Lider di fraccion di MEP mester mustra mas seriedad pa ehecucion di plan crisis social

 In AVP

Miembro di fraccion di AVP, Mervin Wyatt Ras,  no por caba di compronde con lider di fraccion di MEP den parlamento, sr Rocco Tjong, ta mas dedica pa bin cu reaccion politico contra di su persona, na luga di analisa y busca e realidad di e maneho di Minister di Asuntonan Social.


Den un forma publico durante di un conferencia di prensa, sr Tjong a cuestiona e profesionalismo di sra Wyatt Ras como experto riba tereno social y a pidi su persona pa bni duna sosten na maneho di Minister Glenbert Croes, pa cu e maneho di crisis social.

“Ta na su luga pa e tempo cu lider di fraccion di MEP ta hinca pa contradeci declaracionnan cu mi persona a haci durante di conferencia di prensa, ta mustra e berdad di e plan di crisis social di e actual gobierno.

Esunnan yama pa actua na interes di pueblo como representantenan di pueblo den Parlamento, a converti nan mes den  defensor di gobierno. E mesun gobierno cu den nomber di pueblo, nan tin cu cuestiona pa defende interes di pueblo. 

Loke a hala mi atencion ta e hecho cu Rocco Tjong den su afan pa defende e plan di gabinete Wever Croes, ta confirma e preocupacion di nos fraccion pero tambe di CFT pa loke ta e fondo social cu tin poni un banda pa Minister atende cu e crisis social cu lo tin.

Den su propio palabranan sr Tjong a mustra cu ya caba tin 51 persona a wordo tuma den servicio di gobierno pa ehecucion di e proyecto aki y tambe a menciona cu tin un suma di 4.5 miyon aparta pa salario, di cual ya caba a gasta 1.5 miyon di e post aki.

Den e grupo di trahadonan aki cu a wordo tuma den servicio a menciona contratacion di algun experto y si nos asumi cu lo tin 10 pa15 experto cu lo a drenta servicio pa ehecucion di e plan aki, ta keda e pregunta kico e otro 36 empleadonan lo ta haciendo.

Aki mi persona kier a mustra e lider di fraccion di MEP, cu no ta mi persona y fraccion di AVP so tin duda den henter e social crisisplan aki, pero tanto CFT como gobierno di Reino tin duda den e intencion real cu gobierno y e Minister tin cu e plan aki.

Si enberdad despues di tempo cu gobierno a pone e fondo aki disponibel pa e plan di crisis social aki, a mira progreso of resultadonan positivo e ora lo tabata dificil pa tanto CFT como gobierno di Reino pone duda rond di henter e fondo y e plan. Sin embargo esaki no ta e caso. Tin un cantidad di instancianan cu no ta hayando e ayudo cu nan a ser priminti paso zogenaamd nan no ta cumpli cu cierto criterianan. No ta berdad tampoco cu Wyatt-Ras lo ta critica trabou di profesionalnan riba tereno social. Wyatt-Ras semper a y ta enfatisa cu veld social a y ta traha cu curazon y promer cu e gobernacion aki no tabata envolvi cu politiconan. Wyatt-Ras kier pa esaki keda asina. Mientras awor ta cierto personanan lia na politica ta dicidi den un comision si un instancia ta haya un suma pa ehecuta su proyectonan. Esaki no ta un bon desearoyo. 

Prome Minister Evelyn  Wever Croes recientemente a confirma c’un di e ‘aanwijzing’ cu CFT a recomenda Conseho di Minister di Reino pa duna gabinete Wever Croes, ta relaciona cu e crisis plan social aki di gobierno ya cu ningun momento gobierno por a mustra cu ehecucion di e plan aki ta riba e bon caminda.

Al contrario nos fraccion ta di opinion cu si e plan aki tabata asina bon manera sr Tjong ta pretende cu e ta, nos ta sigur cu Hulanda y CFT lo duna nan aporte na esaki sin pensa dos bes pero e posibel ‘aanwijzing’ ta mustra net lo contrario.

Mi persona ta kere cu e lider di fraccion di MEP no mester cuestiona e maneho di nos gobierno pa e situacion social, ya cu desde cu gabinete Wever Croes a asumi mandato di nos pais na 2017, e situacion social a drenta den crisis dor di tantisimo medidanan cu ta saca placa directo for di cartera di nos pueblo. 

Contrario na esaki gobierno di AVP na 2009 a tuma como un di su prome decisionnan, di pone fondo disponibel, entre otro e ‘reparatietoeslag’ pa yuda esunnan di poco entrada, haya un espacio financiero pa nan por haci algo mas cu nan entrada.

Nos gobierno a aumenta onderstand, a aumenta salario minimo, a duna esunnan cu poco entrada placa pa scol, a drecha scolnan rond Aruba invirtiendo miyones di florin pa mucha y hobennan haya un bon educacion.

Gabinete Wever Croes den casi dos aña di tempo a pasa ranca tur esakinan for di mesun hendenan aki, castigando pueblo cu medida cu practicamente a anula tur e incentivonan cu gobierno di AVP a duna na pueblo caminda cifranan concreto di CBS ta confirma esaki tambe cu tin un inflacion di cuminda di 12%. 

Ta didicil pa Wyatt-Ras por cumpli cu peticion di Rocco Tjon pa sostene un plan di crisis social caminda su ehecucion no ta bai manera mester ta. Parlamentario Mervin Wyatt Ras ta pidi colega Tjong pa bin para bandi dje y cuestiona minister pa e yega na bon ehecucion di e plan envez di ciegamente defende.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search