Siman pasa a tuma luga un reunion, cu pa Monumenten Fonds tabata special, mirando cu e aña aki nan ta introduci e “Guest of the Month” y pa e motibo aki mes nan ta contento y orguyoso di por a haya diferente “stakeholders’ y e plataforma presente den reunion. Esencia di e reunion tabata pa logra haya tur hende riba e mesun liña y mira con pa haci monumentonan mas accesibel pa esunnan cu limitacion, semper y cuando e maneho di e fundacion duna espacio pa realisa e meta.

Di su banda e Director a bisa cu manera tur otro fundacion, nan tambe tin nan retonan y cu den e reunion a haya oportunidad di duna splicacion amplio na e plataforma con e situacion ta y tambe di e otro banda pa siña for di nan kico ta posibel. Na final a ricibi un carta caminda ta acerca y pidi yudansa na Monumenten Fonds pa ahustacion di Stadhuis, mirando cu e ta un di nan edificionan, pa mira con pa haci esaki mas accecibel na personanan cu limitacion.

Peticion ta pa ahusta accesibilidad mirando e edificio ta dificil pa tur hende subi y forma parti di momentonan unico, manera esunnan cu ta casa. No solamente lo tene cuenta cu limitacion fisico pero tur clase di limitacion por ehempel tambe limitacion visual. E reto ta cu como monumento mester tene cuenta cu e diseño original, pa preserva e parti autentico di e edificio.

• 

• 

• 

• 

• 

Anne Witsenburg a remarca cu shen aña pasa no tabatin lift of rampa na edifcionan como cu antes bo no tabata mira hopi hende sali for di cas cu rolstoel. Den transcurso di añanan esaki a cambia y awor a bira e reto pa haci cambiao aunke semper kedando den e reglanan di monumento.

E Director di Monumenten Fonds ta bisa cu, e ta hopi contento cu Fundacion Museonan Arubano tambe a forma parti di e reunion. Pasobra nan tin cuater museo actualmente bou nan encargo y tres di nan ta den un monumento y cu di nan banda ricibiendo un cantidad di bishitante, incluyendo esunnan cu limitacion. Nan tambe lo kier mira e cambionan aki tuma luga. For di e reunion a constata cu tur hende ta riba e mesun liña y sigur por mira yudansa mutuo di importancia y na beneficio di tur hende.

FIN