Preocupacion den pueblo pa Minister di Finansa atende cu 1.3 biyon

 In AVP

Despues di e renion publico di Parlamento caminda a trata presupuesto 2020, miembro di fraccion di AVP, sr Arthur Dowers a mustra cu nan fraccion a duna tur cooperacion pa e reunion por a cana den un forma organisa y ordena.

“Mas cu tur cos, nos  a coopera tambe pa  desvia di reglamentonan di ordo pa di e forma aki den un situacion caminda cu berdaderamente nos tin hopi hende den comunidad den un situacion dificil, cu e presupuesto aki por pasa pa asina garantisa entrada pa cierto hendenan.

Lamentablemente nos a bin constata cu gobierno a bin tuma bastante leve e situacion aki den e sentido cu  berdad tin un situacion di crisis pero bo no por pone reglanan basico di democracia un banda.

Un di e puntonan hopi importante den nos constitucion ta cu ora gobierno ta pasa un ley asina, e tin cu manda esaki pa Raad van Advies y tur otro ley di embergadura grandi y loke a pasa den e reunion di diamars, tabata un nota di cambio masha  grandi mes y gobierno no a duna un splicacion amplio di tur loke nan a tene cuenta cune pa loke ta reduccion di su gastonan.

Nos a wordo pidi pa sostene un ley caminda no tin indicacion cu gobierno ta bay atende seriamente cu reduccion di su gastonan y banda di esey gobierno ta pidi, sin duna un splicacion completo, di ta bay busca 1.3 biyon pa fia y cual ta un cos cu nos a bisa cu no ta algo pa haci den un solo biaha.

Nos a haya hopi reaccion y preocupacion tambe for di pueblo caminda ta ser mustra cu Xiomara Ruiz Maduro como Minister di Finansa no tin mucho conocemento di e materia aki  y ta su conseheronan ta pone tur cos riba papel pa su persona,  caminda tog a keda constata cu e Minister aki a yega di  presta mas placa cu tabatin mester.

Mirando e seriedad di e situacion actual hopi ta kere cu no por permiti Minister Ruiz Maduro comete mas blunder y pa e motibo aki tambe e deseo sigur sigur cu ta biba tanto den pueblo como den fraccion di AVP, pa den un forma mas  den fase y no den un solo tiro, busca un suma di 1.3 biyon florin.

Sinembargo gobierno logicamente ta sigui su caminda y esey a pone tambe cu fraccin di AVP no a sostene presupuesto 2020 sin mas den e pakete cu el a wordo presenta.

Partido AVP tambe kier a manda forsa pa henter nos comunidad y sigur tur esunnan cu ta labora den e sector di cuido medico y otro sectornan, tur cos bon y nos ta speras cu na momento cu  e crisis aki wordo supera, esaki lo resulta den un forma favorabel sigur si nos tur cumpli cu e stipulacionnan internacional pa reduci e riesgonan mas tanto posibel,” Parlamentrio Arthur Dowers a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search