fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Robert Candelaria na Cuerpo Policial: Bon trabou!

Siendo un ex Alto Inspector di Polis, encarga cu entre otro maneho di Polisnan investigativo (recherche), awe asina cu a tende di e atraco arma na Noord y cu e actuacion rapido di Polis, e miembro di Parlamento di AVP, Robert Candelaria, a opta pa pasa bishita Warda di Polis pa personalmente e felicita e Polisnan cu nan trabou. Claro e ta consciente cu ta diferente departamento di Polis ta envolvi ma momento di un accion asina, pero e kier pa nan tur sa cu e ta hopi orguyoso di nan. “Mi no por gaña, ora mi tende cosnan asina pasa, mi ta sinti manera un responsabilidad pa mi subi caya mesora. Cada bes mi mester corda mi mes cu mi no ta Polis mas, sino Parlamentario. Pero mi kier pa mi ex coleganan sa cu mi ta biba cada un di e momentonan ey cu nan, tanto esunnan bon como esunnan menos bon”, asina e Parlamentario a bisa na Warda di Polis na Shaba.

“Claro cu mi ta consciente cu no tin espacio pa politica den trabou di husticia. Pero un schouderklop pa Polisnan cu ta sali tur dia for di nan cas, laga nan famia tras, pa risca nan bida pa nos, nunca no ta di mas”.

E Polisnan a aprecia e bishita masha, compaña pa e palabranan di sosten y motivacion. E Parlamentario no a bay den detaye di e caso mes, pasobra esey ta competencia di Ministerio Publico. Su intencion mas bien ta pa mustra un sosten na e Polisnan cu den un rato di ora, dor di patruya di forma strategico y coordina, a topa cu e auto sospechoso y a logra gara e posibel sospechosonan envolvi den un atraco brutal cu a caba di tuma luga den e districto di Noord.

E comision di Husticia den Parlamento ta preocupa cu e aumento den criminalidad riba nos isla. Di un banda e tin di haber cu un aumento den cantidad di ilegalnan riba nos isla, pero tambe cu nos mesun hendenan cu lamentablemente sa tuma e caminda di mas facil pa yega na placa. Pesey a base regular e Parlamentario ta reuni cu Minister di Husticia pa aporta cu ideanan creativo pa por formula un maneho mas coherente cu miho resultado. Esey ta rekeri poco mas cu djis auto nobo pa Polisnan. E tin di haber cu leynan bon hinca den otro pa duna Polis e autoridad necesario, material moderno pa por conduci investigacionnan di forma mas profesional y eficiente, banda di suficiente Polis bon prepara pa por conduci e tipo di investigacionnan complica asina.

E miembro di Parlamento a keda masha contento di tende cu comunidad ta aportando enormemente na investigacionnan policial ultimo añanan, den cual ta yama duna tip, anonimo, pa yuda Polisnan soluciona casonan mas lihe. Cada informacion ta yuda y por kita un criminal mas for di caminda cu kisas lo a horta Bo mes despues. Ta tuma henter un comunidad pa hunto nos percura pa mas siguridad riba nos isla.

“Forsa. Aruba ta orguyoso di Boso”, asina e Parlamentario a bisa na salida di su encuentro cu e Polisnan na Warda di Polis di Noord awenochi. El a bisa cu su admiracion tur dia ta crece mas pa su ex coleganan, cu aunke tin recursonan limita, falta di inversion continuo den reclutacion y ekiponan moderno, toch ta traha oranan largo, di dia y anochi, pa gara e sospechosonan aki.

E ta lamenta cu den e presupuesto pa aña 2019 Minister di Husticia a corta pisa den fondonan aloca pa husticia. Sinembargo despues di critica, el a haci algun cambio pa aloca mas fondo, aunke menos di loke ta custumber. A corta specialmente den overtime y inversion. Tambe e post di reclutacion a resulta menos, pa cual e klas di Polis cu lo cuminsa proximamente ta menos cu den pasado. “Pesey mi ta subraya, cu poco recurso cu Polisnan tin, toch nan ta logra hopi”.

Riba e foto por aprecia Parlamentario Robert Candelaria saliendo for di Warda di Polis Shaba, den combersacion cu Chef van Dienst, Sub Inspector Arie Murray.