Momento a yega pa Prome Minister enfrenta su incapacidad y papia berdad

 In AVP

Dos aña a pasa bay y ainda Prome Minister Evelyn Wever Croes no tin algo positivo y beneficioso pa mustra pueblo of cu el a haci na interes general di e pais.

Parlamentario pa fraccion di AVP, Arthur Dowers ta kere cu e momento realmente a yega, pa introduci un ley cu ta haci gañamento di henter un pueblo, algo castigabel y contra cual por tuma pasonan pa proteha interes di pueblo.

“Den tur conferencia di prensa, den tur declaracion cu e duna tanto na Aruba como Hulanda, Prome Minister Evelyn Wever Croes ta insisti pa no bisa e berdad, pa no carga responsabilidad pa e desaster cu su gobierno ta hincando e pais aki den dje.

Awor Evelyn ta na Hulanda, caminda el a bay roga gobierno di Reino pa otro periodo di comprension pa asina e por yega na soluciona e maneho financiero di su gobierno.

Ta increibel ora cu nos scucha Prome Minister pretende cu e ta un hende di confia, un hende cu ta papia y wordo guia pa e berdad, den tur loke e kier pa pueblo compronde ya cu na mes momento cu for di su boca e ta bisa cu el a reuni cu Comision di Asuntonan di Reino di Tweede Kamer tras di porta cera, e ta sali declara loke el a papia den e reunion secreto aki.

Segun Prome Minister Gañado, atrobe politiconan di Hulanda lo a bisa cu gobierno di AVP semper a traha cu cifranan falso, cu presupuestonan irealistico pero en realidad e no ta bisa cu e reunion na Hulanda ta pa e splica con el a hinca su presupuesto den otro, caminda cifranan no ta cuadra.

E solo hecho cu Evelyn a bay Hulanda pa trata di wanta un ultimetum pa su gobierno haya un ‘aanwijzing’ d 22 di november, ta mustra con e por gaña sin nignun momento realisa cu e mes ta gañando su mes.

Nos por  a scucha Eevlyn declara for di Den Haag  cu tambe parlamentarionan Hulandes a mustra su persona cu durante di 8 aña gobierno di AVP no a tene su mes na palabracionnan haci,  mientras cu CFT a cuminsa cu su trabou di supervision na 2015.

Ta bin acerca cu gobierno di AVP na tur momento cu a firma protocol y a fiha normanan di maneho financiero cu gobierno di Reino, ningun momento CFT a cuestiona e seriedad di e maneho aki, al contrario nunca a dirigi un carta pa Conseho di Minister di Reino pa duna gobierno di AVP pa motibo di no a cumpli cu normanan palabra.

Ta Prome Minister Evelyn Wever Croes y su Minister di Finansa Xiomara Ruiz Maduro a firma un protocol na november di 2018 pero  despues no kier a reconoce e protocol aki y hasta a conseha fraccionnan cu ta sostene su gobierno den Parlamento, pa trata di tene CFT for di supervision di presupuesto di su gobierno.

Loke ta mas serio ainda ta cu Hulanda no ta confia gobierno di Evelyn cu placa di pueblo y esaki ainda ta punto di discusion ora cu ta trata di e fondo apart cu su gobierno a pone pa atende cu su sociale crisisplan, caminda miyones a wordo poni un banda.

CFT a mustra na  varios ocasion cu e fondo aki mester bay bek den presupuesto sigur ora cu Hulanda a nota cu e placa aki a ba y mas tanto pa tuma hende den servicio y sin solucion ainda pa e problemanan social di pueblo.

Varios publicacion Hulandes na un of otro momento a cuestiona e seriedad di Prome Minister y tambe politiconan Hulandes kendenan a yega di haci pregunta na Secretario di Asuntonan di Reino, despues cu Evelyn a declara  cu no mester kere declaracionnan di politiconan Hulandes.

Ta cantidad di situacionnan tin caminda Prome Minister no por saca su curpa afo y awor tin cu mira kico Gobierno ta bay haci c’un gobierno cu faltando un luna pa Parlamento bay cu reces, ainda no a presenta presupuesto 2020 na Parlamento mucho menos e presupuesto supletorio ya cu ainda falta buraco di miyones pa yega,” Parlamentario Arthur Dowers a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search