fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Clifford Heyliger ta añadi mas experiencia y motivacion pa cambio na un lista ya fuerte di AVP

Na momento cu nos pais ta buscando speransa y solucion pa un sin fin di problema y retonan, e miho jiunan di nos pais ta lanta para y pone nan talento na servicio di nos pais. E yamada aki di Mike Eman a wordo bon scucha. Despues di mas cu un siman di hobennan profesional cu a scohe pa drenta politica, pa duna ainda mas na nan pais, diadomingo anochi CLIFFORD HEYLIGER, a anuncia cu e ta pone su mes disponibel pa eleccion pa Parlamento di dia 25 di juni awor. Den su presentacion CLIFFORD HEYLIGER no a laga niun duda ta pakico e ta para y kico e ta contra. Su presentacion tabata emocional, franco, directo y convincente di cu aki nos tin un homber, cu un carera profesional, un experiencia como sindicalista y activista social, envolvi den un cantidad di organisacion cu tin un cos den comun: sirbi e interes di trahadornan y nan famia. 

Ken ta CLIFFORD HEYLIGER?

CLIFFORD HEYLIGER a nace y crece na San Nicolas. Na edad di 14 aña ela bay Hulanda pa caba scol secundario y pa studia. Despues di su estudio ela bolbe Aruba y mester a cuminsa traha den hotel pasobra e no por a haya trabou den e ramo tecnico cu ela studia. Ora a habri un oportunidad den refineria ela aplica y wordo accepta. , atrobe aunke e funcion no tabata den su ramo di estudio. Finalmente ela haya oportunidad pa traha den e planta di WEB y cu añanan di trabou y experiencia, ela bira hefe di e laboratorio di WEB. CLIFFORD HEYLIGER tabata un sindicalista cu a representa trahadornan di WEB pa hopi aña. Coleganan ta describi Clifford como un lider cu ta scucha su hendenan bon, prome cu e papia of haci algo. E ta casa y tin dos jiu teenager. 

EXPERIENCIA

Loke ta resalta serca CLIFFORD HEYLIGER ta su caracter suave, su amabilidad, su forma di papia cla sin drei rond di e tema y su experiencia. Ora Bo papia di “hende serio”, wel ata Clifford. E ta personifica e expresion “hende serio”, cu ta nifica, hende cu Bo por tuma na serio, hende cu Bo por confia, hende cu sa di kico e ta papia. Sin duda, CLIFFORD HEYLIGER ta añadi ainda mas na e team di candidatonan profesional nobo y entusiasto, combina cu candidatonan cu experiencia den gobernacion, cu lo ta riba e lista di AVP. Mirando e retonan grandi cu nos pais ta enfrenta, ta e combinacion aki di conocemento profesional, motivacion pa cambia cos y experiencia den atende cu retonan grandi, cu nos pais tin mester awor aki. CLIFFORD HEYLIGER no solamente ta fit perfectamente den e team aki, e ta halza e team ainda mas na e nivel cu nos pais mester!