Ley di destaho publico di Partido AVP aproba den Parlamento

 In AVP

Diamars mainta a tuma luga tratamento di ley di destaho publico den sala di Parlamento. Parlamentario mr. dhr. Arthur Dowers a bisa despues di e reunion cu “Mirando e importancia di e ley aki, nos lo a pensa di mira hopi mas seriedad na momento di trata esaki pero lamentablemente esaki no tabata e caso un biaha mas cu e coalicion aki”.

Pa locual ta trata e ley mes, ta un ley cu lo bay regla miho cierto rekisitonan pa loke ta trata destaho di gobierno. Di importancia sigur pa fraccion di AVP mirando cu esaki ta un ley entrega dor di partido AVP den pasado. E ley aki a cana su trayecto legal, aunke uno largo pero necesario y awo a yega asina leu pa trat’e den Parlamento.

Parlamentario Dowers ta lamenta cu tabatin basta hacimento di bochincha di hendenan cu no tin conocemento di kico ta tratando, caminda e parti mas humoristico a bin resulta di ta acusacion den direccion di partido AVP, mientras a traha e ley y lag’e cla pa nan presenta, pero ta AVP ta esun cu a tarda cu e ley! E ta menciona cu ley ta algo cu ta tuma tempo, cu tin su trayectoria pa cana y ta locual cu a tuma luga cu e ley aki. Mayoria di leynan cu a pasa den Parlamento te cu awo akinan ta di partido AVP, cu excepcion di algun di esunnan cu nan a pasa, cu a bin di nan mes y esakinan tabata MEDIDA contra pueblo!

Den e mes un rosea Parlamentario Dowers ta cuestiona cu si acaso e ley aki tabata di asina importancia pa e gobierno aki, dicon no a dicidi di haci un esfuerso pa pasa esaki mas prome, mientras tur otro ley di medida a pasa den frega di wowo pa bati pueblo cune. E pueblo aki ta sufriendo cu tanto medida mientras ta spera mas medida na caminda y pa esakinan si por a core pasa ley pura pura, manera entre otro esun di “grondbelasting” pa choca pueblo cune. Pero un ley cu ta bay reglamenta aun mas con nan di Gobierno tin cu funciona, no tin pura cu ne.

Un hilaridad di por tende Minister di Finansa ta manda Parlamentario Ricardo Croes bay lesa ley paso obviamente e no a compronde kico e la lesa, ta cos di hari y/o yora. Sin lubida cu e mesun Minister aki tampoco no ta compronde kico ta trata di e ley aki , pero ta manda otro pa bay lesa ley, na momento cu Parlamentario Croes a bin cu preguntanan cu no ta cuadra.

Dowers a bisa: “Pa completa, por scucha un Otmar Oduber papiando di transparencia, ta cos di hari!” Ta un persona cu tur dia nan ta acus’e di a haci destahonan publico dudoso, ta cos cu tur hende sa ta con nan a bay cune, mientras actualmente su persona ta purbando di privatisa tur e departamentonan di Gobierno pa percura cu e por sigui haci locual e ta haciendo. Por ehempel na Serlimar, caminda gran mayoria no ta di acuerdo cu locual ta pasando eynan, pero e ta den un sistema cu e por logra haci deshaci. E no lo para aki pasobra su intencion ta pa logra cu demas departamentonan tambe.

Berdad cu e ley aki ta uno den cuadro di mehoracion di calidad di leynan di pais, e ta un ley importante, pero no ta asina fácil e lo bay kita cierto “streken“ di e Gobierno aki, pasobra nan lo sigui haci manera ta bon pa nan y si lag’e den man di Otmar Oduber e lo sigui purba privatisa mas departamento pa por haci y deshaci manera e ta custuma caba.

Pa finalisa Parlamentario Arthur Dowers ta referi na un frase di Watty Vos den feliz memoria a bisa hopi bez: Miho bo keda keto aparenta bobo, cu papia y confirma cu bo ta bobo!

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search