Minister Oduber ta depolitisa DIP cu dos candidato di POR na cabes

 In AVP

Miembro di fraccion di AVP, sr Benny Sevinger a mustra cu programa di gobernacion di gabinete Wever Croes, cu fecha di 17 di november 2017, a keda acorda cu lo pone henter e proceso di dunamento di tereno, den man di DIP.

Esaki pa motibo cu e minister nobo di infrastructura, Otmar Oduber, ta kere cu e momento a yega pa depolitisa e departamento aki, pa asina evita cu ta beneficia cierto hendenan den e proceso di otorgamento di tereno.

“Aruba tin un gobierno cu for di prome dia caba, ta conoci como un gobierno gañado di pueblo, priminti cantidad di cos, pa despues bira haci net lo contrario di loke a wordo priminti y caminda e consecuuencianan desastroso, ta bay riba lomba di pueblo.

Den e acuerdo di gobernacion riba pagina 28-29 ta ser acorda entre e tres partidonan di coalicion cu minister di infrastructura Otmar Oduber, lo bay bin c’un maneho nobo den e proceso di otorgacion di tereno, pa asina depolitisa e proceso aki y duna mas transparencia na henter e proceso di dunamento di tereno.

E acuerdo ta mustra cu henter e proceso aki lo ta den man di e departamento concerni, esta DIP pa asina evita cu minister lo por influencia e decision of lo tin algo di bisa den e proceso pa asina segun minister Oduber, evita cu politica lo hunga un rol den e derecho di un ciudadano pa haya un pida tereno.

Pero en realidad e minister aki a crea henter sistema caminda practicamente por bisa cu el a centralisa henter e proceso  di otorgamento di tereno via di DIP pero caminda su persona ta esun cu ta defini y dicidi tur cos y kende ta haya un kende no ta haya tereno.

Despues di a firma e acuerdo di gobernacion cu e cambio aki, tur hende ta na altura cu e minister a dicidi di hala tur esunnan responsabel den maneho di DIP un banda y na luga di nan, el a nombra dos candidato cu tabata riba lista di su partido  POR como esunnan encarga cu e proceso aki.

Un di e candidatonan aki di POR ta esun cu ta atende cu otorgamento di tereno comercial y otro cu otorgamento di tereno pa vivienda, pues na luga di depolitisa e proceso, esaki ta completamente den man di politiconan di partido POR cu na cabes e propio lider di POR, esta minister Otmar Oduber.

Tur siman e minister aki ta sinta na DIP y repasa henter e maneho cu e kier mira cu ta wordo ehecuta y ta repasa entre otro e lista di peticionnan pa tereno di ciudadanonan cu ta buscando un pida tereno pa construi un cas.

Pues e minister kier a crea e impresion cu tur hende  tin derecho di haci peticion pa un pida tereno pero cu esaki no mester ta a base di su color politico pero cu su maneho y cambionan introduci na DIP, awor politica ta wordo haci mas cu nunca.

Pues aki un biaha mas ta keda confirma cu e actual gobierno no ta sincero cu pueblo, no ta cumpli cu promesanan haci y ta duna pueblo informacion falso y ta crea scenarionan pa saca probecho politico di esaki.

Por ehempel tin un aviso den medionan di comunicacion cu dia 29 di mei oficina di DIP ta cera pero esaki pa e hecho cu e minister  a bolbe organisa un gala presentacion politico pa duna un centenares di ciudadano nan papel di tereno, of mas bien nan peticion pa tereno, den un ambiente politico total cu ta net lo contrario di loke nan a acorda den e acuerdo di gobernacion,” Parlamentario Benny Sevinger a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search