Minister Andin Bikker tene honor na su mes y baha como minister

 In AVP

E momento a yega pa papia palabra cla y segun lider di fraccion di AVP, sr Marlon Sneek, ta mustra cu e dia a yega pa Minister di Husticia Andin Bikker saca su conclusion y ta mustra cu Andin Bikker mester entrega su retiro.

“Awe diamars por mira cu Parlamento di Aruba a yama un reunion cu mester a tuma luga mainta pero a cambia esaki di 9’or pa 2’or y aki ta yama un reunion y na mes momento traha un articulo  caminda minister Bikker ta hunga masha duro y e articulo publica ta mustra cu “Parlamento a manda yama Minister pa duna cuenta.”

Un comedia di prome orden ya cu e reunion aki a wordo yama den un Commissie y na Parlamento di Aruba, reunion di comisionnan ta secreto y loke wordo debati of wordo bisa den e reunion aki, tin cu keda den e cuater murayanan di parlamento.

Tur hende por corda un caso na Corsou caminda un parlamentario a dicidi di saca informacion riba un reunion di comision cu a tuma luga, el a ser hiba dilanti di Corte caminda e mester a paga un multa pa viola e punto aki.

Pues si e minister y su fraccion ta sincero cu pueblo, e ta yama un reunion publico, caminda pueblo den su totalidad ta bay scucha ki pregunta ta wordo haci na e minister y pueblo den su totalidad por scucha kico e minister ta bay contesta.

Tur hende por corda cu e minister aki kende den su prome reunion despues di cambio di goberncion, cual tabata un reunion riba ex minister Paul Croes, el a duna un catedra bisando net den e tempo ey cu e minister di siguridad y defensa di Hulanda, e minister Hulandes aki a entrega su retiro pasobra tabatin un training di militarnan Hulandes caminda soldaatnan a uza granadanan cu tabata bieu cu consecuencia cu el a crea un accidente.

E minister Hulandes aki no tabatin e culpa di loke a tuma luga pero pa no crea e ‘schijn’ e mandatario Hulandes a entrega su retiro y awe e mesun minister Bikker aki cu a usa e ehempel aki e tempo ey, nos kier wak si minister di husticia aki a ‘rise to the ocasion.

Si e minister aki ta bay ‘practice’ locual el a ‘preach’ e dia ey den parlamento di Aruba pasobra un minister caminda cu Hof mester saca un carta pa bise cu locual el a trece dilanti den publico, no ta corecto y caminda Hof den su carta fecha 6 di mei 2019 ta bisa e minister aki, cu loke Hopf ta toets ta a base di leynan di e pais aki.

Lo mas importante ta con Hof ta caba su carta den e comunicado di prensa bisando textualmente: “De rechter commissaris heeft dus NIET beslist dat het Land verplicht was om de bewaring van de vreemdelingen op te heffen en om hen in vrijheid te stellen.”

Esey ta contenido di e carta oficial emiti, pues cosnan cu ta tumando luga y cu ta mustra riba deficiencia den e maneho di minister di husticia Bikker.

Poco dia ey nos por a mira un carta di Banco Central y awe ta un carta di Hof  cu ta bisa minister Bikker cu loke bo ta trece dilanti, no ta corecto y mi ta kere cu e momento a yega pa minister saca su conclusion.

Banda di esaki ta bin e escandalo di helikopter caminda awe nos por mira tur caminda un helikopter cu no ta produci, un helikopter cu na e momentonan aki, segun con contract ta costa e pais aki 195 mil florin pa luna, ningun hende por mira kico e helikopter aki a haci.

Unico cos cu tur hende a ripara ta cu el a duna direccion robes na polisnan durante di un persecucion caminda polis a dal auto kibra cual ta unico logro di e helikopter aki pero apart di esaki y nada no a pasa.

Banda di esaki, awe nos a tende cu den e contract di e helikopter aki no a tene cuenta cu tur cos, no a tene cuenta cu ‘landingfee’, no a tene cuenta cu ora e helikopter tin cu bay tuma fuel, pues no a tene cuenta cu e placa cu tin cu wordo paga na fuel.

Den e contract segun nos a compronde, ya cu nos a manda pidi e contract pero ya algun luna a pasa y ainda e gobierno aki cu ta papia di transparencia, e minister di inhusticia aki no por contesta preguntanan haci relaciona cu e helikopter.

Minister Bikker ainda no por bin dilanti y duna Parlamento e informacion cu parlamento a pidi pero ta esaki ta e gobierno cu a institui un comision pa bay traha riba bon gobernacion, un comision pa bay traha riba transparencia.

Parlamento ta controla gobierno, parlamento a manda pidi e contract y ainda nos no por haya e contract y si ta berdad cu e contract aki no tin e landingfee y no tin e fuel aden, loke ta nifica  cu henter e proceso di bidding a bay robes.

No por ta asina cu ami ta entrega un bidding teniendo cuenta cu tur e aspectonan aki anto esun cu a gana mi den e bidding, no tin placa pa fuel y placa di landingfee hinca aden, pues e bidding aki a bay full robes.

Minister Bikker tin cu tene e honor na su mes y baha, manera e mes a bisa di e minister di defensa di Hulanda algun tempo atras y awe mi kier wak si minister Andin Bikker tambe ta bay tuma e mesun caminda aki pa e no crea e ‘schijn’ manera su persona mes a trece dilanti den Parlamento,” lider di fraccion di AVP, Marlon Sneek a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search