fbpx

Aunke salubridad ta den ICU, gobierno sin curason ta corta den cuido

 In AVP

Desde maart 2020 e virus COVID-19 a bati na porta di nos ciudadanonan.
Nos tin ya caba 10.076 caso positivo. Activo tin 516 caso y caso nobo ta 26. Tin 92 persona cu a fayece pa motibo di e virus aki. Alabes tin un cantidad di persona den ICU. Aruba su Hospital ta yudando pashentnan di Corsou y e otro islanan den Reino. Sin embargo e forma con gobierno a bin ta atende cu e crisis aki a haci cu hopi di nos hendenan ta duda si nan ta vacuna si of no y esaki tin su impacto con lihe nos pais lo bai recupera riba tereno economico, financiero y social.
Wyatt-Ras ta kere cu COVID -19 a ocasiona problemanan devastador, no solamente ora un persona tin e virus sino a largo plaso tambe. E tin consecuencianan duradero pa salud di nos ciudadanonan pa loke ta trata pulmon, pero tambe pa loke ta trata otro organonan cu ta ser “aangetast” door e virus aki. Esaki sigur mester tene cuenta cun’e. Pesey ta importante pa nos hendenan ta vacuna. Especialmente esnan di edadnan mas halto y esnan cu tin malesanan chronico.
Wyatt-Ras a trece na varios ocasion padilanti cu gobierno mester percura cu e vacuna ta ser duna na e gruponan di risico mas serca di cas posibel. Pero gobierno a skohe pa, den un fase tempran, duna vacuna na “friends and family”. Aki Wyatt-Ras no kiermeen e celebridadnan cu a haya vacuna den comienso, sino ora a vacuna famia y amigonan di e partidonan na mando. Esey a haci cu hopi hende ta bisa cu si ta “friends and family” ta vacuna e ora nan no tin cu vacuna mas. Esey ta loke mester cambia. Mester bai mas serca di e personanan aki. Tin hopi forma. Wyatt-Ras a sugeri via di dokternan di cas, pero tambe nos tabatin bus di salud, cu tabata proyecto di gabinete Eman y e no ta wordo usa. E bus di salud tambe por bai na e diferente barionan y ta haci mas posibel cu nos hendenan por bai mas serca di cas pa por ser vacuna. Pa miedio di contagio tin hende no kier bai den un sporthal pa registra y e drempel e ora ta halto pa vacuna.
Mientras cu nos salubridad publico ta enfrentando un reto grandi, e gobierno sin curason aki ta tuma medidanan drastico den nos cuido. Esey ta touch full e sector di cuido. Por menciona e medida cu e lista positivo di remedinan a baha cu 80 remedi. Esaki ta haci cu nos hendenan humilde, hendenan cu no tin empleo y hendenan cu no tin un forma di biba, mester bai paga pa nan medicina y mester paga un Pharmacist Fee ora nan haya medicina. Esaki no ta un situacion corecto. Tambe a corta den djente falso cu especialmente nos grandinan por a bin na remarca pa haya y tambe a stop e transporte pa dialyse, mientras a coloca campanjadornan di minister pa haci e trabou aki pa despues coloca nan den gobierno bao departamentonan cu ta cai bao salubridad, Wyatt-Ras a haci diferente pregunta y no a haya contesta for di e minister encarga cu Salubridad. Ta momento pa e minister refleha y bin cu miho formanan pa atende cu cuido di salud di nos hendenan. E minister aki solamente na momento cu e tin asuntonan cu e kier gaba cun’e e ta bin padilanti. P.e. hasta den cierto medio di comunicacion ora bo kier drenta pa lesa algo, mester keda click riba dje pa bo por habri e pagina. E minister aki ta haci propaganda. Kizas no cu su propio placa, sino cu placa di pueblo.
Segun Wyatt-Ras nos mester mantene cuido di calidad. Un cuido cu AVP su gobierno a contribui na dje pa garantisa cu mayan cu na momento cu no tin COVID mas por keda atende cu pashentnan cu keda cu consecuencianan di largo duracion.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search