Gabinete Wever Croes ta conta cu tres fraccion den Parlamento, cu ta sostene e gobierno actual y mientras cu nan ta sostene gobierno, tarea principal como representantenan di pueblo, nan prome tarea y obligacion ta di controla maneho di nan propio gobierno.

E tres fraccionnan aki despues di a huramenta como miembronan di Parlamento, a priminti pueblo cu nan lo bay ta masha transparente, lo defende interes di pueblo y interes di e pais na prome luga, y a sigura pueblo cu un era nobo a inicia pa e pais.

Parlamentario di fraccion di oposicion di AVP, sr Michael Lampe ta mustra cu despues di casi un aña den funcion, mas cu nunca pueblo ta sinti cu e pais tin un ‘stempel parlament’ cu ta haci loke gobierno ta bisa y dor di esaki pueblo por mira cu nan interes no ta wordo bon sirbi den parlamento pa nan representantenan.

“Nos tin cu bisa esaki, ya cu loke ta tumando luga pa casi un aña caba, ta cu e tres fraccionnan ta sirbiendo interes di nan gobierno prome cu tur cos, lagando interes di pueblo un banda loke ta pone cu gabinete Wever Croes practicamente ta defini tur loke tin cu pasa cu e representantenan aki.

Pueblo ya a mira con su interes a wordo neglisha por completo den e decision di gobierno pa bay cobra pa recogemente di sushi y siman pasa un biaha mas pueblo a constata cu actualmente e tres fraccionnan, esta 12 miembro, ta den servicio di gobierno.

Nan a confirma cu nan ta representantenan di gobierno y no representantenan di pueblo para pa pueblo relaciona cu e rapport di e segundo kwartaal emiti pa Banco Central riba e desaroyo comercial y e crisis cu tin actualmente y cu nan ta kere lo bira pio den lunanan nos dilanti.

Tur miembro di parlamento a ricibi of ta na altura di contenido di e preocupacionnan di Banco Central y di tur loke ta pasando y con e institucion aki ta mustrando cu e sector comercial ta pasando den tempo dificil y cu e poder di compra di nos hendenan, a conoce reduccion formal den di dos kwartaal aki.

Sinembargo ora cu nos a spera cu e tres fraccionnan aki lo ‘step up’ den nomber di pueblo  y busca un splicacion di parti di gobierno, nan a bay dedica nan mes na atende cu observacionnan haci di parti di lider di partido AVP, sr Mike Eman y otro miembronan di fraccion di AVP.

Pues no tabatin pregunta na direccion di gobierno, no tabatin ningun preocupacion formula di nan parti pa e conclusion di e rapport di Banco Central pero solamente a cuestiona observacionnan haci pa miembronan di partido AVP riba e rapport aki.

Claramente aki pueblo a bolbe haya confirmacion cu 12 miembro di Parlamento cu ta sostene gobierno, no tin interes di pueblo na pecho y nan a sigui riba mesun rumbo cu nan ta hibando pa casi un aña caba, esta di vota pro tur loke gobierno dicidi di haci.

Sea cu esaki ta na interes di pueblo, sea cu esaki ta perhudicando nos hendenan, sea cu esaki ta rancando placa for di cartera di tur ciudadano riba e isla aki of sea e falta di un maneho pa proteha comunidad contra e aumento di criminalidad cu tin actualmente.

 

E tres fraccionnan a sostena e decision di gabinete Wever Croes pa introduci aumento di BBO y BAZV, aumento di prijs di gasolin, cobramento pa recogemento di sushi y awor e decision di gobierno pa duna permiso pa construccion di otro hotel, apesar cu mesun fracconnan aki a sotene na april ultimo, e pensamento pa un moratorium pa construccion di mas camber di hotel cu no ta San Nicolas.

Awor cu no ta partido AVP pero Banco Central a emiti su rapport riba di dos kwartaal di e desaroyo economico, e reduccion formal den poder di compra di ciudadanonan, e lider di fraccion mas grandi y su fraccion ta haci di nan tarea pa opone tur loke cualkier miembro di fraccion di AVP bisa riba e rapport aki y tambe loke lider di AVP, Mike Eman a trece dilanti.
No a haci un invitacion na Banco Central pa bin Parlamento y duna un splicacion y mas informacion riba e sondeo cu nan a haci, no a invita gobierno bin Parlamento pa splica e desaroyo cu a wordo señala pa Banco Central, pero miembronan di Parlamento cu ta sostene gobierno, ta ser uza pa gobierno pa hunga weganan politico contra fraccion di AVP den oposicion.

Prioridadnan completamente robes  y cu ta bolbe confirma cu nan ta sostene e pensamento di gabinete Wever Croes, pa no cumpli cu promesanan haci na pueblo, no cumpli cu reduccion di awa y coriente, reduccion di prijs di gasolin, reduccion di edad di pensioen, aumento di salario minimo, solucion pa e crisis social cu tanto e gobierno aki a promove y claramente pueblo a wordo poni un banda dor di gobierno y tambe pa e tres fraccionnan den parlamento,” Parlamentario Michael Lampe a trece dilanti.