fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Minister Presidente no a reacciona riba aumenta siguro pa polis y ambtenaar

Basta luna atras, miembro di fraccion di AVP, Robert Candelaria a dirigi tambe un otro carta pa prome minister cu pregunta riba  siguro pa tur empleado publico si nan keda dehabilita of si nan fayece durante cu nan ta eherece nan trabounan pa sirbi nos pais. 

Parlamentario Candelaria a mustra cu e carta aki a wordo manda 5 di juni di aña pasa. 

“Berdad prome minister a contesta e carta dia 25 di juni aña pasa, bisando cu lo pidi conseho di Directie Financien y di Departamento Recurso Humano. Loke ta di lamenta ta cu despues di 25 di juni aña pasa, nada mas a pasa. 

Awor laga mi splica cu mi no ta pidiendo pa algo fuera di e mundo aki. Mi a pidi pa aumento di un suma di seguro cu a wordo inicia bou maneho di ex prome minister di Aruba Nel Oduber. Pues ta un maneho existente cu a inicia bou gobernacion di MEP mes. Mi a pidi pa aumenta e seguro, pasobra nos por tuma nota cu cosnan ta saliendo for di man. 

Falta di respet pa autoridad

Mi ta kita un rato di e punto pa splica algo. Sirbidornan publico, ambtenaren y gelijkgestelden manera maestronan di scol ta core riesgo na pia di trabou tur dia. No ta nada nobo, pero e bista y sintimento general ta cu agrecion ta aumentando den nos comunidad.

Hende tin menos respet pa autoridad awendia. Personahenan cu antes tabata wordo respeta pa nan trabou, awor a perde esey. Mi sa cu algun lo bisa cu nan a perde esey pa nan mes via, pero ami ta kere cu apesar di e opinion ey, mester duna nan y tur hende respet sin mas. Respet incondicional!

Berdad ta cu respet ta cuminsa na cas. Cu bon educacion. Mi a trese algun luna pasa, cifranan di un rapport over di desaroyo social den nos comunidad cu ta alarmante. 

Famianan kibra, cifranan halto di divorcio, mucha cu ta lanta na cas cu un mayor so, of sin mayor. Nos sa cu e situacion social den nos comunidad ta bayendo atras hopi lihe, y mucho tiki ta wordo haci pa stop e desaroyo aki, te pa cambi’e desaoyo aki. Loke antes tabata normal cu un mucha lo haña straf na cas, despues cu el a haña straf na scol, no ta pasa mas. Awor tin ora e dolor di cabes ta bira pa e maestro. 

Pakiko mester di seguro?

Mi ta kere cu nos tur por corda e caso sumamente lametabel c’un polis ehemplar a bira victima di agresion durante cu e tabata eherce su trabou. Tin hopi mas caso den e trabou di polis cu ami sa di dje, na unda violencia ta wordo uza contra polis. Ta cosnan cu antes un hende lo no a pensa mes riba dje. Awendia hobennan ta falta polis respet na ordo di dia. 

Pero esaki no ta conta pa polis y maestro so. Hopi otro sirbido publico ta wordo confronta cu peliger di violencia durante nan trabou. 

Mi ta kere cu gobierno como un bon dunado di trabou mester take care di e persona si pa motibo di agresion contra dje, durante y pa motibo di su trabou. Na Hulanda tin un proyecto di ley cu mi ta siguiendo di acerca cu ta bisa cu ora un hende agredi un ambtenaar haciendo su trabou, e lo mester haña castigo di prison. No boete of taakstraf, pero prison. 

Mi sa cu e medaya aki tin 2 banda. E ambtenaar of gelijkgestelden tambe mester haci nan trabou corectamente, mester duna respet pa e haña respet. Mi ta kere tambe cu tin formanan in place pa reclama un ambtenaar of un cu ta gelijkgesteld na ambtenaar ora e faya. Pero ora e ta cumpli corectamente cu su trabou, e no por wordo agredi den ningun forma. Nos comunidad mester para contra esey y mustra cu esey ta inacceptabel. 

Pa e motibonan aki mi a manda un carta di recordatorio na prome minister pa e traha riba esaki. Bin cu e consehonan y ahusta su maneho na bienestar di nos ambtenaren,” Parlamentario Robert Candelaria  a splica.

Un biaha mas Parlamentario Robert Candelaria di fraccion di AVP,  kier pidi gobierno pa stop di bisa cu e ser humano ta central cu nan boca so ya cu ta tur ser humano mester ta central y no esunnan so  di bo color politico so. Tur! Mustra esaki cu bo hechonan y cu bo maneho.

“Laga nan mira maske ta un tiki di loke bo a priminti, dor di duna nan e siguro riba riesgo di trabou pa ambtenaar y polis. Ohala nunca mester hasi uso di e seguro aki, pero ta ainda mas importante cu si un dia mester hasi un apelacion riba dje, cu e ta in place si.”