Maneho y vision di gabinete Wever Croes yama ‘Castigo pa Pueblo’

 In AVP

Durante e conferencia di prensa di AVP diamars mainta, e lider di partido AVP Mike Eman a papia riba e situacion dificil cu e pueblo ta pasando aden. 

“Nos a lanta awe cu preocupacionnan hopi grandi, cu desaroyonan den nos pais , y nos ta mira un malcontento amplio bou di e pueblo y den tur sector di nos pais,” e lider politico a bisa.

El a señala por ehempel e accion cu tabatin diamars mainta na hospital unda sector enfermeronan ta sinti nan mes defrauda cu e falta di atencion y guia pa por percura pa un bon maneho na Aruba. 

Banda di esaki, tin e situacion reinante na KIA, den Cuerpo Policial, bou contractistanan chikito, den mundo di transporte, etc. Tur caminda ta desapunta y disgusta pa e falta di atencion di parti di Gobierno. 

No tin un maneho ni vision di parti di Gobernantenan pa cual e ta wordo sinti hasta den e problemanan social, unda no tin ni bishita na e barionan pa scucha kico ta preocupacion di e ciudadanonan. Si antes durante e bishitanan aki, ta atende casonan individual, problemanan individual, awo no tin atencion at all pa e casonan specifico den e barionan. 

“Si e atencion, curason no t’ey, ta mira loke ta mira den e dianan aki, unda cu poco-poco e hendenan aki ta perde. 

E sentido di desapunto, cu ta sinti su mes totalmente defrauda pa un Gobierno cu no tabatin un legitimidad cla (un Gobierno gelapi), ta bira mas grandi.” Segun Eman, ta mas cu husto cu e ciudadanonan ta expresa nan mes, y ta mas cu logico cu e ciudadanonan ta sali pafo pa expresa nan dolornan. Tambe el a sinti un desapunto hopi grandi riba e ausencia di un rol di parti di sindicatonan cu a compromete nan mes na Gobernacion, enbes di compromete nan mes na trahadonan.

Asina tambe e lider di partido AVP a referi loke cu a keda publica den e prensa e siman aki, esta e posibel introduccion di un “Sales Tax” di 10% rib pueblo. 

Gobierno ya caba a redobla e BBO, causando un dolor sumamente grandi. E cifra di inflacion entre 2017 pa 2018 tabatin un aumento di 11.7% di inflacion riba cuminda, registra door di CBS. E ta puntra con por ta posibel den un pais manera Aruba e pueblo ta perde mas cu 10% di su poder di compra pa cu su prespuesto di cuminda, y sindicatonan cu ta representa empleadonan no ta sali bringa pa indexering, pa aumento di sueldo pa cubri e 10% di perdida di poder di compra, y ta accepta e sla aki pa e pueblo trahador. 

Poco-poco awa ta yega na nanishi di tur empleado aki na Aruba y lo yega momento cu nan lo bisa cu si sindicato lo no lanta para, como pueblo lo mester lanta para pa protege e interes di nos yiunan.  “Y esaki ta loke ta tumando luga aworaki. Pesey tin Marcha Nacional dia 12 di April”

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search