Ayera mainta para dilanti di Colegio San Nicolas, miembro di fraccion di AVP, sr Arthur Dowers a mustra cu tin un preocupacion y incertidumbre grandi bibando cerca mayornan rond Aruba pa loke ta futuro educacion di nan yiunan, mirando desaroyonan cu ta tumando luga a base di maneho di Minister Rudy Lampe.
“Sin duda tin un precupacion grandi pa loke ta enseñansa en general ya cu tin incertidumbre pa loke futuro di enseñansa publico y ora cu Rudy Lampe a bira minister di enseñansa, mesora el a presenta un plan caminda e lo bay privatisa tur scol publico.
E lo bay entrega scolnan publico den man di un grupo di amigonan di dje y e tempo ey caba fraccion di AVP a denuncia esaki, caminda e grupo aki lo haya tur cos di bisa riba kico ta biba y kico ta pasa den scolnan publico.
E tempo ey caba AVP a mustra cu nos no kier mira e cos aki pasa pa motibo cu gobierno tin un obligacion pa percura pa hendenan por drenta den enseñansa y e unico manera cu por garantisa esaki, ta si gobierno mes tin e scolnan bou di su maneho control.
Ya caba nos a mira ha hopi ocasion y mi persona tempo cu mi tabata minister di enseñansa, ta cu na scolnan priva dado momento un mucha haci un cos cu nan no gusta, nan ta saca e mucha aki for di e scol y pone riba caya.
Nos a conoce varios caso caminda cu muchanan a wordo poni literalmente riba caya of ta bin bisa cu e klas solamente por tuma tanto mucha y no ta tuma ningun mucha mas, lagando e mucha sin scol pa bay.
E tempo ey como cu gobierno mes tabatin otro scolnan, nos a percura pa e muchanan aki por a drenta scol y garantisa asina cu nan por sigui un estudio.
Nos a mira un scol Colegio Arubano cu den pasado a bay den un decadencia pasobra e fundacion cu tabata maneha esaki, a bisa cu nan no kier e scol aki mas y mesora nos a bay over na tuma como scol publico pa asna no mira e scol aki caba na nada.
Di e forma aki pa garantisa cu ta sigura e scol aki pa studiantenan di San Nicolas y rond Aruba, nos a bisa e tempo ey cu no solamente gobierno ta tuma e scol aki over pero na mes momento percura pa un estudio di HAVO por wordo logra completo na San Nicolas.
E decision ey a cay den masha bon tera den pueblo di San Nicolas y nos tabata cotento di a mira cu e scol aki a duna resultado.
Tambe a bin un cambio den e situacion caminda antes no por a haci e trayecto completo y pa un parti mester a bay na Colegio na Oranjestad, pero nos a bin cu e parti ey tambe na Sa Nicolas, caminda hopi mucha a haya tog e oportunidad pa ricibi y gosa di un bon enseñansa.
Nos conoce hopi hoben cu a sigui e scol aki y tabata exitoso den nan estudio mas halto den exterior despues.
Awor ta mustra cu tin un plan cu e scol aki ta bay cay bou di un stichting anto nos ta puntra nos mes con por ta posibel c’un scol publico, siendo cu Parlamento den su totalidad a bisa minister Lampe cu lo no bay di acuerdo cu su plan di pasa tur scol publico varios stichting, sea di su amigonan of otronan existente.
Awor tras di lomba di Parlamento Minister Lampe ta dicidi cu e lo bay haci esaki tog loke ta bolbe mustra cu e minister aki ta un mucha chikito cu tin un caha di mangel y ora cu a bisa su mama cu e kier bende e caha di mangel aki y e mama bise cu e no mag, e mucha ta bira bende cada mangel los y laga e caha bashi para y despues hunga pa kens.
Minister aki ta un persona bon studia y si e kier hunga pa kens y tuma Parlamento haci, mi ta spera cu e miembronan di Parlamento di e tempo aya cu a mustra curashi pa firma e mocion pa para e plan di Minister Lampe, pa nan tin mesun curashi awe pa scoge pa futuro di e pais aki.
Pa scoge pa bienestar di muchanan vulnerabel, pa scoge pa muchanan di risico, ya cu hopi bes muchanan cu ta wordo saca for di scolnan priva, ta muchanan cu ta core cierto risico.
Ta muchanan cu no a haya kisas e miho formacion y dor di esaki tin ora ta comporta nan mes no den e forma mas miho pero a wordo comproba cu ora mantene e muchanana ki den enseñansa, tog ta logra pa nan bay dilanti den bida,” Parlamentario Arthur Dowers a declara.
