AVP ta un abreviacion pa Arubaanse Volks Partij.

his5Partido AVP a haya su nomber na 1942, tempo cu el a keda funda, pero mucho prome cu esey, mas o menos desde 1920 tabatin un movecion na Aruba cu tabata wordo dirigi pa Henny Eman (1887-1957), kende tabata mira cu Aruba no tabatin voz den Colonie Curacao.

Henny Eman, e homber bisti na blanco cu dashi ta bula den biento, skerpi y chistoso tabata grita pa separacion, los for di Corsow. Su voz fuerte a bira e voz di Aruba y na mes momento e tabata tuma pasonan dificil pa por a alcanza e anhelo di Aruba. E tabata mustra e pueblo cu ta pueblo mes tin e derecho fundamental di dicidi riba su propio destino, usando e lema famoso “Vox populi, Vox Dei “.
Henny Eman ta e persona cu a encamina cu pasonan sigur un caminda largo y tramposo pa por a logra un cambio estatal pa Aruba, los for di Corsow como miembro di Reino Hulandes. Su lucha y esun di otronan no tabata en vano, nan gritonan tabata rezona y a alcanza Hulanda. Na 1942 Reina Wilhelmina, kende tabata na Inglatera pa motibo di Segundo Guerra Mundial, a manda un mensahe grandi y impactante pa Aruba: despues di guerra Hulanda lo introduci cambionan estatal pa su colonianan cu lo bira partner igual den Reino. E mensahe aki a inspira Henny Eman pa tuma accion inmediato y asina e organizacion politico AVP a haya su nomber.

 

E causa

E causa, e lucha pa ta baas den nos propio cas tabata e motibo pakico partido AVP a keda funda.
E lucha aki a haya su raiznan den comienzo di siglo pasa ora cu e tata di Henny Eman, Sr.Cornelis ” Cornes ” Eman a sali dilanti como e pionero di Aruba bringando pa e cambionan necesario worde tuma na fabor di Aruba y su hendenan. E tabata condena severamente e yugo di opresion estatal. Su empeñonan y inspiracionnan grandi a stimula otronan, su jiunan y nietonan, pa sigui cu e lucha cu el a inicia. E candela cu el a cende a keda kima pa decadanan largo. Esnan cu a sigui su ehempelnan a sigui boga pa Aruba sali for di e sistema colonial y e grito pa ” separacion ” a cuminza worde tendi for di tur skina na Aruba. Entre esnan cu tabata grita pa separacion tabata e jiu homber di Cornes Eman, Henny Eman. Den temponan dificil ora cu nos no tabatin e infrastructura cu nos tin awe, e tabata motiva Arubianonan pa continua cu e lucha cu su tata a inicia. E lucha a cuminza haya forma fiho y politicamente a cuminza traha pa trece cambionan.
Despues cu Henny Eman a retira for di politica su jiu homber a sigui cu e lucha. Asina a bin sosode cu na e Ronde Tafel Conferentie dia 18 di maart 1948 e ta entrega un mocion den nomber di Aruba pa pidi un ” afzonderlijke status ” – Status Aparte – pa Aruba den Reino. E mocion a keda acepta pa e lidernan di delegacionnan di Hulanda, Surinam y Curacao.

(documentacion : ” Status Aparte, e causda grandi di siglo 20 “)

 

Partido AVP awe. Den un milenio nobo.

his1Partido di pueblo Arubano AVP a pasa den hopi turbulencia durante su añanan di existencia. Tabatin temponan bon, di gloria y di logronan, pero tambe temponan malo, temponan di berans. Partido PPA a sali for di partido AVP, mescos ta e caso tambe cu partido MEP. Ambos biaha cu politiconan di partido AVP a bandona e fila di e partido berde, esaki tabatin como consecuencia cu e partido a bai considerablemente atras den voto. Na 1977 AVP a pasa den temponan sumamente dificil, caminda un man yen di hendenan leal so a keda fiel na e partido. E partido e aña ey no a saca ningun asiento. Despues di e periodo aki poco poco partido AVP a cuminza sali for di situacion dramatico cu e tabata aden y e cuminza haya su votadornan bek. Esaki sigur danki na e persverancia y sabiduria sin precedente di e jiu di Shon A y nieto di Henny Eman sr., nos actual Prome Minister Henny Eman. Henny Eman, mescos cu su abuelo y tata, ta un persona di visionnan y inovacionnan grandi. E candela ferviente cu a worde cendi dor di generacionnan prome cun’e a sigui kima ardiente den su curazon di politico hoben.

El a saca awa for di piedra y trahando incansablemente el a sa di trece e partido bek den su temponan di gloria. Esaki cu e respaldo di hendenan cu a kere fielmente den dje. Pa por a logra haya e votadornan bek partido AVP a haci uso di diferente lemanan manera ” Ban cas bek “, Un cambio pa miho “, ” Cambio, awor si “, ” AVP, nos amigo ” y tambe jinglenan cu ritmonan impactante. Tur esaki, e organizacion tremendo di e partido y tambe e programanan di AVP a duna resultado positivo y AVP a recobra confianza total y un biaha mas, mescos cu antes AVP a bira e partido mas grandi di Aruba den eleccionnan di 1994 y 1997.

 

E nificacion di e logo di partido AVP

For di un principio partido AVP a usa e color berde den su bandera y logo.
Berde, mescos cu e anker den e logo di AVP ta simboliza ” Speranza “.
Speranza pa un miho Aruba, un miho mañan, los for di Corsow pero cu lazonan estrecho cu Hulanda. E letter ” S ” den e logo ta di e palabra “Separacion “. E isla Aruba den e logo ta papia pa su mes; nos baranca stima, los for di e yugo di opresion estatal.
E logo a wordo diseña pa Sra.Ina Eman-Lampe.

 
E aña (2013) aki partido AVP ta celebra su di 71 aña di existencia. E ta e partido mas bieuw di Aruba.