Premier ta pidi CITGO bay anto retira tur trahador y Minister di Labor ta pretende di defende interes di trahadonan

 In AVP

Parlamentario di AVP, sr Mike de Meza a mustra cu gabinete Wever Croes lo bay den historia como e gobierno mas bruha cu pais Aruba a yega di conoce y na mes momento esun mas incapacita.

Segen de Meza ta trata aki di un set di gobernantenan cu no ta na altura kico e otro ta haci y tur cos ta mustra cu nan tur ta pa nan cuenta, ta haci loke cu nan kier y loke nan ta haya ta bon, sin tuma na consideracion loke nan otro coleganan ta haciendo.

“Ta fresco ainda den memoria di pueblo, con Prome Minister Evelyn Wever Croes na inicio di su periodo di gobernacion, a dirigi un carta na un oficina di abogado di famia, pa asina e oficina aki studia e contract cu tin cu CITGO cu pais Aruba, pa mira con kibra esaki.

Acerca tin cu agrega cu ‘by now’ tur hende sa cu Premier Evelyn ningun dia, ningun momento a haci un esfuerso ni chikito pa trata di logra cu e proyecto di reapertura di e refineria ta sigui pero al contrario el a nenga di sinta cu oficianan di e compania Mericano aki cu cede na Houston y a haci net nada pa sigura cupo di trabou di centenares di hende.

Den ultimo dianan di 2019, Prome Minister Wever Croes ta bay prensa y ta duna un declaracion caminda henter pueblo por a scucha con e ta dirigi su mes na e compania CITGO su oficialnan, cu lo ta miho pa Aruba si e compania aki bandona nos isla.

Cu otro palabra, dal refineria cera y baha na awa mescos cu e ex lider di MEP, sr Nelson Oduber tambe a haci den pasado cu Valero ora cu el a dirigi su mes na e CEO Bill Klessy, pa e coy e refineria di San Nicolas, pone riba su lomba e bay for di Aruba.

Awor historia ta ripiti cu otro lider di MEP, un partido cu tur ora cu nan ta den gobierno ta parce cu e refineria ta cera of e operador abondona Aruba, cu hendenan ta perde nan trabou y cu centenares di tata y mama di famia ta wordo manda cas sin trabou y sin entrada pa cria nan famia.

Sinembargo despues di e locura aki di Prome Minister Evelyn Wever Croes, dialuna ultimo pa presenta e Minister di Labor di su gabinete, sr Glenbert Croes, kende ta primo tambe di e Premier, kende a bin prensa pa brinda sosten moral na e trahadonan di CITGO, brindando tur ayudo cu e por duna na e trahadonan aki.

Loke ta riciculo y hasta hopi hipocrita di e declaracion di Minister Glenbert Croes, ta cu e ta bin dilanti sigura e trahadonan cu el a ordena Departamento di Labor, pa NO oficialisa e peticio di retiro di e trahadonan di CITGO  y cu e lo no haci esaki te ora cu tin claridad y cu e no lo laga ehecutivonan di CITGO bandona Aruba.

Ta kico ta pasando cu e hendenan aki, cu e gobernantenan di mas malo cu Aruba a yega di conoce, ya cu nos ta sigur cu Glenbert Croes no por ta asina inocente, cu e no ta compronde cu su Prome Minister y prima Evelyn Wever Croes, a pidi CITGO pa bay for di Aruba y retira tur trahador tambe.

Ta su prima a pidi e compania Mericano pa cera porta y manda tur hende cas, sin importa kico ta pasa cu e trahadonan aki ya cu ta imposibel pa kere cu e Minister di Labor no ta na altura cu su gobierno kier cera e refineria cu e mes a tuma credito y felicitacion di a logra su reapertura.

Gabinete Wever Croes ta parce un grupo di comediante, un grupo di hendenan cu no sa kico pa haci loke claramente tin como consecuencia cu pueblo ta sufri di nan incapacidad.

Ta mesun Glenbert Croes aki ora cu el a caba di huramenta como Minister di Labor, a bin dilanti y informa pueblo den un conferencia di prensa, cu su ministerio mes lo bay pone un asina yama “Citgo-desk” pa recluta trahadonan local pa haya trabou den e refineria.

Awe ta su prima pa dicidi di bisa CITGO pa crea cos y bay for di Aruba y Minister Glenbert Croes awor kier bisti trahe di Superman pa hunga wega di super heroe loke ta haci su persona hopi ridiculo den henter e payasada aki cu yama gabinete Wever Croes. E maneho irrisponsabel actual di e gobierno MEPORED lo por caba den un desaster total cu lo costa pueblo di Aruba hopi, Parlamentario Mike de Meza a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search