmente por menciona cu Shon A, como miembro di e delegacion Parlamentario, a bishita tanto Hulanda como Suriname den cuadro di e tan importante contacto entre e representacionan di pueblo di e tres paisnan di Reinado Hulandes. Pa su numeroso meritonan y trabaonan na interes di Pueblo, Shon A Eman a ricibi for di su Mahestad un condecoracion.

Tabata riba 13 di Juli 1967 cu e tristo noticia a sacudi henter e pueblo di Aruba, Shon A Eman a fayece na Corsou. E notici aki a escala den un ola di tristeza rond di Antiyas, tur a realiza cu un gran luchador na bienestar di Aruba no tabata ey mas. E lucha pa su pueblo haya un miho gobernacion y sobre todo e libertad cu su pueblo semper a anhela a perde su lider. E gritonan pa mas libertad cu durante e ultimo añanan a ser lansa, a sirbi segun e tempo como continuacion di su gran trabou.