Uso di UAV na luga di helicopter lo spaar gobierno miles y miles di florin

 In AVP

Parlamentario Robert Candelaria a mustra durante conferencia di prensa cu desde di su tempo den campana, el a papia di e importancia y beneficio di drones den lucha contra criminalidad y otro asuntonan importante.

E parlamentario a sigui mustra cu nunca prome el  a yega di duna e nomber di e ekipo na cual e tabata referi na dje pero cu awor sin por splica y duna mas informacion un poco mas na kicosu persona tabata referi

“Nos ta mirando algun model di Unmanned Aerial Vehicle (UAV), cu ta mashinnan cu por bula hopi mas ora cu un helicopter y ta bula pa distancianan mucho mas largo c’un helicopter.

Por wak awe un video di e UAV di nos Kustwacht na Aruba riba nan Facebook page cu yama Kustwacht Caribisch Gebied y news outlet di 24Ora.com. 

E hecho cu Marinaa ta pone un UAV na disposicion di Kustwacht pa Aruba, ta un muestra di e cooperacion cu tanto nos ta boga pe den Reino.

Mi ta contento cu apesar cu AVP ta den oposicion, nos por comparti nos vision cu partnernan y cu esaki ta wordo implementa di e forma aki.

No ta den Gobierno so por haci cosnan bon pa Aruba y awe ta ser demostra cu for di den oposicion tambe por bin cu ideanan y proyectonan cu ta na beneficio di Aruba. 

Un UAV no mester di un piloto manera un helicopter, pero tin personal riba tera cu ta specialmente prepara pa maneha esaki. E UAV si tin e camera etc cu ta nesesario pa por mira den scurirdad y por haci uso di un ‘thermographic camera’ of ‘infrared camera’ cu por mira curpa di hende den scurirdad.

Esaki ta un unidad cu mi ta convenci cu nos mester haci uso di dje na luga di e helicopter cu sin duda ta costa mucho mas placa.

Manera mi a bisa, cu den e temponan aki cu gobierno mester fia placa di Hulanda, gobierno mester haci tur ehercicio pa baha su gastonan. 

Un di nan ta e helicopter cu ta costa nos casi Afl 200,000.00 pa luna. E placa aki por haña un miho destinacion sigur den e temporada dificil aki. 

E gasto aki no tin un rendimiento halto pa nos, pero un UAV por rindi hopi mas. 

Su alcance ta enorme, e duracion di cada buelo ta hopi oranan den halto, e cameranan cu e tin ta tremendo y e gastonan reduci di operacion manera fuel, piloto y mantencion di e UAV, ta substancialmente menos c’un helicopter.

Mi ta contento pa mira cu ora nos Reino Hulandes funciona manera mester ta, proyectonan manera esaki por wordo realisa.

Actualmente nos mester di union pa hopi cos den Reino y un area cu sigur nos mester di union ta pa combati criminalidad y ilegalidad.

Esaki ta cosnan cu nos Minister di Husticia mester haci ora e ta dialoga cu partnernan di Hulanda. 

E UAV ta un ehempel di prioridadnan corecto pa bienestar di nos seguridad y mi kier gradici tur cu a haci esaki posibel y ta spera cu e instrumento di UAV lo ta un cu lo yuda cuida nos frontera y yuda sigura un Aruba mas safe y mas sigur,” Parlamentario Robert Candelaria a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search