Fraccion di AVP dialuna den oranan di merdia a haci entrega di un Rappel Brief na Presidente di Parlamento mr. Ady Thijsen demandando pa e reunion publico riba e problemanan di Traimerdia, SPO y Scol Paso pa Futuro.
E motibo di e carta ta cu e fraccion a pidi un reunion urgente, pero despues di un siman ainda no a pone fecha, mientras cu reces di Parlamento ta na skina mes. No solamente esey, e mas preocupante ta cu scol ta cerando nan portanan na inicio di juli y maestro y studiantenan ta bayendo cu vakantie, y tin un incertidumbre ainda di kico ta bay pasa cu nan scolnan. E preguntanan grandi ta: e scolnan di SPO ta bay muda? Ta bay tin Huiswerk Begeleiders na Traimerdia of no? “Un caos total tin aworaki. Nos kier pa tin claridad riba e asuntonan aki. Ta p’esey siman pasa nos a pidi un reunion y te dia dia we nos no a haya contesta. P’esey nos ta entrega e carta aki awe, haciendo un apelacion na Presidente di Parlamento pa e reunion tuma luga, mirando cu ta bay tin tiki tempo pasobra fin di siman tin un delegacion biahando pa IPKO. Nos kier pa yama e reunion aki prome cu nan biaha. Despues cu nan bay no tin quorum pa tene un reunion.
Nos ta haci un apelacion pa mañan, of diaranson yama e reunion y invita e Minister pa nos tin claridad di kico ta bay pasa cu SPO, Paso pa Futuro y Traimerdia.”
E carta aki ta pa demostra na e Presidente cu ta e di dos biaha cu fraccion di AVP ta pidiendo e reunion publico riba e mesun tema. Na momento di entrega di e carta, e lider di fraccion di AVP a haci un apelacion na e Presidente pa haci tur su esfuerso pa yama e reunion, pa duna e docente un tiki mas di claridad riba nan preocupacionnan.”Si e ta serio y tin e maestronan na pecho, e ta yama e reunion pa tin claridad total. Nos ta papiando aki di Enseñansa.”
Tambe Sneek a menciona cu tin un carta cu a sali recientemente cu ta bisa cu entrante e aña escolar nobo no ta paga siguridad mas pa scolnan. E decision aki ta wordo tuma despues cu maestronan a entrega un Manifiesto cu nan no ta sinti nan mes sigur mas na scol. Awo e Minister ta dicidi cu e poco vigilancia cu a keda, ta bay wordo elimina. “Tin 200 mil pa hinca den un helicopter y bula rond , pero no tin placa pa hinca den enseñansa, no tin placa pa garantisa cu e maestro den funcion ta haci esaki den un ambiente sigur. Ta manda carta cu ta kita siguridad, pero ta gasta 100 mil florin si den un charla riba cannabis. Esaki ta inaceptabel.”
Sneek a termina bisando cu e ta spera cu e carta aki ta suficiente pa pusha e Presidente pa yama e reunion. Solamente e mester tene cuenta kico ta biba den comunidad, cu mester duna nan atencion na dje y no laga e maestronan na caya.
