Arthur Lawrence Dowers: Bio

Arthur L. Dowers ta e prome minister kende a tuma na su encargo dos cartera cu normalmente ta separa den e maneho di un pais, cual ta Husticia y Enseñansa. Su meta strategico principal ta pa diseña maneho den e ramo di enseñansa, cual lo duna resultado den e area di husticia. Prome cu el a cuminsa su carera politico, Minister Dowers a cuminsa cu su carera profesional den cuido, despues di obtene dos titulo bachelor (drs) y un titulo master (mr). Como cu e tabata interesa pa hunga un rol importante den e desaroyo di un sociedad saludabel, el a expande su conocemento cu un estudio di ley pa cual el a obtene su titulo di meester in de rechten (mr). E ta un graduado di Universidad di Maastricht, Hulanda y Universidad di Aruba.

Durante su carera profesional, Minister Dowers tabatin diferente posicion di liderazgo den e sector di salubridad publico y a completa un variedad di proyecto cu exito. E tabata responsabel pa e reorganisacion di e sistema di file di pashent y reportahe di Horacio O. Oduber Hospitaal, e establecimento di un procedura pa keho di pashent structura, e desaroyo di un protocol clinico pa pashentnan di psikiatria y e introduccion di programanan di excelencia den organisacion. E tabata un facilitador pa programanan di enfermeria pa temanan den e area di salubridad publico, etica y ley di salubridad y e tabata miembro di hunta di directiva di diferente fundacion den e ramo di salubridad publico y maneho di bienestar y desaroyo di hubentud. E ta interesa den haci un contribucion pa mehora, activa y optimalisa e sistema nacional di cuido pa e comunidad di Aruba y crea miho facilidad, oportunidad individual pa e desaroyo di e hubentud di Aruba.

Arthur Dowers a inicia su carera politico na aña 2001 cu e mesun obhetivo cu e tabatin den mente pa cu su carera profesional. Cu determinacion pa contribui mas na desaroyo di Aruba, cual ta un pais relativamente nobo den e Reino Hulandes, el a uni su mes na AVP durante un temporada cu basta reto. El a huramenta como miembro di Parlamento di Aruba na 2005. Den Parlamento e tabata miembro di diferente comision parlamentario den e areanan di asuntonan constitucional, asuntonan di reino, salubridad publico y asuntonan legal. El a haci diferente publicacion den e areanan di maneho di recurso humano, organisacionnan di salubridad publico, maneho y ley.
Na november 2009, el a tuma na su encargo e puesto Minister di Husticia y Enseñansa. El a introduci legislacion pa, entre otro, revisa e codigo penal, pa provee agencianan di husticia cu derechonan special pa haci investigacion y derecho pa accionnan di “preventief fouilleren”. Tambe e guera contra narcotrafico, labamento di placa, financiamento di terorismo y polucion di medio ambiente a intensifica pa medio di legislacion nobo.

Arthur ta casa cu Patricia Alders, kende ta abogado di profesion. Nan tin tres yiu: Kimberly, Garrick y Lawrence.

Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search