Mester percura pa derechonan internacional di mucha keda central den decisionan di gobierno

 In AVP

Oranjestad: segun sra Jennifer Arends-Reyes dia 20 di november ta dia internacional di derechonan di mucha y e aña aki ta cumpliendo 30 aña cu e tratado internacional aki ta existi. E ta un di e tratadonan internacional cu dia 6 di februari 1995, reino Hulandes a ratifica y cu constantemente mester keda un liña cora den tur gobernacion y ministerio. Durante transcurso di añanan tin hopi mas campaña di consientisacion, instancianan cu a ser funda pa cu e thema di derechonan di mucha y esey a contribui na diferente cambio, cambio den leynan, maneho y mehoransa na beneficio di tur mucha cu ta biba na Aruba pero ainda mester bisa cu falta hopi mas atencion pa locual ta e consecuencianan di decisionan di gobierno ariba nos muchanan.

Por ehempel na momento cu costo di bida incluyendo transporte subi drasticamente, e ta bai tin su consecuencianan ariba nos muchanan y e presion pa mayornan. Despues di 2 aña Aruba mester a conose entre otro scol gratis pa tur mucha, schoolgeld lo mester a pasa pa pasado, airco pa tur nobenti pico scol na Aruba, cuminda pa tur mucha na scol, un staatscrèche, lo mester warda menos pa cuido di salud, lo duna amnestia y abusadornan di grandi of chikito no lo sali liber mas etc. Esakinan ta apenas algun promesa di campaña cu te ainda Aruba ta wardando riba dj’e. A resulta cu awendia muchanan tin preocupacion cu nunca si lo tin cuminda riba mesa of no, of si su mayornan lo keda cu trabou, si tin placa pa gasolin pa hiba nan practica deporte, si a resta placa despues di paga awa of coriente pa cumpra cuminda of si nan tin cu warda 3-4 ora prome cu wordo yuda na dokter of hospital. Aruba ta pasando den momentonan dificil caminda cu tur decision di gobierno tin efecto y presion ariba nos famianan na Aruba.

Cuido di salud, educacion y protecion ta importante pa nos por brinda nos muchanan na Aruba y ki nan gobierno tin un papel importante pa cumpli cun’e na un manera efectivo cu por ser midi, pa por wak e avansenan den e inversionan di fondonan publico y ta netamente esaki ta un di e criticanan di por ehempel e Sociaal Crisis plan cu e gobierno di Mep-Por-Red a bin cun’e. Un fondo di 18 miyon pa aña pa e Sociaal Crisis plan cu antes tawata primordialmente den presupuestonan di Ministerionan y cu e fondonan tawata yega cu hopi mas facilidad na e instancianan, awor e fundacionan ta lucha pa yega na fondonan pa nan proyectonan. Aruba constantemente mester keda traha riba themanan cu tambe ta pasa cu hopi frecuencia ariba nos isla y tin data existente riba dj’e di instancianan local y un di e themanan aki ta violencia contra mucha. Campañanan fuerte mester purba mitiga e fenomeno aki den nos comunidad cu ta violencia na cas. Tin diferente forma di violencia, fisico, verbal, sexual y emocional ta pasando cu mas di un biyon mucha rond di mundo sin conta neglihencia cu tambe ta un tipo di maltrato y serca nos na Aruba e cifra nan ta halto, caminda 1 di cada 15 mucha ta experiencia un sorto di violencia, e impacto di e violencia aki contra nos muchanan ta laga un marca grandi den nos adultonan di mañan, mescos cu e thema di e aña aki, ‘children today, our keepers tomorrow.’ Sin conta e era cu nos ta bibando aden caminda hopi mucha ta experiencia bullying cybernetico of un of otro tipo di discriminacion. E ta trece cun’e inseguridad serca nos muchanan cu ta trece reto cun’e pa nan desaroyo. E trabou colectivo pa lanta un mucha sano den nos comunidad ta continuo y ta algo cu esnan cu ta na mando di un pais tin cu percura pa cumpli cu nan parti por ehempel pa tin trabou y pago husto, acesibilidad pa cuminda nutritivo, trankilidad, ayudo rapido, cuido structura pa grandi y chikito pa nos pais por progresa caminda cu e ultimo dos añanan Aruba a faya basta riba e puntonan aki y tawata tin hopi inseguridad pa famianan sra Arends-Reyes ta termina bisando.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search