fbpx

Toque de queda cada biaha mas trempan ta birando un stress grandi pa comunidad, trahadornan den horeca y turista

 In AVP

Segun Parlamentario Jennifer Arends-Reyes desde cu e toque de queda a ser introduci hopi ta e ciudadanonan cu a ser gara den cura di nan cas, ta benta awa afor of personanan cu tin un pura enorme pa yega trempan nan cas. Aruba ta tuma over conseho di RIVM cu basicamente ta un entidad cu ta Hulandes y di un pais cu no ta depende primordialmente di Turismo. Aruba su Turismo ta asina fragil cu cada ‘bad experience’, ansha y ‘bad review’ pa motibo di e stress cu e sector tin pa cumpli cu e ora di ciere ta afectando nos pais hopi. E solo hecho cu a adelanta e ora di ciere na 9or di anochi, hopi turista no por disfruta di nan cena trankil.

Nan ta bin Aruba pa busca un escape trankil di nan bida hopi agita na nan pais. Awor e situacion real cu nan ta encontra ta cu nan mester pura ordo, pura come, pura sali y purba yega na un taxi pa yega safe nan hotel of acomodacion. E situacion aki ta creando un chaos total den trafico riba e high- rise hotel area pa cu taxi pa nan por yega na e destinacion y a bira cu hasta tin turistanan ta keda sin transporte pa yega back liher nan acomodacion. E stress aki no ta sano pa Aruba, pa nos bread & butter y imagen di Turismo ni tampoco pa nos Economia. Mester evalua hopi bon si ta bai sigui mantene e orario trempan di toque de queda di berdad tin asina hopi efecto ariba accident y contagio. E parti financiero cu e cambio di toque de queda a trece cune pa cu esnan laborando den restaurantnan y casino ta hopi grandi. Aunque ta algun ora e ta hasi gran diferencia den tips y den locual ta e personal ta bai atras den salario kitando e oranan di diferencia ta yega na un promedio di fls.1000,- menos. Especialmente esnan cu ta waiter, bartender, den cushina y ta den servicio di limpieza.

Aruba su famianan ta pasando den temporada sumamente duro y e golpi financiero no ta yuda contribui na e bienestar di nos ciudadanonan. Tur cos a bira mas caro, nada no a baha, costo di bida a sigui subi, ningun banco ni instancia no tin piedad mas pa cobra locual ta e fiansanan, e situacion no ta birando mihor den e hogarnan. Mirando cu ainda Aruba tin un percentahe hopi abou di e populacion cu ta protehi pa vacuna, e medidanan drastico y e teror cu ta creando den comunidad ta creciente. E comentario den pueblo ta cu polis nan trabou no mester ta bai den restaurant cu flashlight, bati na bentana wak si tin hende eyden, hiba hende sera pa motibo cu nan ta comiendo den un restaurant. De facto gastando nan placa cu nan a traha pe na nos isla. Hopi ta esnan cu ta di opinion cu Polis mester concentra ariba nan trabou di resolve crimen, promove seguridad y no locual ta pasando. Lo mester evalua hopi bon con ta continua cu e toque de queda y e restriccionan estricto pa haña despues cu a keda sera pa basta dia pa bolbe back cu dobbel mas aglomeracion cu prome. Aruba mester keda scucha di serca kiko ta biba en realidad bou di su ciudadanonan, e panico y ansha cu ta reina na e momentonan aki no ta sano pa Aruba.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search