Integridad di Parlamentario Lejuez no ta wordo respeta pa Prome Minister

 In AVP

Parlamentario di fraccion di AVP sr Arthur Dowers na nomber di partido AVP a condena e forma con Minister Presidente Evelyn Wever Croes, a manda menasanan serio den direccion di un miembro di Parlamento.

Parlamentario Dowers a declara cu por a tuma nota con Prome Minister ora cu el a wordo puntra pa miembro di prensa su su partido ta condena menasanan dirigi na e miembro di Parlamento Daphne Lejeuz, su reaccion tabata sorpresivo pero na mes momento di condena.

“Na luga di asumi su responsabilidad como lider di e pais y condena e menasanan aki, Evelyn a bisa e ex miembro di fraccion di MEP cu si su persona kier Sali for di su partido, e tin cu tene cuenta cu ningun hende di MEP lo no bay manda flor ni roza pa su persona.

E expresion di roza ta comprendibel ya cu e maleta di roza ta fresco den Premier su memoria pero ta sumamente tristo pa scucha un Minister Presidente cu na luga di sigura trankilidad den e pais, e ta Sali bin dilanti y manda riba un parlamentario.

Un parlamentario cu tin derecho di scoge con cu e ta desea, kico e kier den e pais aki, sigur ora cu Aruba ta un pais democratico caminda bo no por como gobierno, ya cu no por tin teror di estado contra di ningun hende y awor nos ta mira con un Minister Presidente ta Sali bin dilanti y bisa cu e ta hasta compronde, pues den cierto sentido ta manda su hendenan pa bay menasa e parlamentario aki pa motibo cu e tin otro opinion y vision.

Ora cu Prome Minister bisa cu no ta wega di Barbie tin aki, ta lanta e pregunta con por ta posibel cu ora bo drenta un relacion c’un scorpion den un gobierno caminda e mester ta wowo habri 24-7, con e por pensa cu no ta wega di Barbie tin.

E miembro di Parlamento aki a dicidi cu e no kier ta parti di bagamunderia y falta di integridad te cu el a dicidi di Sali for di e  wega cu ta wordo  hunga dor di Evelyn Wever Croes y Otmar Oduber, anto na momento cu el a Sali bo ta bay bise pa e prepara su mes, pasobra menasanan ta bay sigui.

Na luga cu su persona condena e cosnan aki y para e forma di procede aki,  e ta Sali bisa cu awor menasanan lo bin pa e parlamentario pa motibo cu el a haci un escogencia riba cual e tin derecho di haci denun sistema democratico.

Nos miembro di fraccion Mervin Wyatt Ras ya caba a biba e tipo di desaroyonan negativo aki di cerca hunto cu parlamentario Tromp, kende awor ta brasa cu mesun Prome Minister aki pero nos no por bisa kico el a wordo priminti.

Ta hopi tristo pa mira con un Minister Presidente, con un mama ta comporta su mes di e forma aki con e ta comportando su mes na e momentonan ey.

E mascara di sre Evelyn Wever Croes   y partido MEP a cay un bes mas y otro cos hopi tristo cu nos a mira con ta trapa riba democracia, ta e hecho na momento cu lider di fraccion di MEP ta Sali bisa cu nan di MEP ta contra di e señora parlamentario kende a tuma su retiro pasobra el a expresa su opinion.

Nos estado di derecho ta duna bo e libertad como miembro di Parlamento, pa ‘zonder lasten en lusten’ por tuma un decision y ningun momento e tin cu pidi Rocco Tjon kico ta su opinion ya cu e no mester di tene cuenta cu opinion di Rocco ya cu e por Sali pafo y duna su opinion manera cu e ta haya ta bon.

Rocco Tjon ta admiti awor pa publicamente, loke ta un berguensa, tambe Presidente di parlamento Ady Thijssen, cu señora Daphne Lejuez  no tabata sostene e  trapamento di derecho di Parlamentario Benny Sevinger y tampoco Ricardo Croes a sostene esaki.

Pues nan ta bisando cu nan sa cu nan tin un minoria den Parlamento y tog Rocco Tjong y Endy Croes kende a bay cu tur placa di Lotto y tambe Luigi Bergen y tambe Ady Thijssen caminda nan cuater di 21 miembro di Parlamento, caminda nan cuater tin menos voto cu Benny Sevinger, kende den parlamento ta representando pueblo den forma sumamente amplio,   anto net nan cuater ta dicidi cu sr Sevinger su derecho tin cu wordo trapa ya cu segun nan e ta sospechoso.

Ta nan mes a haci denuncia contra Benny Sevinger y asina nan a dicidi cu e ta sospechoso pero por a scucha Luigi Bergen bisa cu e tambe tabata sospechoso pa motibo cu su yiu a entrega denuncia contra di dje pa maltrato pero cu esey no ta asunto di ningun hende.

Awor nan si kier husga un hende, caminda Bergen a acusa e Baboe Hoek di ta actua como Hues pero Luigio Bergen, Rocco Tjon, Endy Croes y Ady Thijssen, a bira Hof van Justitie.

Mi ta kere c’un bes mas a wordo demostra c’un set di hendenan sin berguensa ya cu no por bisa otro, ta haci nan mes culpabel pa trapa derecho di otro hende.

Por a scucha Prome Minister bisa algo comico ora cu el a declara cu nan tin cu traha duro ya cu pueblo tin hopi reto pero pueblo no tin ningun tipo di reto, ta saco di Papa tin reto, anto e retonan ey poco poco ta wordo cumpli cu nan ya cu nan ta e saco di Papa cu placa di pueblo.

E pober cu nan ta kita su awa y coriente, laga nan den scuridad, laga nan bocas seco, tur por pero Papa su saco si ta gordo atrobe y tur hende sa con e placa ey ta lora entre otro via Irus Crius y cerca kende e ta yega.

Pueblo keda  pendiente ya cu e abuso aki cu ta wordo haci contra pueblo, lo no wordo tolera pa partido AVP y pa nos no ta importante si ta parlamentario di MEP of cualkier otro fraccion, pero como parlamentario bo tin cu wordo respeta.

Ora cu nos mira cu gobernantenan ta usa medionan di comunicacion pa manda menasanan pa un miembro di Parlamento, nos di AVP ta condena esaki y si ta necesario nos lo denuncia esaki tambe internacionalmente,” Parlamentario Arthur Dowers a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search