fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Supervision financiero prolonga pa henter e termino di gobernacion

Siman pasa dia 14 di juni, gobierno di Aruba a haya su mes dilanti di dos ‘deadline’ riba tereno financiero. E prome deadline tabata entrega  un cambio den e ley di presupuesto 2018 di acuerdo cu e ultimo conseho di CAFT y e di dos deadline tabata e acuerdo cu Hulanda caminda gobierno mester a entrega un cuadro financiero nobo ya cu e prome no tabata cumpli cu rekisitonan, Parlamentario pa fraccion di AVP, Richard Arends a declara.

 

“CAFT ta instrui gobierno pa cambia e presupuesto riba mesun puntonan cu nos tambe a trece dilanti durante tratamento di e ley di presupuesto 2018. En bes di sigui e conseho aki, gobierno a  opta pa duna CAFT un contesta di un solo pagina hibando un bay y bin di argumento cuestionando e conseho di CAFT. Awor mester warda wak  e proximo accion di  CAFT pa loke ta trata e ponencianan cu nan a trece dilanti.

 

E di dos deadline cu gobierno tabata confronta tabata e acuerdo nobo cu Hulanda riba e cuadro financiero. Den mesun carta aki Gobierno a informa CAFT cu nan lo a manda e cuadro financiero nobo pa Hulanda e siman aki. Ainda e reaccion di Hulanda no ta conoci y ainda nos no tin un bista cla kico ta e normanan nobo pa loke ta trata e cuadro financiero nobo y e añanan nos dilanti.

 

Nos por a comrpond’e tambe cu e cuenta anual di pais Aruba, tin un luna di retraso ya cu en bes di entrega esaki na Rekenkamer dia prome di juni lo entrega esaki dia prome di juli. Como rason pa e tardanza minister ta duna e situacion financiero. Sinembargo no por compronde aki e relacion pa cualkier situacion financiero cu por ta y entrega di un cuenta anual. Esaki ta demostra un biaha mas e falta di conocemento di e materia. Si bo no tin conocemento di e materia bo ta haya caos tur caminda y esaki nos por wak cu poco poco ta wordo confirma tambe, no solamente dos di nos cu fraccion di AVP den oposicion, pero tambe otro instancianan ta confirma esaki segun informacion cu nos ta ricibi. Esaki ta despues di a hiba un campaña caminda a prominti e votado di tin conocemento di e materia y logra e normanan sin medida.

 

Un cos ta sigur: CAFT lo wordo prolonga pa tres aña mas pues over di henter e termino di gobernacion di e gobierno actual. Cu esaki Hulanda no a mustra ningun confiansa riba tereno financiero, manera cu a pretende. Segun e palabracionnan anterior, na aña 2018 CAFT mester a habri luga pa un ‘begrotingskamer’. Esaki no ta algo nobo, ni tampoco un plan di e gobierno actual. E ta segun e ley cu ta institui e supervision financiero temporal di aña 2015 pa cual ya caba a haci e trabounan preparativo.

 

E hecho cu CAFT ta wordo prolonga over di e periodo gabinete actual no tin e confiansa cu tanto nan ta busca na Hulanda,”  Parlamentario Richard Arends a trece dilanti.