Malcontento y un duda grandi di kico ta locual cu ta bay pasa pa e siguiente aña escolar ta algun di e puntonan cu e manifestantenan di awe a trece dilanti na porta di Parlamento. Trahadonan di Traimerdia no ta haya informacion y esaki ta di lamenta. Lider di fraccion di Partido AVP y docente di profesion Marlon Sneek a conta kico den su opinion ta inaceptabel.

For di un luna pasa trahadonan di traimerdia ta canando nan caminda y sinta den e reunion cu Minister di Enseñansa sin haya contesta concreto. Un copia di un carta a keda entrega na algun parlamentario awe cu a bin di parti Minister Lampe cu te ainda no a yega serca e parlamentarionan. Cu esey ta mustra con bruha e minister aki ta traha y ta un di e motibonan cu ta keda para riba cu ta un Reunion publico ta pidi pa asina e por bin duna cuenta di kico ta su intencionnan.

Algun siman prome cu vacantie escolar ainda nan no sa kico ta nan futuro, si nan tin trabou of no, esnan di SPO si tin cu presenta na mes un edificio of nan a muda, situacion ta for di lo normal. E Minister tin cu bin parlamento y no den comission di enseñansa, den un Reuinion publico pa tur hende por tende unda e minister ta para y kico ta e direccion cu ta bay tuma. Di importancia y teniendo parlamentario Vrolijk na su palabra, cu ta un solo parlamento tin y cu no por sconde tras cu ta minister di coalicion, sino mas bien tin cu informa kico e ta haciendo.

Den un encuentro parlamentario a pidi plan/ vision pero te dia di awe no por haya nada for di e minister, unicamente por a comporba cu e ta traha ad hoc, cu ta inaceptabel!! Faltando un siman so mas pa minister tuma desicion ta keda e inkietur si acaso agenda di parlamento lo ta druk pa yama un reunion publico. Segun parlamentario Marlon Sneek, esaki mester ta posibel y mas lihe cu ta posibel. Aunke tin reunion di IPKO final di siman ta resta e comienso di siman pa yama esaki pero e prerogativo ta keda den man di e Presidente di Parlamento.

Prioridad
Tin cu duna cada manifestante e oido y respet. Cu e manifestacion nan a bin expresa nan preocupacion cu ta bibando pa mas di un luna caba y ta merese di haya informacion VERIDICO kico realmente ta bay pasa cu nan y cu Enseñansa en general. A tuma nota cu e Minister a kita huiswerkbegeleiding, na momento cu e aña escolar nobo drenta ken lo ocupa su mes di esaki mirando cu no a kita huiswerk for di enseñansa, a kita esnan cu ta duna training/ guia na e groupleaders cu ki meta y sin consulta cu esnan den field.

Algun di e hustificacion / ehempel di e minister lo ta cu SPO tin cu merge mirando cu nan no ta yena na 100 mucha y cu esey no lo recibi subsidio, cual NO ta berdad. Pa contradeci esey por mira ehempel di scol adventista pariba di brug cu ta 38 mucha y ta ricibi subsidio. Den e mes un contradicionnan aki tin e instruccion di e minister pa no manda alumnonan di emma school, Caquetia school , Paso pa futuro cu ta pasa test pa bay SPO pa no manda pero mas bien laga nan continua na clas 7, tur esaki deliberadamente pa no yega na e cifra menciona di 100 alumno pa SPO. Parlamentario Marlon Sneek ta considera esaki algo Diabolico !

Minister Rudy Lampe tin cu sali afo y bisa kico ta su maneho y punto.
Stop di sconde tras di triki y hinca enseñansa den problema, cual ta condenabel den otro paisnan caminda indiscutiblemente ta e futuro. Ta kibra e oportunidad di cada studiante y existencia di bo pais pasobra ta enseñansa ta e base fundamental. E minister aki no tin structura y e tin tur hende man na cabes, ta locual cu Marlon Sneek a bisa na final.