Ta imperativo pa pone calidad y acesibilidad di centro di cuido di muchanan y hobenan mas halto ariba agenda

 In AVP

Segun sra Arends-Reyes e calidad y acesibilidad di opvang of centro di cuido di muchanan y hobenan mester keda halto ariba agenda. Na momento cu pais Aruba conose 1 di cada 5 cas cu ta cai bou di e categoria cu ta pasando pobresa, ambos mayor ta traha, na momento cu Aruba conose 24 caso di un of otro tipo di abuso di mucha pa luna y 150 caso di abuso domestico pa luna! Y tin 18 miyon pa aña disponibel pa yuda combati entre otro e tematicanan y ta solamente 3 di e 31 projectonan ta mustrando avanse significante y majoria di e fondo no ta yega su destinacion nos tin un problema serio. Aruba conose ley di 2017 cu ta na beneficio di e bienestar y proteccion di nos muchanan cu ainda no por bin na vigor pa motibo cu no kier apunta un inspector, tin planan nobo, fondonan disponibel pa ehecuta planan y projectonan na beneficio di nos muchanan y ta tuma nota cu por ehempel di 156 mil florin disponibel ta 38 mil florin so ta wordo uza pa promocion y viahe solamente pa por ehempel projecto manera Opvoedvisie, projecto di mester haña subsidio manera voor en naschoolse opvang ta den cora, no ta yegando na e fondonan. Si tin asina hopi melding y necesidad pa e tema di kindermishandeling dikon nan no ta yegando na e fondonan.

E uitputting di e fondonan aki no ta bayendo bon, y tume como un critica constructivo pa e gobierno aki, mester bai wak di serca dikon e fondonan no ta yegando na e destinacionan, si nos ta den un crisis manera cu e situacion ta mustra, no por sigui presenta Parlamento cu cifranan y tabelnan insuficiente asina, mester tuma mas accion. No ta sra Arends-Reyes ta bisa, ta e resultadonan ta papia pa nan mes, tin demasiado proyecto cu no ta yegando na nan fondo y den e tempo cu ta transcuri e situacionan no ta wordo alivia.

Ta comproba cu si no inverti den ‘early childhood development’ y aplica ‘early childhood intervention’, pa ora cu kier bai hasi diferencia den bida di hobenan y adulto ta un trabou cu di chikito mester a cuminsa cun’e. Mas muchanan y hobenan riba caya sin nada di hasi ta busca otro cos di hasi cu hopi biaha ta termina ta un problema pa nan mes, famia y sociedad. Cuminsando pa aceso di Enseñansa, proteccion, cuido di calidad, aceso pa programanan despues di orario di skol, no cu e lista di espera ta bira 2 aña pa ora bo yega na beurt, casi cu no mester mas.

Di edad crucial di 1 pa 5 aña muchanan mester di hopi nutricion, cuminda cu ta aporta na nutritientenan y vitamina, manera cu costo di bida a subi na Aruba cu 18% pa alimentacion, fruta y berdura a bira un luho pa famianan na Aruba. Mester sigui busca un solucion pa trece fruta y berdura di calidad y prijs rasonabel pa Aruba.

No mester bagatalisa e importancia di nutricion pa nos comunidad, e aspecto preventivo di asina hopi malesa. Si introduci un sugar tax ainda e productonan aki ta keda mas barata cu fruta, berdura y proteina pues mas liher lo mester recuri na nan. Si muchanan mester biba den un cas cu tin hopi discordia pa motibo cu mayornan mester traha y tin hopi violencia domestico y no tin pas na cas y tin influencia grandi ariba nan bienestar psycho-emocional, skolnan mester ta e lugar cu ta brinda nan e seguridad, guia y apoyo cu nan mester.

Trahador nan social na scolnan, segun e raportahe di gastonan nan fondonan ta disponibel ainda practicamente intacto, esaki no por. Hopi di e proyectonan of fundacionan cu ta den e Sociaal Crisis Plan no ta nobo, tur tawata cai bou di un departamento di gobierno y tawata haña nan fondonan.

Awor tin mas rekisito pa yega na e fondonan y por conclui cu e ta bayendo den un ‘slow pace’ y lo mester averigua wak ta con por acelera e proceso pa no perde e meta final for di bista. Crèchenan mester un inspector, tin fondo disponibel pa bureau leerplicht, Traimerdia mester continua y mester conose ampliacion.

Nos Atardi cu ta un programa despues di skol pa alumnonan di scolnan secundario tambe tin necesidad pa continuacion y ampliacion. E inversion den nos muchanan y hobenan ta uno valioso no ban perde e oportunidad di tin e fondonan disponibel y pa e no yega su destinacion. Tin suficiente departamento y experto cu sa con pa pone e fondonan aki na bon uzo y lo mester evalua si e forma cu ta presentando nan ta efectivo y sostenibel pa den futuro cu ta un pregunta legitimo cu den e mesun raportahe di e plan ta meciona y subraya sra Arends-Reyes ta termina bisando.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search