No tin claridad unda mey MIYON florin den Fundacion Futura ta bay

 In AVP

Parlamentario Michael Lampe cu un tono basta skerpi ta cuestiona e uzo di ayudo social pa departamentonan cu ta cay bou di Ministerionan di Prome Minister Evelyn Wever Croes. E ta referi specificamente na fundacion FUTURA, cu ta atende cu plannan di innovacion di Gobierno.

“Nos no tin claridad di loke FUTURA ta haciendo,” Parlamentario di AVP Lampe a bisa den un declaracion duna. Pero loke cu a hala su atencion ta cu e suma di ayudo social cu Gobierno ta pone den e fundacion aki, cu ta nada menos den careda di mey miyon florin. P’esey su pregunta di kico exactamente e fundacion aki su trabou ta, kico e ta haci pa Gobierno. Remarcabel ta cu e staff ta consisti di diferente persona cu ta hopi liga na Gobierno, algo cu e ta bisa ta bay contra di e pensamento di un maneho transparente cu e Gobierno di Wever Croes ta bisa cu e ta boga p’e. “Nos como miembro di Parlamento mester por puntra Gobierno pa claridad di esaki,”. Esey ta motibo cu el a manda un lista di pregunta pa Prome Minister, den cualnan e ta puntra ken y con a lanta e fundacion aki, kendenan ta forma parti di dje, kico a wordo haci caba, mirando e suma basta bon cu ta wordo apunta pa e Fundacion. 

E preguntanan di Lampe ta bini despues di a mira e situacion cu e scol Cacique Macuarima ta pasa aden, cu mester a pidi sector priva pa duna un man pa yuda den renobacion di e instalacionnan cu a sufri daño ora cu un candela a wordo cendi intencionalmente. E placa cu e fundacion FUTURA ta ricibi ta bini di e contribucion cu sector priva ta duna na caha di Gobierno, pa cual ta incomprendibel cu aworaki un biaha mas ta bay na pidi ayudo for di sector priva. Pakico pidi mas, si ya caba a haya ayudo via di e diferente primanan cu sector priva ta paga. Di otro banda tine  fundacion FUTURA cu niun hende sa exactamente kico nan ta haci. “Mi ta spera cu Prome Minister tuma e preguntanan aki na serio pasobra nos kier sa kico FUTURA ta haci, kendenan ta den FUTURO, y kico ta nan trabou. Te aworaki no a mira nada concreto ta sali di nan trabou. Tin basta hende cu a wordo tuma eyden. Nos kier sa si nan tur ta parti di e fundacion..”

AVP, el a bisa, ta exigi transparencia den decisionnan cu Gobierno ta tuma den casonan manera esun aki, cu tin nan preocupa.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search