Ora cu scucha minister di deporte Dangui Oduber declara na prensa cu ‘deporte lo no pena pa largo’ e ta bisa hopi di un mandatario cu no tin nocion di deporte of no tabata na altura tur kico a bin ta pasando den deporte na Aruba den su periodo como miembro di parlamento.
Lider di fraccion di AVP, sr Marlon Sneek a sigui mustra cu esaki ta otro ehempel di un minister di gabinete Wever Croes cu a asumi responsabilidad di gobernacion y no tin nocion kico e tin cu haci mescos cu henter  gabinete Wever Croes cu a pasa un aña sin logra algo positivo pa pueblo.

“Ta increibel scucha minister Oduber haci e tipo di expresion aki, ya cu si a cumpli cu su responsabilidad tempo cu e tabata miembro di parlamento, a pone atencion na loke gabinete Mike Eman tabata haciendo, e lo a ripara cuento a ser haci pa organisacionnan cu tabatin mester di ayudo  riba nos isla.

Un aña a pasa bay, un aña di promesanan sin cumpli, di ningun proyecto realisa y awor ta bolbe haci otro promesa na pueblo cu deporta lo no pena pa largo.

Loke si pueblo por a ripara for di prome dia cu minister Oduber a bira titural di deporte, ta pa trata di cambia e situacion rond di Fundacion Lotto pa Deporte, buscando tur forma pa haya control riba maneho di e fundacion aki pa asina e fiesta cu a dura for di 2001 pa 2009 bolbe inicia y bolbe bira un fuente di abuso propio, di abuso di famia y amigonan y nada pa pueblo.

Eynan minister Oduber a hinca su esfuerso y awor despues di un aña e ta bin dilanti y bisa cu deporte lo no pena pa largo  pero mirando cu ainda e minister no a presenta su plan di deporte, ta sigur cu pueblo lo tin un tempo largo ainda pa bay prome cu nan mira algo positivo for di su maneho di deporte.

Un cartera cu e no tabata prepara p’e, mescos cu e otronan cu tambe ta bou di su maneho actualmente pero  nunca el a duna atencion na un serie di desaroyo y inversionnan cu gobierno di AVP a percura cu proyectonan den bario.

Ta bin pa menciona e serie di proyectonan cu gabinete Mike Eman a logra ehecuta cu minister actual di deporte no a ni tuma nota di esakinan:

• Yuana Morto Complec Outdoor training machine
• Madushi Stars renoba
• Brazil Jrs veld grandi mantencion
• Rough Riders Racetrack donacion
• BMX Weg Seroe Preto renoba
• La Fama donacion
• Veld basketball Sabana Basora
• Universal looppad nobo
• Rockets field mantencion
• Arsenal backstop y tribuna
• Caravel renobacion
• CdB Ayo traha tereno baseball
• CdB Ayo mantencion
• Hotwheels Bloumond renoba
• Tereno Simon Antonio renoba
• Basketball veld Dakota renoba
• Bushiri Karting pone luz
• Aruba Jrs donacion
• Bubali tribuna renoba
• United tribuna nobo
• CdB Noord tereno renoba
• Marlins Saliña Cerca donacion
• Calbas tereno renoba
• Mini turf Madiki (FCCA)
• Mini turf Bushiri (FCCA)
• Mini turf Cura Cabay Zuid (FCCA)
• Mini turf CdB Brazil
• Mini turf RCA
• Mini turf La Fama
• Mini turf Arsenal
• Mini turf Ayo
• Mini turf Dakota
• Mini turf Washington
• Mini Turf Club Primavera
• Battingcage CdB Savaneta
  Battingcage Rockets Sta Cruz
• Battingcage Baranca di Ayo
• Battingcage Flatstones
• Battingcage Calbas

Ta cosnan cu nunca minister Oduber a duna atencion ora cu esakinan tabata wordo haci ya cu ora ta haci cosnan positivo pa pueblo, e interes di mandatarionan di gabinete Wever Croes, nunca a wordo mira como algo positivo.

Den e vision y mentalidad di ministernan di e gobierno actual, ta famia, amigo y sponsornan ta bin den e volgorde ey y kisas algo lo resta pa pueblo pero despues di un aña den gobernacion, esaki ainda no a sosode.

Kisas e miho expresion cu minister Oduber por a haci na luga di ‘deporte lo no pena pa largo’ lo tabata miho e sigura  tur hende cu ‘pueblo lo no pena pa largo,” Parlamentario Marlon Sneek a declara.