Premier Evelyne (MEP) ta cera refineria riba presion di (POR) pa complace dealnan di Otmar

 In AVP

Mirando e forma con prome minister Evelyne Wever Croes a atende cu e desaroyo relaciona cu e refinería di San Nicolas y hunto  cun  e decisión di su gobierno di anuncia plan pa construcción di un hotel di 900 camber na Seroe Colorado y pa usa tereno di refinería pa planta Cannabis/Marijuana ta practicamente confirma cu e desaroyonan aki ta forma parti di e acuerdo di gobernacion entre partido MEP, POR y RED.

Parlamentario Mike de Meza ta mustra cu for di momento cu gabinete Wever Croes a huramenta na 2017, gobierno dirigi pa Evelyne Wever Croes no a haci ningun esfuerso pa atende cu e compania CITGO pa mira unda gobierno por yuda pa atende cu e desaroyonan cu a surgi ultimo tempo. Esaki parlamentario Mike de Meza a bin ta ilustra ya pa casi un aña y mey caba.

De Meza a sigui mustra cu ta hopi yamativo e hecho cu  net den mesun dianan cu minister di turismo Dangui Oduber den presencia di minister di infrastructura Otmar Oduber ta sinta hunto pa anuncia e proyecto hotelero di 900 camber y tambe cu gobierno MEPPORRED ta anuncia cu muy pronto lo legalisa Cannabis/Marijuana, prome minister Wever Croes a reuni cu ehecutivonan di CITGO pa despues bin afo y bisa cu e proyecto di reapertura di e refineria di San Nicolas ta keda suspendi por lo pronto.

“Ya caba siman pasa mi a mustra cu prome minister nunca kier a sinta cu representantenan di CITGO kendenan a bin Aruba y a busca un reunion cu su persona, pero Evelyne a informa nan cu e no tin tempo pa sinta cu nan.

Claramente esey ta mustra su falta di interes den e proyecto aki mientras cu ta mesun prome minister aki den pasado a declara den reunion publico di Parlamento, cu portanan cu ta habri pa su persona, no ta habri pa Mike Eman. Tambe ta mesun prome minister aki algun luna pasa a declara den reunion publico di Parlamento cu lo por utiliza e tereno di refineria pa plantacion di Cannabis/Marijuana y asina hasi esaki e di dos pilar economico pa Aruba.

Evelyne a gaba cu e tin contactonan cu diferente compania petrolero cu ta interes den e refineria pero te cu dia di awe sinta awo den gobierno, ni un solo nomber di e tanto companianan cu e tin contacto cu nan, a wordo presenta of el a sinta cu nan.

Ta for di un tempo caba por a mira cu e gobierno aki ta ehecutando un draaiboek tras di cual tin cantidad di cos ta hungando un rol  di gruponan cu tin otro interesnan cu gobierno ta mira na prome luga.

Awor cu e propio minister Otmar Oduber, kende su firma ta bou di henter e acuerdo pa e proyecto di reapertura di e refineria, kende a celebra cu pueblo e logro aki dilanti di oficina di gobierno, awor tin e curashi di bisa cu ta un proyecto di Mike Eman y Mike de Meza.

Asombroso con un minister cu pa 17 aña a sostene e vision politico di partido AVP, a carga responsabilidad como minister den dos gabinete di AVP, awor ta pretende cu e no tin nada di haber cu decisionnan cu e gobierno den cual el a participa, ta logra.

Esey ta mustra di falta di weso di lomba, un insulto pa pueblo ora c’un politico cu mesun ministernan di gabinete Wever Croes a keha di corupcion y otro kehonan na ministerio publico, awor kier pretende cu e no tin nada di haber cu e dos gabinetenan di AVP.

Sin cu ainda tin un decision definitivo riba futuro di e refineria, caminda RDA a sigura cu e proyecto lo sigui den futuro, minister Otmar Oduber ta sinta banda di un di e ministernan cu mas el a insulta y a wordo insulta dor di dje, pa papia riba un proyecto riba cual mester bay tira un bista di cerca pa mira tur cu lo wordo beneficia cu e proyecto aki.

Ta bisto awor cu tin un acuerdo entre e lider di partido MEP y actual prome minister Evelyne Wever Croes y minister Otmar Oduber caminda e prome minister lo tabata encarga pa percura pa no yuda den e proceso di reapertura di e refineria, caminda su pesona mes a para na porta di e refineria pa e habri y e lider di POR y actual minister di infrastructura Otmar Oduber caminda un ta percura pa reapetura di e refineria fracasa bow di e partidonan POR y RED.

Ta mesun prome minister aki a elogia den pasado su actual minister di asuntonan social, Glenbert Croes, pa su gran esfuerso y hasta a sigura pueblo cu ta dor di esfuersonan di Glenbert y su contactonan na Venezuela cu ehecutivonan di PDVSA, a bin logra e acuerdo pa reapertura di e refineria.

Awor cu Glenbert Croes sinta den gobierno como minister no un solo bishita of esfuerso el a haci pa atende cu e desaroyonan di ultimo lunanan pa saca un man pa yuda e proyecto cu Evelyne a insisti di ta su logro pero Otmar Oduber un biaha mas ta esun cu ta defini kico prome Minister Evelyne Wever Croes tin cu haci pa asina ne gobierno aki keda na bida. Un berguensa pa mira con e partido MEP a enganja e pueblo cu nan si lo a percura pa e refineria tin un existencia. Esaki lo ta e di cinco operador di refineria cu lo bandona operacion bao un gobierno di MEP, Parlamentario Mike de Meza a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search