Fraccion di AVP a celebra Dia di Independencia cu colonia Dominicano
Diamars mainta a tuma lugar un ceremonia protocolar riba Plaza Juan Pablo Duarte pa celebra e di 174 aniversario di independencia di Republica Dominicana.
Durante di un ceremonia masha bunita, un biaha mas representantenan di e colonia Dominicano aki na Aruba, Consul General Alfredo Mateo Zabala hunto cu funcionarionan di e sede consular Dominicano, a expresa di ta contento di ta forma parti di e comunidad Arubano, gradiciendo pa e forma con nos pueblo a acepta nan cu man habri, caminda nan ta sinti cu nan mes como yiu di tera.
Na mes momento varios persona den comunidad y e sector comercial a wordo honra e mainta aki pa nan aporte y dedicacion na yuda crea un sociedad caminda tur hende sin excepcion, por biba hunto den un ambiente amicabel y respetuoso.
Fraccion di AVP den Parlamento a wordo representa pa lider di fraccion sr Marlon Sneek y Parlamentario sra Jennifer Arends-Reyes kendenan a asisti na e ceremonia protocolario y despues a presencia e diferente presentacionnan cu tawatin e mainta aki, caminda un biaha mas e colonia Dominicano y comunidad di nos isla, hunto a celebra e gran dia aki. Un felicitacion caluroso di parti fraccion di AVP ta wordo extendi na e colonia Dominicano residencia na Aruba.
