fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

Desde 1991 partido AVP ta brinda pueblo di Aruba un bunita y espectacular Concierto di Speransa na luna di December pa deleita e publico cu musica di Pasco, canto, baile y platonan sabroso. Partido AVP y su miembronan ta percura pa e regalo aki semper ta uno varia. Simannan prome caba ta cuminsa cu e programa pa despues hinca tur cos den otro pa na final riba e anochi mes por brinda tur esnan cu ta bin Cas di Partido un anochi formidabel. 

Ya for di tempran diasabra anochi, e publico a yega nan cas den Madiki pa disfruta di e musica di e prome grupo di Gaita ‘Maruba’ cu a toca piezanan masha dushi mes y pone tur presente den e ambiente unico di Pasco. Mientras cu nan tabata toca, e hendenan tabata cumpra nan plato di Pasco cerca un di e candidatonan di e partido berde. Norman Roos y su tent di bolo cu semper ta e punto atractivo tabatey for di tempran manera un clabo. Despues di e grupo di Gaita, Robert Maduro y su grupo Alma Folclorico a subi stage y a haci un cos. Tur hende a cuminsa baila y ambiente a sigui den forma inigualabel. Lider di partido Mike Eman hunto cu su señora Doina a pasa rond pa manera ta custumber saluda tur hende cu un brasa, un sunchi y palabranan di cariño. Algo masha aprecia mes. 

Na final tabatin un sorpresa pa esnan presente. Despues di tabata ausente pa un temporada cortico e grupo conoci ‘Datapanik’ di Michael Lampe a subi stage pa duna un presentacion tur cu tin. A cuminsa cu un pieza canta pa e yamativo Vicente Ras riba su tambor compaña pa Michael y miembronan di Datapanik. E ritmo ta uno notabel y unico y esey a hala atencion durante henter e presentacion. Michael mes tambe a canta piesanan conoci y asina e anochi a culmina. Te na final e publico a keda baila eydilanti dunando otronan briyo pa nan tambe move e pianan. Tur cuminda a wordo bendi, mescos cu tur bolo y otro cos dushi. Por conclui un bes mas cu e Concierto di Speransa tabata exitoso y yena cu ambiente.  Partido AVP ta desea henter Aruba un Bon Pasco y Prospero Aña 2019.