E pakete di medidanan cu Gobierno a bin cun’e den su prome aña di Gobernacion, ta causa cu e pueblo ta pasando den dolor y e efecto aki ta wordo pasa riba comercio cu tambe ta sinti esaki.
A lo largo e ta keda un circulo cu e efectonan ta keda presenta pushando e pueblo pa bay fondo. Den un conferencia di prensa diahuebs mainta, líder di AVP Mike Eman a presenta un biaha mas kico ta e efectonan di e maneho di medida cu Gobierno aki a bin ta hibando cu ya caba a causa un crecemento negativo di 0.5%, for di un crecemento di 2.3% di aña pasa.
“Tin caida den benta, dramaticamente dor cu e pueblo a perde su poder di compra. E ta bin compaña cu aumento di gastonan y inflacion. E pakete di medida cu a wordo introduci a demoralisa e optimismo cu tabata existi na Aruba (cu a logra cu e crecemento economico a yega na 2.3%), cu a afecta prijs di tur cos na Aruba.
Esaki ta e impacto cu semper nos a adverti p’e. Partido MEP no conoce nada otro cu medida. Si bo por mira e supuesto Reforma Fiscal, e ta mesun cos cu a wordo haci na 2007 y 2008. E tempo ey lo mester a bin un reduccion di e belastingnan directo pa supuestamente compensa introduccion di e BBO cu a causa aumentonan dramatico.
E historia ey a termina den un pueblo defrauda y desapunta, y caida economico dramatico. Ta parce manera e hendenan aki no ta siña. Friends & Family, persecucion politico y pakete di medida. Nan no conoce otro formula y awe ta haya un ripiticion,” sr Eman a mustra.
Ora cu benta cay y nan stop di inverti. Esey ta nifica cu ta stop di tuma hende na trabou, no ta amplia negoshi, no ta duna bonus of compensacion.
E ta bira algo manera un circulo vicioso cu ta keda bay di e consumidor pa e negoshi y vice versa. Pues e efecto no ta bini un biaha so.
Den un situacion asina, e comerciantenan no ta pensa di haci inversion tampoco den e periodo cu ta sigui, cual tambe ta un efecto pa caida di economia y inflacion.
Apesar di e caida di e economia, a spera cu e pilar di e economia, esta turismo, lo no wordo afecta pa decisionnan descabeya cu Gobierno ta tumando. Pero ta mirando un menasa creciente pa e desaroyo di turismo, cu ta refleha su mes den caida di ocupacion di cambernan di hotel pa 4 luna caba.
“For di juli di caida 0.4% a yega na 8.4% na september. Den un economia cu ta tambaleando, ta bin aserca cu e bastion di bo economia cu ta turismo, tambe un debilitacion di esaki. E ta un tendencia y ta sumamente preocupante pa partido AVP. Esaki ta sosode hustamente na momento cu e economia di Aruba mas mester di e sector di turismo pa trata di balansa e situacion.
E pilar cu nos ta depende di dje, ta debilitando, segun informe di AHATA,” e lider di AVP s sigui mustra.
No solamente e ocupacion, pero e REVPAR tambe a cambia di 3.9% (+), mientras cu den añanan anterior ta papia di RevPar di riba 10%.. E RevPar ta bou di influencia y dado momento esey tambe lo bay bira negativo.
Esaki ta algo sumamente preocupante pa tur hende cu ta traha den hotel. Tur hende cu ta traha den sector aki ta haya nan aumentonan basa riba resultadonan cu e hotelnan haci, cu crecemento. Si RevPar cuminsa cay, mas cu 40 mil hende trahando eyden tambe lo sinti efecto di tur e circulo di medidanan cu a wordo tuma.”
Pa corona e obra, Eman ta bisa, despues di bisa cu e medidanan ta debi na Gobierno anterior, a presenta memorandum den Parlamento cu esaki no tin nada di haber cu Gobierno anterior. Pero si e tin di haber cu e Gobierno nobo a bin ta aumentando su gastonan.
“CAFT ta bisa ta cla mientras tanto e deficit den e presupuesto 2018 ta mas halto cu e gastonan final di 2017. E gastonan total den presupuesto en comparacion cu 2017 a subi cu 97.18 miyon florin. Pues e storia cu ta paga medida pa Gobierno anterior no ta berdad. Ta pagando medida pa e gastonan cu e Gobierno aki a aumenta. Mas cu 700 hende a wordo tuma, di cual 5 a cana yega na DIP e siman aki y esey ta sosode den tur Departamento,” Mike Eman lider di AVP a declara.
