Ta mas importante keda den gobierno cu para pa bienestar di enseñansa

 In AVP

Diamars anochi pueblo di Aruba un biaha mas a bolbe wordo recorda cu interes general di e pais, no ta primordial pa Gabinete Wever Croes y ta tristo pa pueblo realisa cu e fraccion di MEP ta prefera di mantene nan partido den gobierno, cu nan Sali na vanguardia di enseñansa di nos muchanan.

Miembro di fraccion di AVP, sr Arthur Dowers a enfatisa c’un biaha mas ta Sali na cla cu gabinete Wever Croes no tey  pa sirbi pueblo y cu e hende nunca ta central den e maneho di e gobierno aki, caminda ni grito di ayudo di gruponan den comunidad, no ta wordo atendi cu seriedad necesario.

“Diamars por fin Presidente di Parlamento a yama un reunion publico pa Minister di Enseñansa duna cuenta na parlamento, riba e maneho descabeya cu e ta hibando, caminda hasta sindicatonan di maestronan, a organisa un tipo di manifestacion contra su forma di procede.

For di eynan caba pueblo por a tuma nota cu fraccion di MEP bou di guia di Prome Minister Evelyn Wever Croes, a laba man total for di e problema den enseñansa entre maestronan di scol y maneho di Minister Lampe, dor di bisa e maestronan pa nan bay papia cu e minister.

Esaki ta mesun Prome Minister cu cinco luna atras a dicidi di yama e mesun minister aki ‘op het matje’ pa cambia su maneho ya cu tin hopi resistencia den e mundo di enseñansanan pa e cambionan cu Lampe kier a introduci.

Di repiente Evelyn no tin e poder mas pa yama  Minister Lampe dilanti y bisa stop di malogra enseñansa di nos pais y diamars pueblo por a mira con fraccion di MEP den Parlamento, a sigui ehempel di nan Prome Minister y tur a laba man manera Pontius Pilatus.

Aki ta bon pa recorda pueblo cu diamars anochi cantidad di miembronan di fraccion di MEP, cu algun luna atras a aproba un mocion pa Minister Lampe suspende tur e cambionan cu e kier introduci den enseñansa, ya cu esakinan no tabata na interes di educacion di nos mucha- y hobennan.

Increibel con diamars anochi e mesun parlamentarionan aki di MEP, kendenan a dirigi cantidad di pregunta na e Minister ya cu su maneho no ta mucho cla y sigur, ta bira na fabor di e maneho di Minister Lampe, un maneho cu nan mes a cuestiona varios luna atras.

Aki pueblo tin cu compronde cu e motivacion mas grandi pa  awor di repiente sostene algo cu nan mas a desaproba algun luna atras, tin di haber totalmente cu pa MEP ta mas importante pa nan keda den gobierno, cu crea un crisis caminda futuro di gabinete Wever Croes lo a core peliger.

Cu otro palabra 9 parlamentario di fraccion di MEP a opta pa nan propio interes, a opta pa sirbi interesnan aheno pa e interes di pueblo y un biaha mas e interes di famia, amigo y sponsornan, a wordo poni na prome luga.

Enseñansa no ta importante pa fraccion di MEP, solamente e interes partidista ta riba tur cos pero ta studiantenan cu nan mayornan den futuro, lo tin cu deal cu e falta di seriedad y capacidad aki, di algun hende cu a demostra cu nan no tin curashi pa para pa pueblo.

Un partido di Minister Lampe, cu tin un solo asiento, a demostra diamars anochi cu ta aki na Aruba so un asiento ta conta mas cu 8 asiento cu e fraccion di MEP tin den parlamento y maestronan por a ripara cu nan obhecion no tin balor y cu nan a bati na porta di un gobierno cu nunda ta na cas pa interes di pueblo,” Parlamentariop Arthur Dowers a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search