fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Minister Flip Flop Lampe tin cu bay pa elimina preocupacion grandi den enseñansa

Fraccion di AVP diamars ultimo a haci entrega di otro carta na Presidente di Parlamento, pa yama un reunion cu Minister di Enseñansa Rudy Lampe, ya cu e fraccion ta haya cu ta falta di respet total loke a tuma luga algun dia anterior c’un grupo di maestronan cu a bin entrega caba un manifesto na Vice Presidente di Parlamento.

Lider di fraccion di AVP, Marlon Sneek a mustra cu e cos aki ta inaceptabel ya cu vice Presidente di Parlamento a priminti e grupo di trahadonan aki cu nan lo ricibi contesta riba nan preguntanan den dos dia di tempo pero mientras tanto e dianan a pasa y Parlamento a bay cu reces y ningun contesta of reaccion e grupo di maestronan aki a ricibi manera priminti.

“Ta simplemente un falta di respet total  pa un grupo di trahadonan den enseñansa a bin Parlamento y haci un peticion y vice Presidente di Parlamento ta haci un promesa cu e no a cumpli cune.

E peticion di e maestronan aki ta mesun peticion cu fraccion di AVP a yega di haci caba un luna pasa caminda nos a pidi un reunion publico pa nos atende cu e situacion cu ta reinando den enseñansa.

Awor tur hende a yega vakantie di scol y e maestronan ta bibando den un incertidumbre ya cu ningun hende sa kico a bay pasa ora cu scol habri bek y nos por tende for di veld cu entre otro tin un scol pa basha abou na Santa Cruz, pues un cantidad di incertidumbre.

Nos ta lamenta cu Parlamento a keda keto,  a bay den su reces anto esunnan cu a bin protesta no a haya un contesta y mas c’un biaha Parlamento, basa riba puntonan hopi importante, por a scohe  pa hala e reces un of dos dia mas atras pa asina atende y cumpli cu e preocupacionnan tin bou di e maestronan.

Awe nos por wak cu no a duna oido na esaki y simplemente ta bay cu reces sin atende cu e peticion urgente cu a maestronan di scol a trece aki na Parlamento y pa e motibo aki tambe fraccion di AVP ta entrega e di tres carta riba mesun peticion aki pa un reunion publico pa asina e Minister bin duna cuenta riba kico e ta haciendo.

Locual e maestronan a trece dilanti den nan peticion y  pa fraccion di AVP ta hopi serio.

Nos por mira cu e Minister di Enseñansa ta hunga rond di e cos, purba di hinca AVP aden entre otro bisando cu ta AVP a hinca tur cos den otro y cu nos kier baha gobierno pero tur hende a haya copia di e carta cu a wordo entrega den un manifesto y e manifesto ta papia palabra cla.

E hendenan aki kier pa Minister di Enseñansa baha bay, pa motibo cu e no ta sirbi ya cu e ta dañando enseñansa y e carta no ta papia di baha gobierno, e carta no ta papia di gabinete Wever Croes, pero e carta ta papia di sr Rudy Lampe kende ta Minister di Enseñansa, kende den nan concepto no ta sirbi y cu e Minister tin cu bay.

E Minister ta purba di hunga un wega bisando cu loke nan kier ta baha gobierno, no shonnan, nan no kier baha gobierno pero loke nan kier a pa e minister aki bay pasobra e no ta sirbi pa e trabou aki.

Ta imposibel cu cada decision cu Minister Lampe a tuma, e tin cu hala tras bek pasobra cu e no tin sosten pa esakinan y  el a bira Minister Flip Flop ya cu awe e ta links y mayan e a rechts y esey ta inaceptabel pasobra ta daña e ta daña enseñansa y nos no por acepta esaki, ya cu esaki ta nifica cu futuro di nos yiunan ta man di un hende kende no sa kico e ta haci y simplemente a bira un Minister Flip Flop.

Awe e ta bay cera HAVO langtrayect y pa su mayan a cambia di pensamentio, awe e ta bay cera Tra’i Merdia y mayan el a cambia di pensamento, awe e ta bisa SPO ta muda y mayan e ta bira bisa cu e no a muda mas.

Kiermen e no sa kico e ta haciendo y ta na su luga pa e Minister tene e honor na su mes y   bay, cobra su wachtgeld trankil na cas y laga e maestronan di scol na paz.

Fraccion di AVP ta spera cu pronto haya for di Presidente di Parlamento un contesta riba e carta cu nos a manda , ya cu nos tey y si yama e reunion aki mayan mes, mayan nos lo tey y cu nos por atende cu e asunto aki ya cu e tema aki ta importante y no por laga esaki drumi pasobra ta trata di futuro nos yiunan,” lider di fraccion di AVP, Marlon Sneek a declara.