fbpx

Gobierno mester stop politikeria den suministracion di vacuna

 In AVP

Durante conferencia di fraccion di AVP den Parlamento, Parlamentario drs. Mervin Wyatt-Ras a trece padilanti cu e suministracion di vacuna na nos hendenan mester sosode fuera di politica. Wyatt-Ras por a tuma nota cu Prome Minister, minister di Salubridad y minister di Finansas y Economia a tuma vacuna hunto, bisti tur tres mescos den uniform, manera cu ta Carnaval nan ta bai. Despues pa tende den entrevista di Minister Presidente su declaracion cu a  calcula cu hopi mas hende lo a inskribi of registra pa tuma e vacuna, pero solamente 5000 persona so a registra, mientras cu a spera  entre 17.000-18.000 persona lo a haci esaki. E ta trece padilanti comosifuera ta falta di interes di nos hendenan pa registra. Mervin Wyatt-Ras no ta di acuerdo cu  loke e Prome Minister ta trece padilanti. Wyatt-Ras ta di opinion cu e otorgamento di vacuna mester ta los di bisti uniform, los di fanfaria, los di politikeria, pasobra ta trata di salud di nos hendenan. E vacuna lo yuda pa nos cuidadanonan por ta mas protehi. E contagio por ser disminui y lo tene e virus bao control y lo por traha na imunidad di nos hendenan. Segun Wyatt-Ras varios di nos cuidadanonan no a registra pa motibo cu no tin e informacion suficiente, pero tambe pa motibo cu tin personanan cu no por yega na e sitionan cu ta registra. Wyatt-Ras a yega di trece esaki caba padilanti y a haci preguntanan na minister. Diabierna ultimo a bolbe haci preguntanan na minister tocante di e asunto aki, caminda tin di nos hendenan no por habri un app, no tin smart phone, no por yega na e MFA pa nan registra y e personanan aki ta na cas. Tin cu yega den contacto cu e personanan aki, nan ta esnan cu tin malesa chronico, di edadnan halto di mas di 60 y tambe 70, 80 y 90 plus. Tin cu tene cuenta cu e gruponan aki. Wyatt-Ras no ta haya cu gobierno ta haciendo esaki. Hasta den preguntanan a sugeri pa por tin contacto cu stakeholders, especialmente dokternan di cas y praktijkondersteuners y otro dunadonan di cuido pa nan por coopera pa wak con nos hendenan por ser vacuna. Den relacion cu nos pueblo varios cuidadano a trece padilanti nan disgusto pa locual gobierno ta haci cu distrubucion di e vacuna y ta haya cu esaki no ta husto. 

Bo por bisa pa e situacion na Aruba DVG a publica cifra desde 13 di maart 2020 cu e virus di COVID a drenta Aruba. Desde e tempo ey te awor e cantidad di casonan a subi te na 7000 caso positivo. Den hospital tin actualmente 20 persona interna.  E cantidad di casonan positivo di e dia ta 40. Den e simannan pasa tabata entre 30 pa 50 caso pa dia. E cantidad a baha un tiki pero mester keda cuateloso paso e cantidad di caso por aumenta atrobe, teniendo cuenta cu e variante(nan) di COVID. 

E hecho cu mandatarionan ta haci asina hopi propaganda ora e vacuna a yega y na momento di tuma vacuna, no ta yuda. Esaki a trece henter e asunto di vacuna den un luz politico. Wyatt-Ras ta lamenta esaki. E parlamentario no tin nada contra di e VIP’s cu a ricibi e vacuna den comienso pa duna ehempel na otro. Sinembargo por tende y hasta mira mas y mas cu friends and family ta haya e vacuna. Mama, tata, primo, prima, amigo, conocir y cu ta traha den diferente departamento serca di e mandatarionan ta hayando vacuna. No ta frontliners, no ta 60-, 70- y 80, 90plussers ta haya e vacuna. E personanan cu mester tin prioridad pa ricibi e vacuna ta frontliners pero tambe personanan cu tin malesanan chronico y personanan di edadnan di mas cu 60 anja. Kizas gobierno por cuminisa na lesa e preguntnanan cu Wyatt-Ras ta manda den nomber di su fraccion pa asina e por atende cu nan y implementa algun idea. 

E.o. Wyatt-Ras a puntra dicon no ta envolvi dokternan, praktijkondersteuners y otro dunadornan di cuido cu conoce nan pashentnan vulnerable? El a puntra si tin un “meldlijn” of linja di telefon pa meld na momento cu algo no bai bon cu un patient cu ser vacuna? Cuanto vacuna lo ser otorga totalmente? Wyatt-Ras a haci pregunta encuanto e registracion pa asina cu nos hendenan cu netamente mester ta ser vacuna. Dicon te ainda minister di Salubridad no a entrega e plan di registracion na Parlamento? Minister no kier papia di esey, kiermeen tin cois di skonde? 

Na e momento aki tin “willekeur”. Ken cu bin y cu ta famia of amigo ta haya vacuna. Wyatt-Ras no ta kere esey ta e forma corecto. Nos mester tin transparencia den esaki, pasobra ta trata placa di pueblo. A lo largo si bo wak bon ken ta bai paga e cuenta aki? Tog nos pueblo tin cu paga. Wyatt-Ras a punta minister si tur e vacunanan ta ser suministra tur dor di Hulanda of tin un limite? Ta cuanto vacuna Hulanda lo bai manda pa Aruba? Lo mester bai paga pa e vacunanan a lo largo y si ta bai tin medidanan pa loke ta trata esaki pa paga e vacunanan? Wyatt-Ras ta menciona cu tabatin famia cu a perde nan ser keri dor di COVID. E famianan aki mester tin prioridad pa ser vacuna.  Pero gobierno ta skohe pa e tres miembro bai vacuna mientras 100.000 cuidadano ta sin vacuna. 

E minister encarga cu Salud mester cuminsa contesta parlamentarionan y duna cuenta. Gobierno mester duna informacion y no solamente haci bunita y previlegia su mes y su “friends and family”. Pesey Wyatt-Ras ta condena e actitud aki di gobierno, paso e salud di nos pueblo ta di importancia.  

Ta necesario pa duna bon informacion encuanto pro y contra di vacuna, pasobra den pueblo e parlamentario ta encontra un cantidad di cuidadano cu no ta motiva pa bai tuma vacuna a base di falta di informacion of informacion no corecto. E personanan aki hopi biaha no ta riba medionan social of no ta skucha radio ni wak tv. Mester yega na e personanan aki tambe. Mester por stimula programanan informativo. Wyatt-Ras por a mira varios di nan, p.e. dr. Selene Kock, dr. Salazer y otro profesional medico, pero  ainda falta mas splicasion. E hecho cu e ministernan kier ple profesional experto riba e tereno no ta yuda tampoco. E hecho cu ministernan ta show y previlegia nan famia y amigonan ta confundi hopi hende dor di cual ta asocia vacuna cu un color politico. Mester stop di hinca politikeria den asunto vacuna e parlamentario ta declara finalmente. 

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search