Rocco Tjon ta bolbe doblega pa interes di partido y no ta atende interes di pueblo

 In AVP

Despues di un fin di siman cu desaroyonan no mucho positivo relaciona cu maneho di Minister di Husticia, a spera cu miembronan di Parlamento cu tin e tarea di controla y coregi maneho di gobierno, lo a reacciona riba decisionnan cu e titular di husticia a tuma ora cu el a pone dos preso den libertad condicional.

Den un comunicado di prensa di  fraccion di AVP, ta mustra cu na momento cu representantenan di pueblo lo Sali dilanti y atende interes general di pueblo como representantenan di pueblo, lider di fraccion di MEP, Rocco Tjon ta dicidi di  purba desvia atencion di e disgusto cu ta lantando den pueblo.

“Fraccion di AVP a tuma nota den medionan di comunicacion cu na luga cu a spera e lider di fraccion di MEP bin dilanti y splica e posicion cu su fraccion a of lo tuma relaciona cu e erornan cometi pa Minister di Husticia Bikker, el a papia riba husticia cu mas bien ta forma parti di e propaganda politico di su partido.

Ta dificil pa splica con un lider di fraccion ta dicidi di mustra su disgusto cu autoridadnan Hulandes cu lo no a duna nan cooperacion ainda pa sostene un plan politico di fraccion di MEP, na luga cu e duna atencion na decisionnan di Minister Bikker cu a pone dos preso culpabel di a comete acto di pedofiel, den libertad condicional.

Un tema cu pa mas c’un aña caba ta bibando den pueblo cu ta luchando pa para abuso sexual di muchanan menor di edad y caminda a organisa marcha pa pidi gobierno y parlamento pa bin cu cambionan di ley pa aumenta castigo pa esunnan cu ta haci nan mes culpabel na e abusonan aki.

A spera cu e lider di fraccion di MEP lo a atende e asunto aki como su tema principal den conferencia di prensa di su fraccion dialuna mainta, pero mas tanto sr Tjon a dicidi di presta su mes pa desvia atencion di pueblo for di esaki, cu otro intento di propaganda politico den cual e mes ta contradeci su mes.

Ni un solo intento pa trankilisa e inkietud den pueblo cu su fraccion cu ta sostene gobierno, lo dirigi un carta na Presidente di Parlamento pa pidi Minister Bikker bin Parlamento pa aclaria loke el a haci y con esaki por tabata posibel.

Tampoco e lider di fraccion geel a menciona na cierto momento e caso di un grupo di ilegalnan cu a wordo descubri na un negoshi trahando sin permiso y caminda ta ser mustra cu e Minister lo a envolvi su mes den henter e situacion aki.

Como representante di pueblo den Parlamento, ta spera mas di sr Tjon y su fraccion, sigur ora cu su fraccion tambe a forma parti di e manifestacion cu a tuma luga na 2017 riba e topico di casonan di abuso sexual contra muchanan menor di edad.

Fraccion di MEP a sinta den reunion cu dos comision cu a bin duna nan punto di bista riba e tipo di casonan aki, un comision den cual tabatin hendenan cu nan criaturanan a wordo expone na e tipo di abusonan aki y e fraccion geel a sostene e grupo aki.

Awor ta como sifuera e lider di fraccion nunca tabata na altura di e posicion cu su propio partido a tuma y cu ta wordo viola awor pa un Minister di Husticia cu e fraccion aki ta sostene.

Aki ta bolbe keda confirma cu pa e gobierno actual loke mas ta importante desde cu nan a sinta, ta sirbi interes propio, interes di e partidonan politico envolvi, interes di famia- y amigonan y tambe di sostenedonan y sponsor, pero ora cu yega cu mester sirbi interes di pueblo, no tin interes pa haci esaki.

Esaki a sosode na momento cu a castiga pueblo den forma sin piedad c’un pakete di medida cu a afecta bida di tur hende, mesun cos cu e desaroyo rond di mudamento di Serlimar pa Pos Chikito caminda e lider di fraccion di MEP a doblega pa presion y a laga interes di pueblo cay.

E momento a yega pa Rocco Tjon cuminsa atende interes di pueblo y no interes di su partido cu ta mustra decisivo pa para pa interesnan di partido y no pa interes di pueblo,” e comunicado di fraccion di AVP ta señala.

 

 

 

 

 

 

 

 

 

 

Durante rueda di prensa, lider di fraccion di MEP, sr. Rocco Tjon MBA, ta elabora riba e onderzoeksrapport cu a ser entrega na Ministerio Publico februari 2018.

UPDATE MINISTERIO PUBLICO

16 di augustus fraccion di MEP a entrega informacion adicional y nobo na Ministerio Publico. E informacion aki tin di haber cu e onderzoeksrapport cu a wordo entrega na februari, den cual acto nan di corupcion door di gabinete anterior ta wordo señala y substancia.

 

 

Fiscal Mayor a duna di conoce cu tin un plan con pa atende cu e caso aki cla. Sinembargo no por a cuminsa cu e investigacion ainda door cu ta warda riba extra personal y experticio di Hulanda.

PROCESO HUDICIAL

Tur informacion cu drenta cerca husticia mester wordo valida. Esaki ta sosode atraves di un  asina yama “pre-weeg” documento. Un comicion hudicial na su turno ta dicidi e ora pa traha un “projectvoorstel”. Atraves di e projectvoorstel aki ta dicidi si por prueba e sospecho y con real e chens aki ta. A base di esaki ta dicidi cua unidad ta bay investiga e caso y dicho unidad ta traha un plan.

Ministerio Publico a confirma nos cu e plan aki ta cla. Nos ta conclui e ora cu ta confirma cu e sospecho entrega ta real y por wordo prueba tambe. Unico cos cu falta ta e asistencia di personal y experticio pa por cuminsa investiga.

PREGUNTA NA MINISTER DI HUSTUCIA

Lider di fraccion di MEP a mustra prensa e preguntanan cu a wordo haci na sr. mr. A.Bikker por escrito. Ta incomprendibel cu ya lunas atras Hulanda a aproba peticion di e mandatario pa asistencia pero no kier asisti Aruba aworaki pa por atende cu e caso aki.

Ta importante pa sa e motibo tras di esaki y ki momento lo ehecuta e desicion aproba door di e Minister di Husticia Hulandes anterior.

FINALISANDO

Ta parce como si fuera Hulanda kier impedi e investigacion pa tuma lugar. En espera di contesta riba e preguntanan haci, sr.Tjon lo evalua si ta manda e onderzoeksrapport por completo pa miembronan di Tweede Kamer. Asina nan por haci pregunta tambe na nan mandatario pa haya sa e motibo pakico kier impedi un pais den Reino pa investiga casonan di corupcion.

 

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search