Minister Publico cu presion politico a laga cera miembro di prensa inocente

 In AVP

Pa casi 30 aña caba di Status Aparte, Partido MEP sea den gobierno of den oposicion, semper a pone presion riba Ministerio Publico a base di loke ta wordo considera como presion politico pa medio di e Minister di Husticia, pa atende cierto casonan den cual e interes politico partidista, ta hunga un rol.

Mike Eman, lider di partido AVP a mustra cu for di rapport traha riba e desaroyo aki cu e titulo di ‘Het Openbare Ministerie als instrument van partij politiek,’ ta ser mustra cu Ministerio Publico por haya orden for di e Minister di Husticia, pasobra Ministerio Publico ta cay bou di e minister di Husticia y no ta completamente independiente manera Corte di Husticia.

Aruba ta keda un comunidad chikito caminda e influencia politico ta masha cerca di practicamente tur desaroyo cu tin riba e isla y esaki no ta diferente pa Ministerio Publico. Ehempelnan ta hopi den ultimo 30 añanan caminda for di tempo cu Hendrik Croes, tata di Prome Minister Evelyn Wever Croes,  tabata Minister di Husticia, varios desaroyo politico a tuma luga y caminda  e a pone presion y a purba usa Ministerio Publico como instrumento politico.

Aki e lider di AVP a menciona entre otro e caso contra ex Prome Minister di Aruba Henny Eman caminda a somete su persona na hopi aña di persecucion, pero cu na final di cuenta a resulta cu no tabatin nada berdad di e acusacionnan sin base cu partido MEP a purba di pega riba su persona.

Mike Eman tambe a mustra riba un caso reciente caminda entre otro e miembro di prensa Marko Espinoza a wordo deteni, poni preso sin hustificacion pa despues Ministerio Publico dirigi un carta na en persona aki, confirmando cu no tin prueba suficiente di parti di Gobierno, pa sostene e acusacionnan presenta contra di sr. Espinoza.

“Loke si Minister Publico cu presion di gobierno actual a logra contra di Marko Espinoza ta di horta seis dia di su libertad, pone den prison, priva di su famia y di su bida diario, simplemente pa rasonnan politico sin cu esaki a duna resltado algun cu ta sirbi interes general di tanto e persona aki como henter pueblo,” Mike Eman a mustra.

E lider di AVP ta kere cu den e caso aki tabata bisto e interes politico su tras, e weganan baho cu a ser hunga pa trata dimancha, no solamente e integridad di un hoben ehemplar, pero tambe  cu e gobierno di AVP. Na final di cuenta e mesun Ministerio Publico ta sigura sr Espinoza cu no tabatin base pa su persecucion y detencion. No tabata tin motibo pa e wordo hiba dilanti di Hues pa para responsabel pa un of otro acto castigabel  y cu awor e ta liber di e acusacion sin base. 

Mike Eman a mustra di ta lamenta e tipo di desaroyonan aki, e mentalidad negativo aki cu tin como consecuencia entre otro cu Ministerio Publico ta birando instrumento politicio di un gobierno di MEP, cu simplemente no ta goberna a base di programa y visionnan politico, pero a base di acusacionan sin base y persecucion ilegal.

E tipo di desaroyonan aki ta di condena y partido AVP ta mira cu awor a inicia un otro capitulo, caminda a bay na cas di ex Minister Benny Sevinger, drenta su cas pa busca informacion ya cu dos miembro di fraccion di MEP, a entrega keho na Ministerio Publico y despues constantemente tabata presiona Ministerio Publico pa tuma accion. Esaki ta otro muestra cu e influencia politico den decisionnan cu Ministerio Publico ta tuma di cua caso nan tin cu investiga of no, ta hopi notabel y bisto. E consecuencia di esaki ta destructibel pa nos pais!

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search