fbpx

Ta incomprendibel cual ta e meta y balor agrega di e forma hostil con Gobierno di MEP-POR-RED ta anda cu docentenan

 In AVP

Segun Parlamentario Jennifer Arends-Reyes por a tuma nota con lamentablemente atrobe Enseñansa ta ser poni den un luz negativo pa falta di comunicacion. Enbes di cuestiona dikon Universidad ta sin rector ainda, duna claridad na e trahadornan cu tin un contract cu ta bai caba a corto plazo of bai bishita y notifica e scolnan cu no ta na altura ainda cu nan lo cai bou di otro scol, gobierno ta prefera manera tin opinion eyfor di escohe pa na un forma terorisa su mesun trahadornan. E biaha aki ta tira culpa riba docentenan di Colegio San Nicolas pa cosnan cu de facto na final e bevoegd gezag cu ta Minister y team mes pa casi cuater aña largo ta esun cu ta aproba y ta carga responsabilidad total pe, aunque aki dos luna e gabinete lo bira deminsionario. Hopi ta e reaccionan di esnan cu sa kiko ta come y bebe den Enseñansa, cu ta confirma cu tin un hierarchia den e mundo di Enseñansa, e ta cuminsa na directie, departamento di Enseñansa, Inspectie y bevoegd gezag mes prome cu yega na acusa docentenan, cu na final ta esnan cu tin cu simplemente ‘voer uit’, esnan cu tin cu ehecuta decisionan di nan dunador di trabou. Hecho ta cu ningun docente no tin autoridad pa dicidi, pues sin aprobacion di superiornan nunca no por move nada pa motibo cu e tin cu pasa tur e hierarchia menciona, a base di esaki basicamente ta inhusto pa tira docentenan bou bus asina ki publicamente estilo barbarico crucificando nan. A comprende cu a base di un bishita di trabou cu inspectie a hasi na november ultimo a traha un relato relativamente cortico y no un rapport extenso, eyden ta ser illustra varios punto di atencion. Un di nan ta e lessentabel cu a comprende cu desde cu e lessentabel original cu a cuminsa cune como unico scol secundario di HAVO/VWO publico independiente na Aruba y nunca a wordo exihi pa ahusta na e cambionan cu a yega di bin cune via un lbham. Gran mayoria di vak a duna mas les y no menos na e alumnonan, te awor kier wordo ahusta inmediatamente, e ta keda un decision abrupto despues cu aña escolar a cuminsa caba cu lo mester wak con ta implemente y wak con por yuda e alumnonan mas pa compensa. Tambe tin otro puntonan treci dilanti cu por wordo considera como ‘moment opname’ por ehempel e lista di nombernan di docente cu falta cifra pa yena riba e fecha ey pero despues si a yena e cifranan no ta ser refleha. E lista no ta inclui si e docente tawata AO, of si e la publica tur e cifranan riba e plataforma pa tur hende wak of a public’e pa alumno so pa tanten, den caso cu tawatin inhaal of si e CP of proefwerk a wordo posponi door di directie mes pa motibo cu no tawatin maestro suplente cu aprobacion pa duna e les y toets. Cual por cierto ta un punto na su lugar di keho y preocupacion di mayornan cu nan jiu no ta ricibi tal vak pa un periodo extendi pa motibo cu no tin maestro suplente. Tambe docentenan ta keda straña dikon a scohe pa publica den e relato e pagina so pa onderbouw tuma di e plataforma digital, e ta nombra algun docente so cu ta duna les na onderbouw, siendo cu tin bovenbouw y examenklas tambe. Docentenan basicamente ta cualifica e relato cu a bira viral como uno ‘kort door de bocht’, por duna un bista eroneo si no sa tur banda di medaya y no na su lugar pa discuti’e bayendo live husgando su mesun trahadornan sin elabora mucho riba e motibonan tras di locual a trece dilanti den e relato. E docentenan no merece un trato asina aki y sigur no uno hostil y acusativo. Imaginabo studia tanto aña pa bira docente y despues pa wordo maltrata y insulta cu palabra publicamente, manera hopi a cualifica locual a tuma lugar. Mester por yega na mihor manera pa por comunica for di punto di bista di bevoegd gezag na cuerpo di docente, comprende otro, aña no mester cuminsa den un ambiente asina hostil, di mas stress y sin ningun meta constructivo. Tambe por a tuma nota cu e fusering di Emmaschool y Paso pa futuro ta continua despues di tanto cu a splica e contra indicacionan. Despues cu tanto otro Ministernan a priminti cu lo intermedia sin resultado. Alavez Minister a anuncia cu por lo menos 3 scol lo cambia di nomber y naturalmente e baluartenan escohi merecidamente ta digno di un reconocimento. Pregunta lo ta den e temponan dificil aki si gobierno lo yuda mayornan cu compra di uniforman nobo tambe. Mirando cu cambio di nomber di scol y branding ta exihi inversion nobo pa banda di mayornan tambe.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search