Minister di Enseñansa Rudy Lampe ta un “Chance taker” creando confusion y caos

 In AVP

Parlamentario di Fraccion di AVP mr.drs. Arthur Dowers a sigui di cerca e acontecimento bochornoso tumando luga cu e actual Minister di Enseñansa, dr. Rudy Lampe. Den un tempo record, e persona aki a sa di crea basta confusion y caos den enseñansa y crea desconfiansa entre hopi hende, no solamente den su persona, pero den Gobierno completo, pa cu e maneho cu e ta hibando!

Parlamenario Dowers a bisa cu ningun hende por kere den e palabra di e Minister aki, awe e ta bisa un cos y pa su mañan un otro storia. Na momento cu e ricibi un poco presion, e ta core cambia version. E ta un Minister cu ta un “ Chance taker”, purbando di mira te con leu e por bay, hungando cu su suerte cu e “veld” y mira si nan ta para contra dje si of no. Ta locual el a bin ta haci, creando masha hopi incertidumbre y disgusto den enseñansa cual no ta contribui na e trankilidad cu mester tin pa por duna les y guia alumnonan como debe ser.

Parlamentario Arthur Dowers ta sigi bisa cu, a yega cerca nan algun informacion cu a sorprende nan, con di forma structura ta gara e Minister ta gaña y inventa un storia, caminda e Minister aki a bin dilanti y bisa cu tur cos den su direccion ta un “FAKE News’. Na momento cu desenmascara su mentira y esaki sali den publicidad, su miho contesta na pueblo ta cu e ta un fake news.

Minister Lampe ta bin cu su ideanan cu e kier privatisa parti di enseñansa cu ta cay bou Gobierno sin hustificacion, ni estudio ni motibo. Dowers di su banda a bisa cu na mas di un ocacion a bisa cu e plan cu Lampe tin ta di privatisa Enseñansa, pa asina e por pone den man un grupo yega na dje y asina ey nan bay dicidi riba futuro di hende riba e pais aki.

Esaki ta algo cu HAMAS MAG DI PASA !

Na Aruba tin scolnan priva caminda cu nan ta dicidi pero scolnan publico tey pa garantisa cu Gobierno ta cumpli cu un tarea cu e tin pasobra ta derecho fundamental pa garantisa cu un y tur ta drenta y ricibi enseñansa. Di su banda e Minister aki kier pone e enseñansa den man di un grupo priva pa asina nan dicidi riba futuro.

A tuma nota cu e Minister Lampe a bisa cu no tin placa/fondo pa enseñansa, esaki ta algo cu Dowers a biba, esaki na momento cu su persona tambe a fungi den e encargo aki, cu nunca tin suficiente placa pa haci locual kier haci y cumpli cu deseonan den enseñansa y logra hisa e calidad manera ta desea, pero realidad di bida ta si cu por haci mas esfuerso pa logra haci cu e tiki medionan cu tin. Sorprendentemente e Minister aki, despues di a vocifera di no tin placa, a opta pa tuma e poco placa disponibel pa enseñansa y hinke den un conferencia di Cannabis! Na mes momento e mesun Minister aki a confirma cu e conferencia no tabatin nada di haber cu enseñansa pero mas bien cu salud pero asina mes a uza e fondo di enseñansa y hink’e akiden. Lantando asina e pregunta ta dicon a opta pa esaki, mientras cu e Minister encarga pa cu Salubridad Publico ta dispone di fondo y por a haci uzo di dje. Sin splicacion y ta keda algo lamentabel pasobra a kita placa for di criaturanan y pone den conferencia cu ningun hende y sigur no e muchanan den enseñansa tin beneficio di dje.

E gobierno aki su “Trademark” ta di Gañamento!

Pueblo completo por a presencia momento cu periodista, den e caso aki Speed Andrade, a pone den skina y e la haye ta inventa un mentira mas riba e pregunta si Croes, di su partido, ta huma Marijuana of Cannabis Medicinal si of no. Como contesta el a duna cu su colega lo ta na man di su dokter, cu ta ricibi receta pa cannabis medicinal y cu esaki ta algo cu e lo ta buscando na botica. Ta un ridicules total locual el a declara, tur hende na Aruba a cuminsa cuestiona ta cua dokter y na cua botica ta receta esaki, poniendo nan den problema. Te cu awo no por a saca afo ta cua dokter esaki ta. Tampoco a tende ni di Huisartsenvereneging of Minister Lampe bin afo y bisa ta na cua dokter y botica ei ta referi na dje. Locual e tin cu haci ta: “Stop di Gaña Pueblo!” Dowers a bisa.

Na final Parlamentario Dowers a manda un conseho pa Lampe, bisando cu e ta di sumo importancia pa cada Minister keda ocupa su mes cu su tarea, placa di enseñansa ta scars, purba na uza tur fondo cu tin na locual ta regarda enseñansa y laga Cannabis den man di Minister di Salud publico y pa su persona haci locual e tin cu haci den asunto di cannabis medicial. Enbes di enfoca riba e bagamunderia cu e ta haci, e stop cu tanto gañamento y trece seriedad den enseñensa cu ta e parti mas importante den formacion di nos comunidad.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search