MEP ta enamora na BBO y ta ehecutando Empobrecimento Nacional atrobe

 In AVP

E impuestonan indirecto, segun lider di partido AVP, mr Mike Eman, tin masha punto a-social cun ‘e. Lamentablemente esnan cu a bin cu BBO y awo ta papia di un otro impuesto a-social.
Internacionalmente ta wordo bisa cu e impuesto mas a-social ta e impuestonan indirecto cu Prome Minister Wever Croes ta asina enamora di dje, pa redobl’e of pa bin c’un version nobo un sales tax di 10%.
Expertonan social / economico a studia con e pueblo ta absorba un impuesto asina y con su impacto ta riba costo di bida. E impuesto aki ta cay den e categoria di “regressive tax”.
Sr Eman a splica cu Inkomstenbelasting ta uno progresivo, mas placa un persona ta gana, e porcentahe ta subi pa cual e suma absoluto c’un persona ta paga ora gana hopi mas, ta den proporcion cu su salario. Esaki no ta e caso cu impuesto indirecto. E impuesto aki ta laga esnan di menos recurso paga mes hopi cu esnan di mas recurso. Esaki no ta husto.
Loke ta mas a-social di BBO, cu a wordo introduci door di MEP y aumenta aworaki cu e intencion pa cambie pa un sales-tax, ta un impuesto cu ta kita propocinalmente un suma mas grandi for di esnan di entrada abou compara cu esnan cu ta gana mas.
Pues e tipo di impuesto aki ta pisa mas pa esun cu ta gana p.e. 1800 florin compara cu esun cu tin un salario di 5000 florin. Nan ta paga e mesun porcentahe.
“P’esey e tipo di impuesto aki ta conduci na pobresa. P’esey por mira cu den menos di un aña ta mira casonan di pobresa den nos pais, ta scuchando di hende cu no por paga nan cuentanan di utilidad, no por paga pa cuminda, schoolgeld.
Esaki ta pasobra e Gobierno aki a logra algo cu bo ta bisa cu normalmente ta casi imposibel: Empobrecimento nacional, cu e forma con e ta aplicando redoblacion di impuestonan na Aruba, pero tambe a aplica e BBO riba un cantidad di otro areanan unda antes e no tabata wordo cobra.

Asina hendenan ta bisa cu di repente den nan cuentanan di banco ta haya gastonan adicional. Otronan ta bisa den cuenta di seguro tambe ta haya gasto adicional. Asina ta mira cu e sistema di impuesto aki  ta conduciendo na un perdida di poder di compra sumamente grandi.”
E lider di AVP a sigui mustra un ilustracion di e encuesta unda cu a constata caida di venta cu mas di 25% registra den tur tienda na Aruba. Esaki ta logico, pasobra ora cu redobla un BBO cu ta pasa riba tres schakel, si hacie 6%, su impacto final ta riba 18%. Ta mir’e den e aumento dramatico di comestibles na Aruba.
“E sistema aki di hiba un Gobernacion, aumentando bo gastonan mas cu 100 miyon y laga pueblo paga p’e, ta causa un empobrecimento hopi grandi na Aruba. Esaki no ta prome biaha cu Gobierno di asignatura geel ta haci algo asina.” Situacion similar a registra na 2008 ora cu Gobierno di MEP a impone un cantidad di medida y el a ilustra esaki cu un cuadro di informacion.
Den esaki ta mira cu e perdida general di poder di compra su averahe a yega na mas di 15.6%. Y Budgetonderzoek a mustra cu personanan di recursonan minimo a perde 28% di nan poder di compra. “Esaki no ta mal gobernacion mas pero ta criminal.
Ora cu bo ta kita mas di 25% di un persona cu un entrada di minimal 1000 florin, ya esaki no ta normal, ta hibando un Gobernacion sin ningun sentido y sin ningun sentimento pa pueblo.”
El a papia di estadisticanan cu ta mustra cu di 2001 bin ariba a hiba e mesun maneho aki door di MEP, cu a conduci na un inflacion halto, empobrecimento cu a causa cu na 2009 pueblo di Aruba a duna AVP un mandato di 12 asiento.
Esaki pasobra den cada skina di e pais a sinti e pobresa, a sinti cu un grupito previlegia tabata tuma tur e beneficionan di e pais na gastonan di Abogado y huurmento di edificio, mientras cu pueblo ta paga pa esaki via di BBO.
E comentario di Gobierno cu mester bini cu medida pasobra AVP a laga debe, Eman a contesta di e siguiente forma.
“Esun cu a laga debe den e pais aki na 2009 cu AVP a hereda, cu tur e careteranan di Aruba kibra, a costa hopi placa pa drecha esakinan. E debe cu a laga centro di ciudad den ruina, y a costa pa drecha tur nos infrastructra; e debe cu a laga barionan den ruina, pa cual mester a drecha barionan di Aruba; a laga debe cu a laga cu pa 8 aña largo no a duna empleado publico indexering, e debe ey AVP a hereda; e debe di onderstand trekkers cu pa 8 aña largo no a haya ahuste, AVP a hereda. AVP mester a tapa tur e buraconan aki pa drecha nos Pais y drecha poder di compra cu awe ta worde ruina atrobe.
Ta e debenan aki nos mester a paga pa duna Aruba un cambio di ruta. Wak rond den e pais, mira e careteranan awe cu tin na Aruba; wak e hospital nobo, wak e waf nobo, wak e barionan, wak e edificionan. Tur cos nos a drecha. Tanto fysico como den entrada di nos hendenan.
Negligencia den añanan di MEP cu no a drecha nada den pais, pero tabata coy e placa pa famia, pago di Abogado, pago di huur y enrikise e famia, mientras ta ta nenga e trahado un indexering, esaki tabata e realidad e tempo ey y awe atrobe, e lider di AVP, Mike Eman a bisa.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search