Robert Candelaria: Hunto nos por percura pa un miho rumbo pa Aruba

 In AVP

Awe nos ta para na final di aña y ta mira bek riba un aña cu tabata sumamente dificil, cu hopi reto pa nos pueblo, segun parlamentario Robert Candelaria di fraccion di AVP.  Tabata un aña di sacrificio cu mester a comparti cu otro y tene compasion cu otro. Pero nos mester para keto tambe na algo extra e aña aki cu wak bek, refleha riba 2020 pa loke ta husticia. Con a bay cu nos husticia e aña tras di lomba.

A mira diferente cos cu ohala cu por tabata tin cos bon pa bisa tambe, pero apenas tin eseynan lamentablemente, si no tabata pa e trabou duro di esnan den field, nos frontliners pa wanta husticia su cabes riba awa. 

A mira cu den 2020 entre otro un gran parti di autonomia di nos husticia, a keda entrega na madre patria. Esey ta nifica cu awor aki no ta voz di pueblo ta e ultimo voz mas den husticia, ni den economia ni finansas. Pero awor aki ta e voz di COHO.

Ta pesey partido AVP ta bezig cu su preparacion, papiando cu gremionan, pa asina percura pa pronto, ora cu pueblo un biaha mas por eligi su gobierno di nobo, pa AVP ta cla y prepara pa esaki, con pa percura pa voz di pueblo ta e ultimo voz. Con pa percura toch cu no ta COHO, pero ta pueblo ta bisa kico nan kier y kico nan no kier.

Kico por a mira e aña aki cu excepcion di entrega di autonomia hudicial? Por a mira por ehempel cu un aña mas a cera, e di  tres aña di e gobierno aki y nada ainda di e ley di seis minuut contra abuso di mucha.

Ta mira cu gobierno cu na momento cu el a drenta, a sinta, a bisa cu nan lo kier legalisa cannabis medicinal, cu nunca tabata nan intencion real. E intencion tabata pa legalisa e plantacion. Legalisa e parti ey di esaki y hasta yam’e un pilar economico.

Na mes momento hendenan cu ta den adiccio di droga, hendenan cu ta sufri pa motibo di droga, no ta hayando yudansa. E mesun gobierno aki cu a bisa cu ser humano ta central, a corta salario di esnan cu ta traha y yuda hendenan cu ta den adiccion.

A mira awor aki kico realmente tabata e gobierno su idea. No tabata pa para contra e problema di droga, pero hustamente pa legalisa.

Por a mira den brandweer, polis y otro departamentonan cu ta haciendo apelacion tras di apelacion pa materialnan basico, pa nan traha cu ne. Den Brandweer tankinan pa oxigeno, e uniformnan special. Den polis, nan ta pidiendo material pa esnan cu ta cuida nos frontera. Pa bijstandsteam, nada di eseynan ainda. 

Tambe por mira cu e minister aki ta schors empleadonan den husticia, links y rechts. Diferente di nan mester a pone nan bek na trabao pasobra no tabata tin base pa esaki. Ta nombra hendenan den funcionnan halto pa bay cuida refineria, siendo cu tin cosnan real, cosnan di peso cu no ta pak aan.

Nos a mira cu Hulanda pone fondonan disponibel pa gobierno por a tackle e problema cu e hendenan cu ta bin nos pais di un forma ilegal for di Venezuela. E prome cos cu a haci ta, cumpra container bieu, hinca nan den e luga na Huis van Bewaring. Containernan cu tabata den hopi mal estado, drechanan cual a costa mas placa. Fuera di esey costa placa pa cuminda, utilidadnan y siguridad siendo cu awor numa a haci loke mester a haci for di prome dia.

Mester a inverti den deporta e hendenan cu ta kedando nos pais ilegal. Mester a haci uzo di loke minister a priminti, di tecnologia pa por sigui e hendenan aki pa asina no costa gobierno extra placa cu den e temponan aki no tin. 

Nos a cuestiona ta dicon a scoge pa cumpra containernan bieu y inverti tanto placa asina den nan. Tur biaha a mira cu ta decision y prioridadnan robez, un tras di otro.  Por a mira cu tabata tin asina un bunita proyecto pa yuda esnan cu ta core auto sin seguro enfrenta husticia.

Minister a mishi cu esaki, tuma e proyecto over y esaki a muri. Haciendo esaki imposibel atrobe pa polis por treed contra esnan cu ta core auto sin seguro.

Prome cu aña cera, minister ta cambia su maneho di stranheria un biaha mas, haciendo cu hendenan cu tin cinco permiso of menos casi imposibel cu nan por keda aki siendo cu nan a inverti den nos pais, nan a integra den nos pais. Awor aki cu un chens grandi cu nan mester bay bek.

Asina ta mira con tur biaha cu cosnan ta keda tuma luga den husticia den 2020, cu a pensa cu no tabata necesario y ta sumamente lamentabel. Toch tin speransa pasobra sa cu pronto pueblo un biaha mas por scoge su gobierno. Partido AVP, Mike Eman, e team ta bezig ta scuchando gremionan, preparando su mes pa asina pronto pueblo por haya un gobierno cu si tey pa e pueblo, cu si sa con pa traha cu Hulanda, cu si sa con pa yega na solucionnan real, cu ta nifica un paz y un trankilidad y un siguridad pa pueblo di Aruba.

Pesey no perde speransa, keda positivo y warda un rato. Pronto lo celebra Pasco y Aña Nobo y aunke e gobierno a haci’e sumamente dificil pa e siguiente gobierno, pero sea positivo y sa cu hunto lo por percura pa un miho rumbo pa nos pais Aruba.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search