Minister di Husticia no por keda cla cu nombracion di Altocomisario nobo

 In AVP

Undi e precupacionnan cu maneho di Minister di Husticia, Andin Bikker, ta su ‘benoemingsbeleid’ y su incumplimento di promesanan haci, asina miembro di Fraccion di AVP, Robert Candelaria a declara. Entre otro el a mustra cu ainda ta spera cu Minister por pone su priodidadnan na ordo, ya cu tempo cu e Altocomisarioanterior a anuncia cu e lo baha, Candelaria a haci un apelacion riba e Minister, pa laga e Hefe di Polis keda te ora e logra werk in un Korpschef nobo.

“Minister a scoge pa no haci esaki. El a scoge despues pa nombraun Altocomisariotemporal caminda e periodotemporal a caba y Minister Bikker a scoge pa prolonga e nombraciontemporal. Awor pronto e periodo di prolongacion tambe lo yega su fin y nos ta spera cu Minister di Husticia tuma un decision awor si pa duna claridad na Cuerpo Policial, na esunnan riba e funcion, na partners di Cuerpo Policial y na pueblo di Aruba en general.

Un Cuerpo di polis mester di claridad ken ta e capitan na stuur. Sinembargo ta conoci den pueblo caba cu e Minister aki a priminti hopi cos tempo di campaña manera entre otro cu e lo bin cu 200 Polis nobo pero awor ta bin c’un klas di apenas 14 adspirant! Esaki ta un druppel riba un plachi cayente caminda tambe el a priminti cu lo bin bek c’un concepto existente di ‘barioregisseurs.’

Loke nos por a mira di esaki ta cu a verf un post di Polis existente algun luna atras,  pa corta e sinta ora esaki a keda cla y algun dia pasa por a mira den medionan di comunicacion cu e post a keda para bashi y bandona sin cu ningun Polis traha eynan. A splica Minister Bikker e tempo ey cu ‘barioregie’ no ta algo simpel y mester scoge y educa e Polisnan cu hopi cautelapa e trabou aki. Mester ekipa nan pa e funcion y nan guia tambe ta importante pero te dia di awe nada a wordo haci pa cumpli cu e promesa aki di Minister Bikker. 

Minister a priminiti mas cosnan manera maneho pa auto cu por core nan so, cu te dia di awe no ta cla pa nos kico e relevancia di esaki ta, mirando e retonan grandi di falta di maneho cu nos tin nos dilanti y cu mester atencion prome c’un auto sin chauffeur.

“E minister a priminti cu lo bin c’un Fastferry cu tampoco no ta cla pa nos ta pakico Minister Bikker ta papia riba esaki y no su colega di transporte. Pero sea ken sea papia riba dje, te ainda ta parce cu e proyecto aki no kier mira lus di dia, siendo cu den husticia tin hopi cos cu mester di atencion urgente di Minister Bikker,” asina Parlamentario Candelaria a señala.  

E miembro di fraccion di AVP a sigui mustra cu asina tambe a priminti un maneho di heling, alarma pa tur cas, accion contra high impact crimes, scol pa educa wetgevingsjuristen, Ley di cybersecurity (cu lo a pone cu e Minister aki ta prome cu biento manera e mes a bisa) y asina por sigui menciona. “Awor mi no ta bisa cu su trabou ta facil, pero si pa tanto aña el a critica su predecesor y a exigi pa e baha, pero awor e unico cos cu e por tin pa show cune ta di su predecesor manera e Veiligheidshuis, etc etc,  y e ta laga bo pensa si cu algo no ta klop.

Si bo priminti 10 cos y cumpli sikiera cu mita, por bisa cu bo a traha si. Pa haña ehempel awor di loke el a priminti y logra cumpli ta hopi dificil,” Robert Candelaria a finalisa bisando.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search