Ni pandemia ta impidi Prome Minister sigui manipula berdad

 In AVP

Pa Prome Minister Evelyn Wever Croes un biaha mas a demostra cu e interes di pueblo no ta na prome luga, ni den tempo di un crisis serio manera e covid-19, pero otro interesnan cu e tin cu sirbi ta dilanti di tur cos, hasta salud di nos pueblo.

Miembro di fraccion di AVP, Mike de Meza a mustra cu mey mey di tur e pandemia cu mundo henter y Aruba tambe ta confrontando, Prome Minister a haya espacio pa firma terminacion di e contract cu CITGO, mustrando un felicidad y alegria cu su persona y su gobierno so lo por compronde.

“Pues na momento cu Parlamento te den oranan laat di anochi tabata tratando presupuesto di DOW, tanto Prome Minister como Minister di Finansa y tambe e propio Minister di DOW esta di infractructura, a haya tempo pa firma e contract aki.

Pa di tantisimo ves, Evelyn Wever Croes ta pretende cu el a logra algo grandi, usando expresionnan cu e mes ta contradeci su mes, manera ”no tabata facil, na unda cu interes di pais Aruba a wordo defendi y protegi di tur banda,” hasta mustrando contento su gobierno ta cu e suma di 17 miyon dollar cu CITGO lo paga pa kibra e contract.

Pero kende por compronde di con Evelyn y su gobierno ta felis c’un suma asina mediocre asina, sigur mirando e contact original cu CITGO mester a cumpli cune, caminda den caso cu e compania no logra cu loke a exigi, e compania lo tin cu paga Aruba un ‘breach of contract’ di mas di 300 miyon florin.

Desde ki dia un hende por ta contento cu 17 miyon dollar si dentro di algun luna e lo por a ricibi pa medio di un contract solido, un suma di mas di 300 miyon florin?

Aki ta otro maniobra mas di e master gañado cu Aruba a yega di conoce, Evelyn Wever Croes, kende ya caba a baila y tuma henter pueblo haci ora cu el a gaña tur hende cu e lo goberna sin medida ya cu e tin solucionnan cla pero den prome luga a suta pueblo cu aumento di BBO y aumento di costo di bida.

Den su afan pa sigui manipula e berdad na pueblo, Evelyn ta declara cu el a kere cu e lo no logra debi na e situacion instabil na Venezuela, caminda tur negociacion cu a tuma luga, tabata cu representantenan di CITGO di Houston, pues practicamente ningun envolvimento di Venezuela.

Kico ta costa Prome Minister di ta sincero cu su pueblo? Kico ta costa Evelyn pa cumpli cu loke e mes ta bisa di kier goberna a base di integridad y hasta transparencia ya cu e acuerdo final aki cu el a firma hunto cu e dos otro ministernan menciona, ainda no a yega Parlamento.

Ta tristo scucha Prome Minister declara cu  “interes di pais Aruba a wordo defendi y protegi di tur banda” mientras cu su persona ta pretende di no tabata envolvi den ningun negociacion, nunca antes e kier a reuni cu representantenan di CITGO pa salba e proyecto di reapertura y awor ta papia di dificultad di negociacionnan, mientras cu tur merdia y tur anochi e ta dilanti camara di negociacion.

Sikiera un bes nos pueblo y sigur pueblo di San Nicolas tin derecho di wordo trata cu mas respet, cu mas sinceridad pero tur cos ta mustra cu despues di casi 3 aña den gobernacion, Evelyn Wever Croes simplemente no conoce kico nifica goberna cu honestida. Nos di partido AVP ta convenci cu prome minister no tin ningun base legal pa e duna Citgo un kwijtschelding di 300 miyon florin,” Parlamentario Mike de Meza a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search