Luna di oktober ta luna di conscientisacion di cancer na pecho y miembro di fraccion di AVP, drs Mervin Wyatt Ras, durante di conferencia di prensa diamars mainta, a pone atencion na esaki. El a mustra cu ta hopi importante pa sernan femenino haci nan control y checkup medico di pecho, ya cu esaki ta sumamente importante pa nan propio salud.
Fundacion BOB ta encarga cu e controlnan aki. Segun informacion obteni tur aña alrededor di 4000 persona ta wordo invita pa haci un screening pa por detecta si nan tin cancer na pecho den un periodo tempran pa asina preveni. Segun informacion 40% di esunnan invita ta duna oido na e invitacion aki.
Den informacion cu BOB a duna pa loke ta trata e proceso aki, nan ta haya cu e cantidad aki por crece. Ta resulta cu serca mayoria di hende muhe (70-80%) cu ser constata cancer, nan no a yega di bai un screeining y/of ta den un fase mas avansa si e malesa.
Wyatt-Ras ta subraya cu e screening of control aki ta sumamente importante pero na mes momento ta hopi importante tambe un bon estilo di bida pa preveni e malesa aki. World Health Organization ta indica cu 2.1 miyon di hendenan muhe ta sufri di cancer na pecho.
Tambe WHO ta mustra cu di tur hende muhe cu fayece, 15% di nan ta debi na cancer na pecho. Esaki ta un cifra significante cu mester sirbi como un aviso pa hendenan muhe tene cuenta cun’e.
Wyatt-Ras ta trece alabes padilanti cu mirando e cifranan pa loke ta trata nos muchanan, pa cual por cierto den luna di september ta e luna cu sa pone atencion ariba cancer cerca muchanan, por bisa cu pa e grupo aki tambe ta importante pa nan haya atencion. Pa mucha por nota cu e cantidad pa luna ta entre 2-7, cu un promedio di 4 mucha. Aki por mira cu muchanan tambe ta core cierto riesgo.
Hopi mucha cu ta haya cancer, e.o. leukemia of problemanan lymfatico sin duda ta mustra ariba e hecho cu mester duna mas atencion na nos muchanan, aunke cancer ta bin mayoria bes sorpresivamente y esaki por ta devastado pa un persona y su famia.
Hopi di e muchana aki ta wordo manda pa extererior pa tratamento, mas tanto pa Hulanda. E tratamentonan ta tuma basta tempo. E.o. ta tuma dos pa seis luna. Den algun caso esaki por dura entre 2 pa 4 anja.
Pues ta di vital importancia pa dedica atencion na cancer no solamente di mucha pero tambe di nos hendenan muhe pero un bon noticia ta e hecho cu aki na Aruba nos tin e centro oncologico na IMSAN cu ta brinda tratamento di radiologia na pashentnan di cancer y esaki seguramente lo baha gastonan den cuido medico y un cantidad di patient no mester bai mas den exterior pa tratamento.
E centro oncologico ta un proyecto cu a inicia di basta tempo bou di gobernacion di AVP y a continua caminda awor por mira su frutonan y ta di spera cu nos ciudadanonan mas y mas por ricibi tratamento aki na Aruba mes na e centro oncologico aki en bes di wordo manda pa exterior, sigur mirando e situacion di COVID-19 cu nos pueblo ta pasando aden.
Tin un backlog of caida den e tratamentonan y un lista di espera ya cu hopi hende no por ser manda den exterior y/of no por wordo trata y ban spera cu pronto lo bin un solucion pa esaki.
Wyatt-Ras ta lamenta cu na momento cu su persona a dirigi pregunta na Minister encarga cu Salud, Dangui Oduber, relaciona cu BOB y e cantidad di casonan cu e fundacion aki a bin ta atendiendo mirando e desaroyonan rond di COVID-19, e minister aki no a contesta ningun pregunta.
Ta di lamenta paso ta trata di preguntanan cu nos profesionalnan y nos pueblo ta manda pa parlamentario, como representante di pueblo haci na gobierno. Pesey ta necesario haya contesta ariba nan y haya informacion con e proceso di screening aki ta bayendo. Sinembargo no ta haya reaccion for di Minister Oduber.
Pero Wyatt-Ras ta keda den espera di un reaccion y contesta di Minister Dangui Oduber ya cu ta trata di informacionnan hopi importante pa cuido di nos hendenan muhe” Parlamentario Mervin Wyatt Ras a mustra.
