Parlamentarionan no ta convenci y ta urgi pa duna mas splicacion

 In AVP

Durante tratamento di e ley di maneho di desperdicio, parlamentario di fraccion di AVP Robert Candelaria tambe a hiba palabra y na su turno a bin cu varios punto importante dilanti. El a menciona cu tin problema hopi sensitivo den e asunto aki unda cu no un of dos empresa pero ta papia di pan di hopi famia den temponan asina dificil. 

E Parlamentario a bisa di ta di acuerdo cu mester bin un solucion pa maneho di sushi di nos pais. Comunidad ta biba den un tempo cu sushi no ta djis un problema mas. Sushi a bira un strategia di oportunidad y uno grandi. Pero e pregunta ta ken mester beneficia di e oportunidad aki? E no mag di ta algo cu ta yuda niun otro cu ta e pueblo na prome luga. Robert Candelaria ta bisa cu e no ta convenci cu esey ta e caso aworaki. No ta parce, basa riba e informacion cu tin awor, cu ta e pueblo ta esun cu lo beneficia si e ley aki pasa. 

E impresion ta cu e ley aki a subi mesa di repente y mester pasa rapidamente. No tin claridad pa nan como Parlamentario pakico esey ta e caso y pakico asina lihe. Tin hopi oportunidad mas dilanti pa yega na un bista completo di e situacion. Lamentablemente no ta haya oportunidad pa mira tur, segun e ta bisa. 

Actualmente ta bibando den un tempo cu tin hopi mal contento den comunidad pa aumento di prijs, hopi hende ta perde trabou. Gobierno en bes di kita e presion for di riba e pueblo, e ley aki ta pone cu e insiguridad ta aumenta poco mas.  Creando na mes momento insiguridad pa cu e otro empresanan den e mercado aki y nan empleadonan, ta conta igual pa empresa chikito na unda hende ta purba lanta algo na cas pa nan biba y sostene nan famia. 

Parlamentario Candelaria ta remarca cu tur esnan envolvi ta keda confronta cu un aumento di gasto anual barbaro. Otro ehempel ta di hende cu ta busca baki di sushi pa limpia nan propiedad, caminda nan tambe lo mira aumento di gasto hopi grandi. Esaki lo descurasha hende pa haci nan propiedad limpi, of e ta encurasha hende pa tira sushi otro caminda. 

Cliente di otro empresanan cu no ta Serlimar lo mester paga mas, sector empresarial mester paga mas, turistanan mester paga mas. E ta puntra, cual argumento tin pa contra aresta esaki? Empresa, turista y local mester paga mas? Tur esakinan ta preguntanan cu a bin dilanti durante reunion di parti Parlamentario Candelaria. Aumento di gasto pa cu recoge y procesa sushi na final di cuenta lo pasa pa pueblo cubri. Pero e pregunta ta keda, pakiko? Ken ta wordo beneficia? 

Aumento di gasto pa tur empresa, principalmente e chikitonan cu por resulta den consecuencia grandi te cu por resulta cu algun por cera nan porta. Esaki no ta cumbini ni gobierno, ni sector priva. Pero asina mes ta mira cu ta pusha e ley. Kico ta e motibo, e ta puntra.  

Manera a bisa, ta mustra cu tin pura pa pasa e ley pero den un reunion di e Comision di Financia y Asuntonan Economico luna pasa cu AHATA, a mustra cu nan a propone un opcion pa un investigacion imparcial pa mira con ta bay procesa sushi. 

Berdad cu e ley aki su esencia direct no ta pa incinerator, pero e ley ta referi na dje y e ta prepara y habri caminda pa esaki. Dicon no ta warda y busca tur informacion prome cu forsa pa pasa un ley? Kico lo pasa si e investigacion mustra riba algo miho? Awo si e mustra cu e loke e ley actual tin riba mesa no ta e miho solucion? Lo tin cu djis acepta pa sigui den e caya cu a drenta, sin busca tur informacion pa e miho decision prome?

Si e ley no ta pa incinerator, dicon tin proceso di RFI ( Request for Information)?

Pa keda un rato riba e incinerator, si tene na cuenta cu e calculo di 300 miyon lo mester keda paga door di pueblo pa loke lo bin despues di e ley aki cu ta e incinerator, kico ta e calculo di aumento di gastonan mensual pa pueblo? Con lo cobra esaki? Lo nifica mas belasting of aumento di otro gastonan? Teniendo na cuenta cu e suma aki di 300 miyon ta mas cu Green Corridor y Hospital hunto, dicon no a opta pa un solucion mas pagabel y miho pa medio ambiente? No a haci uzo di un procedura pa yega na otro alternativa pero si a rechasa esun cu sector priva a presenta. 

Dicon no a opta pa e otro alternativa di exporta e sushi? 

Pregunta na Minister tabata si e por a duna un splicacion di cobransa pa ora haci peticion pa baki di sushi na cas si e ley aki pasa? Cuanto lo cobra pa ton ora hiba sushi di cas? Tur pensamento ta indica cu e ley no ta muchocla pasobra tin hopi cos cu a puntra caba y e ley no ta duna claridad. E ley no ta mustra cu e ta na bienestar di Serlimar, ni otro empresa, ni Land Aruba. Beneficionan no ta cla, mientras e aumentonan di prijs pa diferente grupo den nos comunidad, cu ta preguntanan cu ainda no ta contesta.

Robert Candelaria ta di pensamento cu e ley no ta oportuno y mester keda rechasa. 

Ora pensa riba e ley aki y tur e cosnan cu no ta concreto rond di dje, manera kico ta e motibo pa pusha e ley asina lihe y con esaki ta na beneficio di tur empresa y pais Aruba etc, “e ta lagami pensa riba un dicho popular. E dicho aki ta un den e mundo di logica cu normalmente ta referi na un pato. Den e caso aki ta pensa cu un ahuste simpel ta perfecto den e tratamento di ley aki: “ if it looks like a fox, barks like a fox, walks like a fox, then it probably is a fox”.”

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search