Tur hende cu drecha nan cas lo bay mira nan belasting di erfpacht subi

 In AVP

Ex Minister di Husticia  y Parlamentsario Arthur Dowers den un conferencia di prensa a bisa cu e mester a hari ora cu el a scucha Prome Minister Evelyn Wever Croes bisa cu pa ta mas transparente, a kita e BBO for di e factura cu clientenan ta ricibi ora di compra.

Segun e Gobierno a bisa, den cuadro di transparencia no mag pone e BBO mas riba e recibo. “Boso a yega di tende un cos bestia asina antes. Bo ta bisami cu ora bo no pone algo riba un recibo e ta mas transparente cu ora bo no pon’e?

Ken e Gobierno aki ta kere cu e ta gaña, ora cu pueblo a bay urna electoral, nan no por a biba kere cu ora a scoge pa e hendenan aki cu ta e scop aki nan ta bay ricibi y pueblo mester keda alerta pa loke cu ta bin ainda.

Cu presion di CFT y Hulanda riba nan pueblo por spera mucho mas medida ya cu ta e unico forma y sistema cu e gobierno aki conoce.

E gobierno aki despues di a bati pueblo cu medida, awor nan kier sconde e medida, nan no kier bo sinti e dolor, no kier bo sinti e priki cada bes cu bo yega na caha y sinti kico e medida ta haci.

P’esey AVP tur dia lo recorda e pueblo e 6% di impuesto cu e Gobierno aki a impone, no pa paga debe sino pa paga pa “friends & family”, Dowers a mustra.

El a duna e ehempel di un edificio cu gobierno a bandona pasobra e ta decai pero e Gobierno aki ta cera un contracto di huur toch, djis pa complace un sponser di campaña y cual lo bay costa 1 miyon florin y  ta pueblo ta esun cu ta bay paga pa esaki.

A cambio ta gaña pueblo cu nan ta bay paga 20 florin menos na belasting, esaki pa un Gobierno sinberguesa y corupto.

“Ciudadanonan awendia tampoco por traha nan cas cu nan sodo, paga interes riba placa cu presta pa construi esaki y hacie bunita. Pa motibo cu e cas ta bunita manteni, ta dal e ciudadano un grondbelasting pisa riba esaki segun e reforma fiscal nobo.

Mi ta haya cu esaki ta un cos di sinberguensura. Mi no tin nada contra cu ta cobra pa erfpacht, pero no ta por t’asina cu cada bes cu ami dicidi di haci mi cas un tiki mas bunita, cu mi sodo y cu materialnan cu mi a paga invoerrechten caba riba dje, awo ta bin cobrami extra belasting pasobra mi a dicidi di drecha mi cas. Esey ta loke ta bay pasa, eynan pueblo ta bay paga mas cu gobierno ta duna pueblo bek y tin un grupo grandi cu ta bay sinti e efecto aki formalmente.

Boso mester cuminsa saca man for di saco di pueblo y cuminsa baha gasto manera cu boso a priminti na CFT cu boso ta bay haci.

Awe nos ta bou curatela di CFT, danki na MEP, kendenan a bay Hulanda pa kita autonomia  financiero y ora cu nan a bin den Gobierno, bisando cu nan si ta baha gasto, nan no a haci’e y CFT ta sigui.

Ta danki na Xiomara Ruiz Maduro y Evelyn Wever Croes cu nos tin CFT awe como castigo extra pa pueblo,” Parlamentario Arthur Dowers a señala.

 

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search