Prome Minister a sigura cu ‘aanwijzing’ ta pa motibo di ley di LAFT y crisisplan

 In AVP

Incapacidad den maneho di e pais tabata bisto for di prome dia cu Gabinete Wever Croes a huramenta y casi dos aña despues, e situacion aki no a cambia ya cu te ainda no tin un vision fiho di kico e gobierno aki kier logra caminda nan mes no sa e caminda cu nan tin cu cana.

Miembro di partido AVP, Melvin Tromp  a mustra cu pa falta di vision y un abundancia na incapacidad di tanto gabinete Wever Croes como e tres fraccionnan cu ta sostene e gobierno aki, ta pone cu awe gobierno di Reino ya no ta tuma ningun ‘nonsens’ mas for di e hendenan aki.

“No ta cuestion cu AVP of Marlon Sneek ta bisa esaki pero siman pasa Prome Minister Evelyne Wever Croes a declara den conferencia di prensa cu el a duna, cu su gobierno a haya espacio pa atende dos punto importante, pa asina evita no uno, pero dos ‘aanwijzing’ prome cu fin di november proximo.

Den forma cla Evelyn a bisa pueblo cu tin dos ‘aanwijzing’ riba mesa di cual uno ta pa e cambionan haci na e ley di LAFT riba cual Evelyn y Xiomara a bay di acuerdo caba riba dje den protocol di oktober di 2018 mientras cu e otro ‘aanwijzing’ tin di haber cu e suma di placa poni un banda pa e crisisplan cu tin casi dos aña den formacion ainda.

E ultimo aki ta bon pa mustra cu e ta otro ehempel directo cu gobierno di Reino no ta confiando gabinete Wever Croes cu ningun fondo di miyones di florin pafo di presupuesto, caminda gobierno no ta dunando un bista cla ni na Parlamento y tampoco na CFT, kico ta haciendo cu e placa aki.

Simplemente no tin confiansa y ya caba CFT a yega di mustra cu tur cos ta mustra cu e fondo aki ta wordo usa pa tuma hende den servicio di gobierno loke no por ta e caso.

Pa loke ta e ‘aanwijzing’ pa e ley di LAFT, esey a bira claramente un joke di mal gusto di e propio Prome Minister Evelyn Wever Croes, kende na luna di oktober di 2018 hunto cu Minister Xiomara Ruiz Maduro a sigura gobierno di Reino cu lo bay expande e periodo di CFT aki na Aruba pa medio di e ley di LAFT.

Sinembargo durante tratamento di e ley algun parlamentario cu ta sostene e gobierno aki, a dicidi di introduci un amienda cambiando hop cos den e ley cu tanto gobierno di Reino como e dos Ministernan di Aruba a acorda,  creando un conflicto directo cu Hulanda.

Pa completa obra ta e propio Prome Minister kende a firma e protocol aki aña pasa, a sostene contenido di e cambionan propone den un amienda pa awor e mes saca e ley aproba for di circulacion y awor a bolbe priminti Hulanda cu lo bin cu e ley di LAFT den su contexti original.

Pues no tin aanwijzing ningun momento pa e situacion financiero cu tin, tampoco pa e debe grandi cu tanto MEP ta sigui insisti ariba, pero segun Prome Minister Evelyn Wever Croes tin dos aanwijzing pa falta di capacidad pa cumpli cu palabracionnan haci cu gobierno di Reino,” Melvin Tromp di partido AVP a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search