“Hopi contento cu iniciativa cu Monumenten Fonds a tuma pa bin cu un reunion mensual”, esaki tabata palabranan di Parlamentario di fraccion di AVP, Robert Candelaria, despues di a sinta siman pasa den un reunion cu diferente stakeholders cu tin di haber cu mehoracion di e posibilidadnan pa ciudadanonan cu un limitacion fisico den comunidad. “E reunion tabata hopi fructifero!”
Topico di e reunion tabata pa analisa con Monumenten Fonds y otro instancianan cu ta traha cu personanan cu limitacion por uni forsanan hunto pa yuda e grupo den nos comunidad cu ta creciendo cada dia. A mira cu e deseo t’ey pa traha hunto, locual cu falta ta con pa haya otro, con pa haya e diferente specialismo, esunnan cu e ideanan, con pa trece nan hunto pa mira kico ta e cambionan cu mester pa zorg cu e luganan cu ta monumentonan bira accesibel.
Di su banda Parlamentario Robert Candelaria ta mira cu esun cu ta cla pa bira mas accesibel, mirando peticion di comunidad, ta nos Stadhuis. Sigur esaki ta dificil pasobra e ta un monumento, buscando forma con pa haya ciudadanonan cu no por cana, logra drenta y presencia of ta parti di casamento di famia of porta su mes. “E pensamento cu ora nos traha hunto, cu nos mira e “Big Picture” caminda tur hende den nos comunidad por participa, por ta mobiel y logra tur cos manera nan no tabatin limitacion, nos a dal e paso den e bon direccion”.
E Parlamentario a bisa despues di e reunion di ta masha contento di a mira e diferente organisacionnan cu tabata hunto, contento di por a invita e plataforma pa haya representacion di tur e 14 fundacionnan cu ta traha cu hende cu limitacion pa cada un contribui di nan parti pa logra un stap grandi pa e grupo aki den comunidad. “Mi no ta un experto, mi no tabata activo den esaki nunca pero despues cu nos amigo Jos Solognier, den feliz memoria, a trece e peticion aki dilanti, mi ta sigui traha riba dje te dia nos logra” asina Robert Candelaria a expresa.
For di December 2018 a cuminsa e peticion y ta keto bay den comunicacion frecuente cu Cuerpo Policial pa logra haya finalmente e “parkeerkaarten” pa chauffeurnan cu limitacion por para legalmente y tur esunnan cu ta ta uzando e parkeo sin permiso, cu Polis por actua contra nan. Sigur hopi mas idea a bin dilanti den e reunion, cu awor lo mester concretisa un pa un.
Sin cu esaki ta su area di experticio, Candelaria kier logra trece a topico aki dilanti den diferente angulo, pa mas hende den comunidad carg’e, pa logra cu esunnan cu limitacion ta sinti cu nan por move mescos cu tur otro hende riba nos Isla. Ta yen’e di speransa y bon sentimento ora mira participacion e mainta den e reunion cu tur presente.
