PHP: Agencianan di empleo un formula di trabou ‘temporario’ cu por resulta den termino largo si no controle efectivamente

 In AVP

Na promer lugar ta importante pa remarca cu buki 7A di nos codigo civil ta prescribi solamente 4 scenario unda cu lo por papia di un contract laboral pa tempo defini. Pero den mesun rosea nos leynan conoce un di 5 posibilidad cu ta traha bou un agencia di empleo. E relacion entre agencia di empleo y trahado ta codifica den seccion 11, titulo 10 di buki 7A di nos Codigo Civil. Articulo 7A: 1615Y ta papia di un ‘uitzendovereenkomst’. Ta relevante pa dedica atencion na e nificacion di e terminonan. Un agencia di empleo, tambe conoci como un uitzendbureau, ta un oficina cu ta pone trahadornan na disponibilidad di un otro compania, esta un inlener. E inlener ta e compania of persona cu ta dirigi un empresa unda e trahador pa medio di e agencia di empleo ta wordo manda pa hasi su trabou, ehempelnan ta trabou di limpieza, waiter (art. 1 Landsverordening terbeschikkingstelling arbeidskrachten). Ta importante pa remarca cu e hefe di e trahado ta e agencia di empleo, y no e compania unda e trahado ta laborando. 

E contract

E agencia di empleo tin un contract cu e trahador, ne mesun momento e tin tambe un otro contract cu e inlener. Cu otro palabra e trahador no tin un contract directo cu e inlener, solamente cu e agencia di empleo. Esaki ta crea un situacion di un relacion ‘triangulo’ entre agencia di empleo, e trahado y e inlener. A base di e contractonan aki e agencia di empleo ta pone trahadornan den disponibilidad di e inlener pa asina e trahado hasi un trabou bou e supervision y instruccion di e inlener. For di e momento cu e trahador wordo poni na disponibilidad di e inlener por papia di un contract laboral pa tempo defini cu e agencia di empleo cu e duracion segun e tempo cu e ta disponibel pa e inlener.

Actualmente tin hopi persona trahando via un agencia di empleo y nan no sa nan derechonan. E consecuencia di e falta di conocemento di nan derechonan ta crea e posibilidad pa wordo abusa door di e agencia di empleo. Bo por haya e impresion tin biaha cu e propio agencia di empleonan mes no sa cu nan ta abusando di e derecho di e trahadornan. E motibo kizas por ta cu nan mes no sa e contenido di nos leynan. Loke bo no por exclui ta cu posiblemente e agencia di empleo concientemente ta opta pa ignora nos leynan. Loke ta mas lamentabel ta e hecho cu no tin un proteccion optimal pa un uitzendkracht. 

E periodo maximo como uitzendkracht

Na Aruba tin e tendencia cu un trahador ta keda traha via agencia di empleo pa añanan largo. Tienda di ley kier expresa categoricamente cu esaki ta un abuso! Nos kier enfatisa cu esaki ta empugna cu nos leynan. Articulo  5 di e  ‘Landsverordening terbeschikkingstelling arbeidskrachten’ ta prescribi cu un uitzendbureau ta permiti pa pone un trahado traha pa un inlener hasiendo e mesun trabou pa maximo 12 luna! E ta inaceptabel cu pa falta di un mecanismo di control of proteccion ta permiti pa continua cu e abuso cu e trahadornan aki cu de facto ta wordo stroba pa yega na stabilidad financiero. Tienda di Ley kier enfatisa cu incumplimiento di e leynan door di e agencia di empleo por tin consecuencianan severo pa e oficina, entre otro perdida di nan permiso pa ta un agencia di empleo of sancionnan administrativo pisa.

Consecuencia di tres contract tras di otro

Articulo 7A:1615f inciso 3 ta prescribi cu si resulta cu tin mas cu dos contract laboral pa tempo defini cu a sigi tras di otro of cu un pausa no mas grandi cu tres luna, e ultimo lo wordo considera como un contract laboral pa tempo indefini. Cu otro palabra si un contratista wordo poni na disponibilidad di un inlener basa riba mas cu dos ‘uitzendovereenkomst’ , e di 3er contract lo conta pa un tempo no defini.

Un uitzendkracht tin mesun derecho cu e trahadornan di e inlener

Un otro aspecto cu hopi trahadonan ta confronta hopi abuso ta relaciona cu nan salario. Nos kier accentua cu  articulo 8 inciso 1 Landsverordening terbeschikkingstelling arbeidskrachten ta stipula cu un trahado via agencia di empleo tin den principio derecho riba un salario lo mas serca posibel na e salario di un trahado cu si ta den servicio directo di e compania (inlener) y bou mesun circumstancianan. E ta di lamenta cu hopi trahado tin un salario hopi mas abou en comparacion cu su coleganan den mesun puesto di trabou.  Ademas di esei e tin derecho di sigui haya salario den caso cu e no ta disponibel pa traha door di enferemedad. E uitzendkracht tin derecho riba zwangerschapsverlof paga, derecho riba pago di overtime, derecho riba dianan di vakantie etc. Loke si ta importante pa trece dilanti ta e hecho cu e agencia di empleo no tin un obligacion di paga salario si resulta cu no tin trabou mas pa e uitzendkracht.

Tienda di ley ta spera di por a informa e ciudadano nan un tiki mas riba e topico di agencia di empleo. Den liñanan grandi nos a trese e topico aki pa dilanti. Si acaso bo tin pregunta of duda, semper bo por aserca un abogado of hurista pa mas splicacion den detayes. E ta posibel tambe pa acudi tur diasabra di 3 pm -5 pm na cas di partido AVP na playa . Pa nos colaboradornan y huristanan den formacion e ta un placer di por atende e publico cu ta asistiendo tur diasabra.

Autornan:

Gerick Croes & Minorca Martis (studiantenan di ley)

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search